13
Som le ni in Canaan gam akholtoh
1 Tun Pakaijin Mose heng’ah, 2 “Canaan gam, Israel chate kapehna gam gakhol toh ding pasal ho sol in. Phung som le ni ho a kon a lamkai khat cheh sol tan” ati. 3 Hichun Mose’n Pakai thupeh bang chun abol tai. Paran gamthip a angahmun uva kon chun phung lamkai cheh mi som le ni asol tan ahi. 4 Hiche ho hi amin uleh aphung min cheh uchu ahi:
Phungmin Lamkai
Reuben sungkon Zaccur chapa Shammua
5 Simeon sungkon Hori chapa Shaphat
6 Judah sungkon Jephunneh chapa Caleb
7 Issachar sungkon Joseph chapa Igal
8 Ephraim sungkon Nun chapa Hoshea
9 Benjamin sungkon Raphu chapa Palti
10 Zebulun sungkon Sodi chapa Gaddiel
11 Joseph chapa Manasseh sungkon Susi chapa Gaddi
12 Dan sungkon Gemalli chapa Ammiel
13 Asher sungkon Michael chapa Sethur
14 Napthali sungkon Vophsi chapa Nahbi
15 Gad sungkon Maki chapa Geuel
16 Amaho chengse hi Mose’n gamkhol dinga alhendoh pasal ho chu ahiuve. (Mose’n Nun chapa Hoshea chu Joshua in akou e.)
17 Mose’n hiche pasal gamve lhi dinga ngansena anei a soldoh ho chu thugahna aneiyin: “Sahlam Negev hopa thinglhang lam naho diu ahi. 18 Gam chu itoh bang'am, hiche gam a um mihem ho chu hat uvem lhasam uvem, tam uvem lhom uvem ti nahin khol doh diu ahi. 19 Gam chu itobang ham gaveuvin. Gam chu gampha ham phalou ham? Kulpi bang anei uvem, ahilouleh ngahmun mai mai a um uham? 20 Leiset chu leithao hoina ham lhasam ham? Chu a chu thingphung tam am? Theitop hinso unlang agam gaasoh hettheina dingin thingga louga ho jouse hinpo un. (Hiche phat chu lengpiga masa lophat laitah ahi.)
21 Hichun ache touvun Zin gamthip apat akhol chil un Rehob gam Lebo-hamath kom dung gei chu abonchan gakhol sohkeiyun. 22 Sahlam ahouvin, Negev gamthip mun ajot pauvin chuin Hebron alhung tauve. Hikom mun chu Ahiman, Sheshai, chuleh Talmai (Anak chilhah ho) chen na ahi. (Hebron khopi chu Egypt khopi Zoan sanga kum-sagi masanga ana um ahitai.) 23 Ama hon Eshcol phaicham ahin phah uchun lengpi thei boh khat ahin sat lhauvin, aletthei beh jeh chun moljol a minin ahin pu un ahi. Kolbuthei leh theichang ga ho jong vetchil dingin ahin ahinpo lhungun ahi. 24 Hiche lai mun chu Eshcol phaicham akitin ahi. Ajeh chu gamve lhi Israel mihon hilai mun a chu lengpiga aboh a ahin satna mun u chu ahi
Gamve lhi ho thulhut
25 Nisomli jen gam le go kholchilna anei jou phat un pasal ho chu ahung kileuvin 26 Mose, Aaron chule Israel mipi ho kom Paran gamthip, Kadesh mun a ahung kinungle tauve. 27 Hichun ama hon Mose jah a hiti hin aseiyun: “Keiho gam kholtoh dia nei nganse nauva kache uchun, agam chu anom in avethoi lheh jengin - Khoiju leh bongnoi lonna gam ahi. Hichengse hi gamsunga gasoh ho chu ahi. 28 Ahinlah hilai gam'a umho chu athahat theiyun, chuleh a khopi hou jong chu alen thei in hoitah in aveng tup un ahi. Chuleh Anak chilhah milen ho jong chu kaga mu uve! 29 Amalek mite chu Negev a acheng un, Hit mite, Jebus mite chuleh Amor mite ho jouse thinglhang lam a acheng un ahi. Canaan mite chu Jordan phaicham leh Mediterranean Dillen pang dunga acheng un ahi.”
Caleb in Pathen a konna thu asei
30 Ahinlah Caleb in Mose angsunga thulhut miho chu suhthip ding angaiton, “Eiho cheu hitin gam chu gala jeng uhite,” “Eihon ijo tei tei diu ahi!” ati. 31 Amavang Caleb toh gam kholle a che ho lah chu anom pouvin, “Amaho eiho sanga hatjo ahiuve! atiuve. 32 Chuti chun lung lhahdaina thulhut joh chu Israel mite lah a ahin seiphong uvin: “Kache uva kakhol chil u gam leiset chun koi hileh hilai mun a gacheng ho chu avallhum diu ahi. Mi kahin mu hou jouse jong chu alen theiyun ahi. 33 Chuleh keihon milen tah tah, Anak chillhah mite jong chu kamu uve. Amaho toh tedingin keiho chu khaokhoho tobang bep kahiuvin, amaho jengin jong hitia chu eigel'u ahiye!” atiuvin ahi.✡Semtilbu 6:4
DRAFT COPY