1 Chuin Pakaiyin Mose henga thu aseijin, 2 “Keiman kapeh nau gam leiset mun chu na lhun teng uleh Israel mite chu hiche thuhil ho hi seipeh in, 3 Nangman pumgo maichamn thiltoh gimnam tuisel Pakai henga napeh ding ahiye. Na gancha hon bong, kelngoi hon lah chule kelchal ho lah ajong ahoi cheh pumgo maicham thilto kumlhun sih a kibol banga chu napeh diu ahiye. 4 Nangma hiche maicham ho hi bol ding tia nagel teng Pakai chu mim le changa konna changbong chu gopni hi ding chule Olive thao chu Hopkhat hi ding ahi. 5 Kelngoi chu khat pumgo maicham thiltoa nakat diu pumgo maicham thil tona dia lengpitwi jong hop khat maicham nahinto ding ahi. 6 Pumgo thilto chu kelngoi ahile changbong kipe dol chu gal a Pakaiya dinga gimnam tuitah hi ding ahiye. 7 Chule lengpi thei twi chu khon thum tobang twija maicham din sem in hichu Pakaiya dinga gimnam tuitah ahi. 8 Nangman bongchal nou pumgo maicham thilto nabol teng Pakaiya dia kipana maicham kisuh thengna nabolji ding, 9 nangman mim le changbonga kisem hop gup napeh ding chule Olive thao jaona hop ni hi ding, 10 chule nangman hopni lengpitwi napeh ding hichu Pakaiya dia gimnam tuitah hi ding ahi. 11 Hiche maicham jouse aboncha kelchal, Kelpi, Kelnou, chule adang jong hitia chu na bolsohkei diu ahi. 12 Nangman pumgo thilto napeh teng hiche thupeh ho hi najui ding ahi. 13 Nangho Israel mite hiche mun a peng jousen Pakai henga gimnamtui maicham napeh teng ule hiche thupeh ho hi najui’u angaiye. 14 Koi tobang nangho kom'a kholjin mi aum ham ahilouleh acheng den aum khah jongleh amaho jong chun hiche dan hi ajui cheh diu ahi. 15 Israel mite agam leiset mun'a peng den hihen gampam a kon hung pemlut mi hijongleh Pakai mitmua thakhat cheh ahiuve. Hijeh a chu Dan khat noija um cheh ahiuve. Hiche hi nangho dia tonsotna jui dinga dan kisem ahin hichu najui diuva kipe ahitai. 16 Nangho ding hihen gamchom mi hung pemlut ho hiu jongleh hiche thupeh jui ding’a kigong ho hi nabol cheh diu ahi. ✡Thempu Dan 24:22 17 Pakaiyin Mose hengah aseijin, 18 Israel te chu anoija thupeh ho hi seipeh tan. Nangho kapehna gam nalhun uva, 19 hiche gamsung gasoh ho naneh teng ule Pakai maicham ding jong na khin doh cheh cheh diu ahi. 20 Na lousoh mim le chang aga masapen chu changbong a nasuhdi ding changlhah lum a nasem ding hichu Pathen a dinga ga masapen ahijeh a napeh doh ding ahi. 21 Ahunglhung ding khonung khang geija hiche maicham atheng Pathen henga pehdoh ding hi akumsih leh najui ding na lou gasoh amasapen chu na koidoh jing ding ahiye.

22 I-ham tia Pakaiyin Mose henga athupeh chengse hi nahsahmo jeh hilouva, hetthem lou jeh joh a na suhmil khah uva, 23 khonung’a na chilhah ho jengin jong Pakai thupeh ho asuhmil khah uva, 24 hiche suhkhelna chu mipi jousen ana hetthem lou jeh ahi khah tah leh Israel mipi te chun bongchal nou khat Pakai heng’a gimnamtui thilto dia ato diu ahi. Chuleh Anneh ding thilto leh don ding thilto toh chonset thilto adia kelnou khat ato tha diu ahi. 25 Hiche ho jouse toh hin thempu pan Israel mipi ho chu Pakai masang’a asuhtheng ding chuteng amaho chu ngaidam a um diu ahi. Ajeh chu ama hon achonset nau chu ana hetlou jeh u ahin, a maicham thilto jal uva kingaidam diu ahi. Pathen heng’a chonset thilto leh kilhaina abol jal uva chu ngaidam kichan diu ahi. 26 Israel mipite leh gampam mi abonchauva ngaidam a um nahi tauve. 27 Koi tobang khat in hetthem louva chonsetna ahin bol tah leh, amapa chun kelpi kumkhat lhingset khat a chonset thilto ahin todoh ding ahi. ✡Thempu Dan 4:27-31 28 Thempu chun hiche pasal chu Pakai masanga asuhtheng ding chuteng amapa chu ngaidam a um ding ahitai. 29 Hiche thuhil hin nangma ho Israel chilhah ho nahiuvin chule midang nagam uva khopem ho jouse jong ahop sohkei ahi.

30 Hinlah nangho lah a koitobang ahenasa a Pakai deilam bollou vang chu Pakai taitom kiti ding chule amaho chu Israel te lah a pat a chomkhen’a um ding ahiuve. 31 Ama hon Pakai thupeh chu henasa a khohsah louva akoitah jeh un amaho jouse chu pum noa nomang ding ahi tauve chule achonset nau jeh a gim gentheina athoh diu ahi.

32 Israel mite nikhat gamthip a akhosah laitah uchun mipi ho chun pasal khat in Sabbath nikhoa na atoh a thing achom pettah ahin tohkha tauvin ahi. 33 Israel te lah a pasalpa thilbol mudoh jouse chun amapa chu Mose le Aaron chule mipi lah ahin puiyun ahi. 34 Ama hon ipi lo ding ham atheilou jeh uvin munkhat a aumsah un ahi. 35 Hichun Pakaiyin Mose chu ahoulimpi tan, “Hiche pa chu thina channa gotna chang ding ahi! Ama chu khopi pam lam a mipin song’a ase lih ding ahi,” ati. 36 Hichun mipin amapa chu ngahmun pam lam’a akaidoh un songin aseplih tauve, hichu Pakaiyin Mose henga thu apeh bang banga abol’u ahi.

37 Chuin Pakaiyin Mose henga thu aseiyin, 38 Israel te chu anoiya thucheng kihilna ding ho hi seipeh kit tan. Aponmang jouseu chu alum khat aba diu, alum lai chu ajem adum a nabol diu, hichu akhang akhanga akivon diu ahi. ✡Danbu Ni Na 22:12 39 “Nangman hiche pon mangjem chu namu teng na Pakai thupeh sang’a tahsa ngaichatna joh nasuh bukim nomlouna diu ahi” ati. 40 Hiche pon dum chun thupeh jui ding’a umho chu nahin geldoh sah diu Pathen atheng’a umpa toh na kinai sah jing diu ahi, ati. 41 Keima Pakai na Pathen Egypt gam'a konna nahin puidoh pa chu kahi. Keima na Pakai na Pathen kahi!”