1 Pakaiyin Mose henga aseiyin, ✡Potdohbu 25:31-40; 37:17-24 2 “Aaron in hiche hilchahna ho hi pe in: Thaomei khom sagi chu atunna a na tundoh tengleh, amalam a thaomei khom mailah chu asalvah jouna dingin tungdoh in.” 3 Aaron in chuti chun aboltan ahi. Thaomei khom sagiho chun amailam salvahna din Pakaiyin Mose henga asei bang bang chun atungdoh tan ahi. 4 Hiche thaomei khom aboncha a, akhombul apat ajem kisemna chan gei chu sana kikheng a kisemdoh ahi. Hiche hi Pathen'in Mose alim um ding dol avetsah bangtah a kisem'a ahi.

5 Chuin Pakaiyin Mose henga aseijin, 6 “Tun Israel mipi adang ho jousea kon'in Levi te tumkhen inlang, chonna dan ngai bangin sutheng sohkei in. 7 Kisuhtheng na twi chu na thinkhum ding, amaho apumpi uva atahsa uva amul jouseu kivoumui diu chule amanchah jingu apon hou akisoptheng diu ahi. Hitia chu aboltengu leh chonna dol a athenga ahi tauve. 8 Bongchal gol khat leh lhosohga maicham a konna changbong Olive thao a kisunom chip chep, chule bongchal golkhat mama toh chonset kilhaina maicham a dinga ahinto dingu ahi. 9 Chuteng Israel nam mite jouse chu nakhop khom a Houbuh kot phunga um dia Levi te chu na pehdoh ding ahi. 10 Pathen na dinga Levi te chu na pehdoh tengleh, Israel miten amaho chunga chu akhut u angap diu ahi. 11 Aaron in akhut teni adopsanga Israel mipite lah a konna Levi te chu Pathen a dinga atumbeh a katdohna anei ding, hitia chu Pathen lhacha natong dinga lhandohna anei ding ahi. 12 Hiche jouteng chule Levi te jousen bongnou achal ni chunga khut ngapna anei diu, bongchal nou khat chule chonset maicham kisem chu pumgo maicham kisemna ding ahin, Pathen henga Levi te chun kisuhthengna anei diu chamdel a um diu ahiye. 13 Aaron le achaten Levi te chu amaho masanga adinsah uva, akhut u adopsang jou tengu leh Pathen masanga loupi tah a maicham asempeh diu ahi. 14 Levi te chu Israel mipi te lah a konna natum khandoh diu, ajeh chu amaho keija um jing diu ahi. 15 Hichengse kichai teng, Houbuh sunga chu lut diu anatoh diu ijakai ajom thei diu ahitai. Ajeh chu Pakaiyin amaho chu asuhthenga na pehdoh ahitan nangma henga loupi tah a na pehdoh ahitai. 16 Israel mipite dingin Levi te hi keima dinga kikoisa ahi. Amaho hi Israel te chilhah apeng masa pen jouse khel'a kangeh ahin. Amaho khel'a Levi te kakilah ahitai. 17 Israel mipite lah a peng masapen mihem pasal ahin gancha hijongleh keima a ahi sohkeiyin, Egypt mite pasal chapa masapen jouse kana suhmang nia pat chun keima dinga kana gontupsa ahitai. ✡Potdohbu 13:2 18 Levi te phung hi keiman Israel te lah a chapa peng masa penna kakoi ahitai. 19 Aaron le achate ho hi Levi te vetup dinga kisem ahitai. Israel te thakhel a maicham Houbuh a kintheng natong ding ahiuvin, pumgo maicham a kisuhthengna kin thenga ana tong le ding mong mong ahiuve. 20 Chuti chun Mose, Aaron chule Israel mipi jousen Levi te chu alhengdoh un Pathen'in amaho thu apeh dungjuijin abol tauvin ahi. 21 Levi ten achonset nau chu aki soptheng uvin chule aponsil ho jong aki noilhah un Pathen masanga loupi tah in maicham asempeh tai. Aaron in amaho chu athenselna ding uvin maicham abolpeh in ajeh chu Pathen toh chamdel'a aumna diu ahiye. 22 Chuteng Levi te chu Houbuh maicham’a sunglha diu kintheng natoh apat diu, Aaron le achaten akithopi diu ahiye. Amaho thunit dinga kipat jouse Pathen'in Levi te jui dinga Mose ahin hetsah ho chu anit sohkeiyun ahi. 23 Chuin Pakaiyin Mose hengah hiti hin aseiyin ahi. 24 Hiche dan hi Levi ten anit diu: kum-somni le nga alhin tengu leh Houbuh sunga chu kintheng natoh apatna diu, 25 chule Levi te chu kum-somnga alhin teng ule kichol thei ding ahi tauve. 26 Levi te chu akichol joulam teng ule a Levi chan khompiho khel a Houbuh vengtup a jong pangthei nalai diu, hinlah anatong jinglaiho banga vang pang thai talou diu ahi. Hiche hi Levi te kiman ding dan napeh ding chu ahi.