1 Hichun Israel mite abonchauvin aw sangtah in akap un chuleh amaho chu jan khovah geijin akap un ahi. 2 Hiche mipi awgin lakisa chu akithong jengin Mose le Aaron douna kibol ahi. “Egypt gam'a ana thidoh kihi le phajonte.” tin asam uve. 3 Pakaiyin ipi dinga hiche gam lah a hi gal’a thi ding bep a eipuidoh uham ? Kaji te hou le numei chapang ho athigam bep dinga hung kipuidoh hitam! Egypt gamsunga kakile uva phachomjo louding ham? tin a sei uve. 4 Hichun Amaho khat le khat akihou khomun eihon lamkai thah lheng uhitin Egypt lamah kinung le tau hite! akitiuvin ahi. 5 Hichun Mose le Aaron chu Israel mite jouse masang tol lang ngan akunlha lhon tan ahi. 6 Pasal mini gam kholla che teni chu Nun chapa Joshua le Jephunneh chapa Caleb chun aponsil lhon abotkeh lhon tai. 7 Amanin Israel mipi te ho lah a asei lhon tan, keinin ka khol chil lhon gam ho chu kidang tah le loupi tah ahiye! tin asei lhon’e. 8 Chule Pathen hi eiho dinga hiche gamsung khu eiphatsah peh uva ahileh, Pakai chun agamsunga ei puilut uvin tin eipeh diu ahi. Hiche gam chu gam phatah ahin khoiju le bongnoi lonna gam ahiye. 9 Pakai chu douhih un, chule hiche gamsunga chengte jong kicha hih un. Eiho a dingin amaho khu apanpi ding umlou anchah a pang tobangbep ahiuve! Avengtup ding anei pouvin, hinlah Pakai chu eiho toh um ahi. Amaho khu kicha hih un!” ✡Heb 3:16 10 Amavang mipi jouse chun Joshua le Caleb chu songa selih ding agong tauvin ahi. Chutah chun Houbuh a Israel te chungah Pakai loupina chu ahung kilah tan ahi.

11 Chuin Pakaijin Mose jah ah, “Hiche mite hin itih chan nahsah louva eikoi diu hitam? Alah uva thil kidang tampi kaboldoh nunga jong ei tahsan louhel diu hitam? 12 Keiman amaho chu kapai uva chule natse a kasuh mang diu ahi. Ahinlah keiman nangma hi alenjo leh thahatjo a kasem ding nahi! ati. 13 Ahinlah Mose anompoi. “Egypt miten hiche thil um dan hi ahet teng ule ipi agel diuvem?” tin Mose’n Pathen chu adong tai. Egypt a konna nangman na thahatna a Israel mite nahin puidoh a na huhdoh chu ahetchen u ahiye.✡Potdohbu 32:11-14 14 Tua Nangman hiche Israel mite hi na suhmang leh Egypt miten agam'a cheng ho lah a alhut diu, nangma toh kimaito ahiuvin chule jan teng meikonga napuiyun sun teng meilhang in na pui jiuve. 15 Pakai nangman amaho hi ilou theh a na suhmang leh hiche nam mite na puidan kidangtah ana hesa nam mite chun sei uvin tin, 16 'Pakaiyin amaho gamthip noiya asuhgamna ajeh chu ateppeh nau gamsung chu apuilhung jou tahlou jeh ahi,' ati diu ahi. 17 “Pakai, lungset tah in, nangman nasei bangin na thaneina chu vetsah kit in. Nasei bangin, 18 'Pakai hi lunghang vahlou chuleh ngailutna a dim jing ahi. Hinlah themmona nei mi mohvet lou ahi. Ama chu minu le mipa te chonsetna jeh a achate akhang thum le akhang li geiya gotji ahi.' ✡Potdohbu 20:5,6; 34:6,7; Danbu Ni Na 5:9,10; 7:9,10 19 Na milungsetna nasatah, thon ngailou ngailutna chun lungset tah in hiche mite chonsetna ho hi Egypt ahin dalhah uva na ngaidam ji bangin ngaidam in.” 20 Hichun Pathen’in aseijin, “Nangma ngehna bangin ngaidam tang’e,” ati. 21 Hinlah Keima Kahin jing banga vannoi leiset hi ka loupina dim jing ding, ✡Heb 3:18 22 hiche mite ho lah a hi koima jong ka teppehna gam lhung jou talou diu ahi. Ajeh chu amaho jousen ka loupina chu ahetsoh hel’u ahin, chule thil kidangtah melchihna Egypt gam’a chule gamthip lah a kabolin, ahinlah ama hon ka thusei angainom pouvin avel vellin eipatep uve. 23 Keiman apute apateu ka teppehna gam chu itih hijongleh amu louhel diu ahi. Amaho lah a koi tobang eidou dal ho jouse chun imacha amu louhel ding ahi. 24 Ahinlah ka lhachapa Caleb vang hi midang hotoh lunggel kibah louna aum'e. Caleb hin homtho tah in eihou jingin hiti ahijeh a chu agam kholna mun'a chu kapui lhung tei ding ahi, Caleb le achilhah te jousen hiche gam chu aboncha a alo soh hel diu ahi. ✡Joshua 14:9-12 25 Tun nangma kiheile inlang, nangman Amalek mite le Canan mite ho chenna lang chu na jot louding ahi. Jing tengleh nangma kipatdoh in gamthip lam jon'a Twipi San langkaiya chu nakitol diu ahi,” ati.

26 Hichun Pakaiyin Mose le Aaron henga hiti hin aseiyin, 27 “Hiche migilou nam leh ka chunga kiphin jing mite hi itih chan ka khongai jou ding ham? Henge, keima douna a akiphin jingu hi kajai. 28 Tun amaho chu hiche hi seipeh un: Pakaijin aphongdoh in, Keima kahin jing banga nangman nasei chu kajan kaboldoh tei ding ahi. 29 Nangho nabon uva gamthip a thiden ding nahi tauve! Ajehchu keima douna a kiphin, kum som nia pat chunglam sen thina ato ding ahi, ati. ✡Heb 3:17 30 Katepna gamsung nalo tahlou diu, Jephunneh chapa Caleb le Nun chapa Joshua amani bou chun alo lhon ding ahi. 31 Ahinlah nachate khangthah ho nang hon mi thagam ding bep a nagel hou chu keiman kapanpi ding agam leiset nadeimo sau gam chu atoupha diu ahi. 32 Amavang nangho jouse na thilong uchu hiche gamthip nelgam a hi kivui lhum ding ahitai. 33 Chule na chateu chu kelngoiching ho bang diu, gamthip noiya kum somli le li vahle diu ahi. Hitobang’a chu na kitahlou nau namu diu, hiche gamthip a hi nalah uva achaina pen jong thi a lum ding ahiye. ✡Act 7:36 34 “Ijeh inem itileh, na lamkai hon nisomli jen lutna gam leiset kholla cheuva ahin na chonset jeh a kisu genthei ding nahitai nikhat lampi chu kum somli jen na jot dingu ahitai. Hiche teng chule nang hon Pathen toh melma a um hi itobang’a hahsa ham ti nahet doh diu ahi. 35 Keima, Pakaijin kasei ahitai! Hiche mipi ho lah a eidou’a pang jing ho chu suh gentheiya umdiu ahi. Amaho chu hiche gamthip a hi kisumang diu, chule hilaiya hi thi diu ahi!”hinkho kicha soh hel diu ahi. 36 Pasal som ho Mosen gamve lhi dinga asol Pakai douna a thu hinlhutpa ho chu 37 Pakai angsunga pul in adengun athi tauve. 38 Gam kholchin lah a pasal somle ni lah achun Joshua le Caleb bou asohcha lhonin ahi.

39 Mose’n Pakai thucheng seidoh jouse chu Israel ho lah a aseipeh phat chun mipi ho chun nopmo asah thei lheh jengun ahi. 40 Amaho chu ajing jingkah matah in aki thou un mol chungvum laitah a akaldoh un ahi. Amahon “Cheu hite,” atiuve. Pathen dounan ichonse tauve, ti ikihetdoh tauvin, hijeh chun tunvang Pakaijin eiteppeh nau gam chu jontau hite, akitiuve. 41 Ahinlah Mose’n aseijin, “Ibola nanghon Pakai thupeh palkeh a gamthip a kile ding na kisah u baham? Phachom ponte. 42 Tun hiche gam lam’a lut ding jong gotda tauvin. Na melmateu khut a naki suhchip bep diu ahi ajeh chu Pakaijin naumpi tapouve. 43 Nanghon Amalek mite le Canaan mite toh nakidinte tengu leh, ama hon na satchop gamhel diu ahitai. Pakai nana dalhah tah jeh uva Pakaijin nangho jong na dalhah u ahitai. 44 Hinlah Mose jong pang lou, Pakai thingkong jong jao talouhel in mipi chun thinglhang lam chu mano in atum tentun uvin ahi. 45 Hichun molchung lam a pansan Amalek mite leh Canaan miten ahin bulhu tauvin hiti chun Hormah chan ahin del tauvin ahi.