1 Hazeroth mun'a aum laijun, Mose in Cush mi numei khat akichenpi jeh in Miriam le Aaron chun ama demna thu asei lhon tai. 2 Amanin hiti hin asei lhonin, “Pakai chu Mose henga bou kilah thei ham? Eini henga jong hung kilah hilou ham?” ati lhon e. Hilah amani thusei chu Pakaiyin ajasoh keijin ahi. 3 (Tunvang Mose chu akineosah lheh jengin ahi- Leiset a akineosah penpa sang'in akineosah joh nalai in ahi.) 4 Hichun gangtah in Pakaiyin Mose, Aaron chule Miriam chu akouloi in hitin aseipeh tai, “Nathum uvin Houbuh lama gache tauvin!” ati. Hichun amaho thumin jong Houbuh lam chu ajon tauvin ahi. 5 Chuin Pathen chu meilom khom lim'in ahung kumlhan Houbuh lutna a chun ading denin, “Aaron leh Miriam!” tin ahinkou in ahileh amani jong ama chejep lhonin ahi. 6 Chuin Pathen'in ahoulimpi lhonin tuhin ka thusei ho hi ngai lhonin:

“Nangma ho lah a themgao um ahileh,

Pakai, Keima hi, gaova kiphong ding kahi tai.

Ahilouleh manga kaki houlim pi ding ahitai.

7 Hinlah kasohpa Mose vang hitobang chu ahipoi, Ka insung pumpi a

ama hi katahsan pentah ahi. ✡Heb 3:2

8 Kicheh tah in, paolem mang louvin

Keiman ama toh kimaito in thu kaseije!

Aman Pakai chu ahina bang tah a amu ahi.

Chuti ahileh idia kasohpa Mose dem ding kicha lou nahi lhon ham?”

9 Pakai chu amaho chunga chun alunghang lheh jeng tan, adalha lhon tai. 10 Houbuh chunga meilhang akitol toh lhonin chu a ding Miriam chu tiphah natna jeh chun avun chu buhbang bangin abang tan ahi. Aaron in Miriam chunga thilsoh ijakai amusoh phat in, 11 Mose henga akaptan, “Oh, kapu! Hiche ngol-hoitah chonsetna kana boldoh jeh lhonin gotna neipe lhon hihbeh in. 12 Amanu jong hi naosen athisa a hung peng, apen lhah lhah a amonsa bangin koi hihbeh in,” ati. 13 Hichun Mose Pakai anga akapjah jeng tan, “O Pathen, katao ahi, lungset tah in amanu hi damsah tan!” ati. 14 Ahin Pakaiyin Mose jah a seitan, “Amanu hi apa chun achil aset khum hitaleh, nisagi sung chu aboh a um a jum le ja athoh louding ham? Hijeh chun amanu hi ngahmun pamlam a nisagi sung koidoh un lang, chujou teng lahlut kit thei hi ding ahi” ati. ✡Minbu 5:2,3 15 Hiti chun Miriam chu ngahmun pamlam'ah nisagi aumsah un, chuleh akitol kit masang un, amanu chu ngahmun sunga ahung kit ding chu mipi ho chun angah un ahi. 16 Hiti chun Hazeroth adalha tauvin ache peh un Paran gamthip munkhat a ngahmun khat akisemkit tauvin ahi.