JOHN
JOHN LEKHA THOT NINA
Kot khah'in
Lemna melchihna koilou ding phat
2 John lekhabu sung thu umdan
John hin Christian ho chu alhangpia itahsan-u thudol ijaseplou hoa kon'a kichih thei dingin hilchahna aneiye (chang 8). Ngailutna nei hinkho kiti hi hetkhenna beiya hinkho man ding tina ahipoi. John hin Christa thutah seilou ho chu na inuva jong lhunsah hih'un, ahilouleh kamphan jong lhadoh hih un (chang 10), ati. Hiche lekhathot hi Pastor natoh anatongsa jaumtah khat in Pathen thuseiho athusei ule athilbol-u Pathen thutoh kilhonlou hoa kon'a kichih thei ding thudol-a hilna, eineinau ahi.
Lekhathot ajihpa le ajih kum
Ngailut John, Gospel John le 1 John jihpa, hin AD 90 vel'a anajih ahi.
Lekhathot kijihna lo
Ngailut John hin thuhillhem hon chuphat laiya Christian ho chu lamdihlouva apuilonle louna diu le akichih theinadiu, chule amaho akilhep lhahsah louna diuva anajih ahi.
John hin hiche lekhathot ajih-lona ajeh pentah chu, Lhagaova kum upa tah khat hina'a lhagaova achate huhbit'a aumdiu chule thuhil dihlou hoa kon'a akichih theina diuva hiche lekhathot hi anajih ahi. Hiche Pathen Hu Haikhum lekhathot hi, Gospel Thutah avel geldohkit uva chule thuhillhem chu ipiham ti ahetuva, akichih theina diuva ajih ahi.
1
Salam thu
1 Hiche lekhathot hi upa John a kon ahi. Keiman thutah'a kangailut, lhendoh numei Ja-umnu le achate chule keima jengseh hilouva, thutah heho jouse hetdia jong kajih ahi. 2 Ajeh chu thutah chu isunguva chenga chule eihotoh atonsot a umjing ding ahi. 3 Pa Pathen le Achapa Pakai Yeshua Christa a hungkon–ngailutna le thutah'a ilah uva umjing ding, Lungset, hepi, chule Cham-lungmon chun naumpi jinguhen.
Thutah a hin ding
4 Pa chun athupeh bang tah a nachateu phabep thutah dungjuiya hinkho aman jal'in kakipapi lheh jenge. 5 Keiman nangma numei ja-umnu kahin geldohsah naa kajih ahi, eiho khatle khat kingailua ium dingu ahi. Hiche thupeh thah ahipoi, hinlah atil abul'a pat'a inanei jingu chu ahi.✡Jn 13:34; 15:12,17 6 Ngailutna kitihi Pathen in eithupeh u hiya ahi. 7 Hiche kaseina jeh chu, vannoiya hin milhemlha tampi asohdoh tauve. Amaho chun Yeshua Christa hi tahsaphea hung tahbeh ahi ti asei le pouve. Hitobang mi chu milhemlha le Christa dou ahi. 8 Kihong phauvin, hahsatah a nahin neidoh u chu namansah louna dinguvin. Chingtheiyun, chutileh abulhingset a tohman namu dingu ahi. 9 Koi hijongleh hiche thuhila kona vahmang ho chu Pathen to kijopmat lou ahiuve. Hinlah koi hijongleh Christa thuhila umjing ho chu Pa le Chapa to kigui jop jingna nei ahitai. 10 Koiham khattou hijongleh nakikhop khom nauva ahunga Christa thuhil thutah chu akalea ahil leh hitobang mi chu na in'a kou hih in, ahilouleh tilkhouna ima neihih un. 11 Hitobang mi ho tilkhouva chu koi hijongleh anatoh phalouva chu chan aneikhomu ahitai.
Salam chaina
12 Keiman nangho koma thutampi seibe ding kanei nalaiye, hinlah keiman lekhapeh le lekha-twiyin kajih nompoi. Ajeh chu keiman nangho hung muloi ding kakinepna ahi. Chule kimaitoa nangho to kihoulim ding kanom'e. Chutengleh ikinepnau chamkim tante. 13 Pathen lhendoh nasopinu chatea konin chibai kahinpeuve.
DRAFT COPY