1 Nikhat chun Izhar chapa Korah, ama chu Levi phunga kon Kohath insungmi ahin, ama chun Reuben phung’a kon mi akitep khomin, hiche teni chu Dathan le Abiram, amani chu Eliab chate ahin, chule Peleth chapa On jaonan, ✡Jde 1:11 2 Israel chilhah jouse phung lamkai 250 jaonan Mose doumah in achon tauve. 3 Amaho jouse thakhat tah in lungkhat in apang khom un Mose le Aaron henga hitin asei tauve. “Pakai mite dang ho sangin lenjo lhon jong lechun ipi bolna ding thaneina nanei lhon em?” tin asei uve. 4 Mose’n amaho thusei ajah phat chun akaiku jeng tan ahi. 5 Hichun Mose’n Korah te nungjui ho lah a chun hitin aseitai, jing teng Pakaiyin eihetsah diu ahi koi ho hi ama chate hiham tichu hetdohna um ding ahi. 6 Vo Korah nangma nahin na nungjui ten jing teng maicham thaomei halna chu nahin kichoi diu ahi, ati. 7 Chuteng Pathen masanga koi chu a thengjo ham ti chu ivet diu ahitai. Veuvin Levi chate ho nangho joh in nabol khel tauve, ati. 8 Chuin Mose’n Korah henga asei in, Levi te insung injong ngai un, 9 Pathen chun Israel mipi te lah a na lhendoh uva, ama jen ding leh akintheng natoh tong ding’a na ngense uhi, thil neocha a ngaito nahiu ham? ati. 10 Korah, Pathen'in hitobang kintheng tong dia na sopite’u Levi te toh na ngense jinglai uva themputna jong na holbe uva na ngaichat nahlai diu ham? 11 Nangho hin na doudal pentah uchu midang ahipon Pathen chu ahi bouve, Aaron chu koi nahisah uva ama chung chang’a lungphatmona na vetsah jing uham? 12 Hichun Mose’n Eliab chateni Dathan le Abiram chu akou lhonin, ahinlah amanin adonbut lhonin, “Na masanga hung ding kanompoi! ati lhon'e. 13 Egypt gamsung khoiju le bongnoi lonna gam'a patna eihin puidoh uva, hikom nelgam a thidoh dinga eikou uva tuchan geija keiho chunga lengpa vaipoh banga eipo jingu hi nang nahilou ham? 14 Ipi seibe ding um nalaija ham? Nangman khoiju leh bongnoi lonna gam natina a lah neipui hih laiyun, keiho chenna ding gam la neipe pouvin, honlei lhosohga konna ding gam lah aumpon, mingol bolla bol jing ding neigot nahlai uham? atiuve. 15 Chuin Mose chu nasatah in alunghang tan Pakai henga hitin aseije, “Alhosoh thilto’u sanpeh hih in! Amaho a konin thil neocha khat jong kalah aumpon, chule mi khat jengcha jong kasuhnat khah louhel’u ahi.” 16 Chuin Mose’n Korah kom'a hitin aseijin jing nikho teng nangma nahin, na nungjui jouse hilai mun'a nahung kikhop cheh diu, Pakai masanga nadin diu, Aaron jong hikom'a hi hung ding ahi. 17 Nangma nahin na nungjui mi jani le somnga ho jouse chun gimnamtui halnamna ding thaomei chu Pakai masang’a ahin kichoi cheh diu, Aaron thempu pan jong ama gimnamtui maicham halna ding ahin kichoiya hung ding ahi, ati. 18 Chuin amaho jousen maicham meihalna chu akilah cheh un, meikong chu ahal'un Houbuh lutna phol lam a maicham phunga chun Mose le Aaron jong ading khom lhon’e. 19 Hiche phat don laitah chun Korah in mipi tamtah ahin tildoh tan Mose le Aaron gotna pe dingin amaho jouse chu Houbuh maicham leitol lutna laitah a chun aki hom khom tauvin ahi. Hiche Pakai loupina chu mipi holah a hatah in ahung kilangdoh tan, 20 chuin Pakaiyin Mose le Aaron henga thu aseijin, 21 Mipi ho lah a kon'in kinung khindoh lhon tan ajeh chu amaho hi abonchauva gangtah a ka suhmang ding ahitai. 22 Amavang Mose le Aaron chu tollham a amai anga lhon tan, O Pakai ati lhonin atao lhon tai. Pakai, Pathen nangma hinna nei jouse sempa chu nahi. Mikhat chonsetna jeh mai maiya mijouse na suhgam jeng ding hitam? ati lhon e. 23 Chuin Pakaiyin Mose henga thu aseiyin, 24 chuti ahileh mipi ho chu seipeh tan, Korah ahin, Dothan chuleh Abiram Houbuh a konna kichon doh dingin seipeh in, ati. 25 Chuin Mose chu ading doh in Israel Upa ho jaona in, Dothan le Abiram kingahna mun a ponbuh lam achun alhai tauvin ahi. 26 Mose’n mipi ho kom'a chun gangtah in hiche migilou ho henga pat chun kikhin doh un chule nangman amaho thil ho jouse na tham khah louding, na tham khah le achonset jeh uva gotna nachan thei diu ahi. 27 Hichun mipi jouse chu Dothan le Abiram chule Korah khoilu pon in a kon'in akikhin doh tauvin ahi. Hichun Dothan, Abiram le ajite ho ahiuvin achate ho jouse jaonan khoilu ponbuh kisahna leitol a ahungun ahi. 28 Chuin Mose’n aseijin, Pakaiyin eihin sol lona pentah katoh kabol ding ho hi keima chang’a kabol theilou ahi. 29 Hiche miho hi thi ngaina a athi uva, kivui ngai bang’a akivui poupou uleh, kei hi Pakai hinsol kahi lou himai hen. 30 Ahinlah iham tia Pakaijin thilsoh thah khat abol leh leiset in akam akah a amaho chu anei agou jouseu toh aval lhum diu, chuleh kotong sung’a chu khelut ding’u ahi. Chuteng chuleh hite ho hin Pakai alunghan sah tauve tihi nahet doh thei diu ahitai ati. 31 Mose’n hiche thucheng ho seichai man loulaijin, leiset chu ahung pohkeh in amaho noilam a chun ajoplha gam tauve. 32 Korah mite jouse jong aloi agol ho chuleh anei agou abonchauvin hiche leivui chun akam akah in abonchauvin avallhum sohhe ltai. 33 Hichun amaho ahing lai pum in lhankhuh chu ajon tauvin anei agou hou jouse toh avuh khum tha tauve, chule amaho jouse chu Israel mipi te chilhah a kon'in agamla ahi tauve. 34 Mipi avel’a um jouse chun amaho ka-le-mao awgin ajah phat un atija lheh jengun; “Eiho jong leiset hin eival lhum diu ahitai” atiuve. 35 Pathen a kon'in mei ahung kong in, pasal jani le somnga chu ahalvam soh tai. 36 Chuin Pakaiyin Mose henga thu aseijin, 37 Aaron thempupa chapa Eleazar seipeh tan, amaho atheng ahijeh uchun kipat untin gimnamtui kihalna lhengkong ho chu mei-am lah a kon'in loidoh henlang, a mei-am ho jong chu thaijah tauhen, 38 hiche ahing’a chonset bol hon amanchah kilhaina lhengkong ho chu chomkhom uvin lang, maicham khuna ding asin in sem un, ajeh chu ama hon Pakai lhaina dia atodoh sau ahin athenga kisim ahi. Chuleh hiche thilsoh hi Israel chate adin melchihna hi jing hen. 39 Hichun Eleazar thempu pan mi meiyin akahvamho sum-eng lhengkong ho chu achom khom in, maicham phun khutupna sinkha din akheng tai. 40 Hiche hin Israel mite jouse asuhchih ding, koi hita jongleh nganse’a um Aaron insung mite hilou chun Pathen angsung’a gimnamtui hal dia lut lou diu ahi. Ajuilou chu Korah leh achilhah te banga um ding ahi tihi Pakaijin Mose kom'a aseisa ahitai.

41 Ahinlah ajing nikhon Israel mite chun Mose le Aaron chu a oimo pan kit tauvin, “Nang nin Pakai mite nathat lhon’e” atiuve. 42 Hiti chun mipite ho chun Mose le Aaron doudalna a, Houbuh sung ano khum kigot laitah un Pakai loupina chu ahung kilang doh in, meibol in ahin tom tai. 43 Mose le Aaron chu ahung lhon tan Houbuh masang’a ading lhon tan ahi. 44 Chuin Pakaiyin Mose henga hiti hin aseijin ahi. 45 Hitobang mihem ho lah a kon'in kikhindoh lhon tan keiman amaho abonchauva ka suhgam diu ahitai. Mose le Aaron chu tol’ah abohkhup lhon tai. 46 Chuin Mose’n Aaron kom'a aseijin nangman gangtah in maicham mei khat chu la inlang, Houbuh maicham sem inlang amaho din Pakai toh kihoucham loijin, ajeh chu gamna hise akipan tai. 47 Aaron in Mose seibang chun abolin mipi te lah achun alhai lut in, gimnamtui ahal in mipi ho a din kilhaina abol in, alangsa gamna hise chu suh tang dingin agoi. 48 Aaron chun mihem athi leh ahingho kikah ah palaijin adingin hichun pul chu atang tai. 49 Ahinlah pasal sangsom-le-sangli leh jasagi chu athigamhel man tan hichu Korah chung chang jeh a thi ho kisim thalou ahi. 50 Thina hise chu atan phat in, Aaron jong Houbuh lutna kom'a Mose heng lam chu ahin jon tan ahi.