JOHN
JOHN LEKHA THOT THUMNA
Kot hongin
Kilemna hettheina chu tahlangin
3 John lekhabu sung thu umdan
Jindot them hi Pathen in agelkhoh tah khat ahi ti, hiche lekhabu nasim'a konin mudoh in nate. Hiti chun vannoiya maljin gelkhohna nei Pathen Amatah ahin, tuni geiyin Ama insung mia kipelut ho nol aneipoi. Alenggam dinga tohkhomna'a kithokhoma, pang khom dingin eideiyuve. John hin jindot themna neiding ti thudol-a athucheng manchah hi, thaneitah'a Pathen milungset kiphondohna ahi. Houbunga lhagao thilpeh jatchom chom umho, Lhagaova kipum khatna nei angaiye ti thudol-a tilkhouna eineinau jong nahetdoh ding ahi.
Hitichun, hiche lekhathot hin tahsan neisa ho chun Pathen lhacha ho athupha thupoa pang ho chu phatah'a tosotna le kipapina nei ding tilkhou ding ahi, thudol eihil uve. Hiche lekhathot hin Gospel Thu amanlut dan le ngailutna hetkhen themna nei angaina aseiyin ahi. Hiche lekhathot teni (2 John le 3 John) sim'a konin Pathen hi maljin le michom dang khohsahna nei ahi, thudol aseiyin ahi.
Lekhathot jihpa chule ajih kum
Gospel John, chule 1,2 John lekhabu jihpa ma ma hin, 3 John jong hi ajih kit ahi. Ajih hi AD 90 kichai konlam hidin ginchat ahi.
Lekhathot kijihna lo
Ngailut John hin agolpa Gaius henga athot ahi. Gaius hin Pathen thusei vahle ho phatecha ana kithopia atilkhou jal in akipapin, hinlah Diotrephes kitipa gitlou le engsetna neija Pathen soh vahle ho aphat bollou jong chu aphong doh in ahi.
1
Salam thu
1 Hiche lekhathot hi upa John a kon ahi. Keiman kagol ngaitah, Gaius, thutah'a kangailut henga kajih ahi.✡Act 19:29; Rm 16:23; 1 Crth 1:14 2 Deitah, nangma lhagaova nahat banga chu tahsa a jong nadam thei ding hi imalam jousea naphatpet ahiding kaginchat ahi. 3 Tumasang jep'a thuhila pang kholjin phabep hung kileho chun tahsan naumna le thutah'a hinkho naman thudol chu eiseipeh uvin, eikipasah lheh uve. 4 Keiman kachaten thutah ajuiyu thudol kajah'a kipana sanga lenjo adang kanei theipoi.
Pakai natong ho gelkhoh ding
5 Golngaitah, nangman nahetlou mi ahivanguva thuhila pang kholjin vahle ho nagel khohna hin, Pathena tahsan umtah nahi ti aphongdoh in ahi. 6 Amaho chun hikoma houbung jah a ngailutna neiya nanabolna thu chu aseiyuvin ahi. Hiti chun Pathen lunglhai sahnan hitobang thuhil ho ding chun thilgot pehna neijom teijin. 7 Ajeh chu amaho Pakai jal'a kholjin lea ahiuvin, chuti chun amahon tahsan neilouho koma imacha lalou ahiuve. 8 Hijeh chun eima ho tah in amaho hi ikithopiu ngai ahi, hitia chu amahon thutah thu ahilnauva amaho tohkhompi ihitheina dingu ahije.
Diotrephes le Demetrius
9 Keiman houbung henga hiche thudol hi kajih in, hinlah Diotrephes, lamkai hinomna neipahin, keiho toh imacha a chan eineikhompi nompouve. 10 Keima kahung teng ama thilbol phabep le keiho dounaa athuseiya eimosonau thuphalou aseiya aboldoh ho kaphondoh ding ahi. Aman kholjin vahle thuhil ho alhunsahlou bou hilouvin, amaho kithopina jeng jong pehlou dingin aseiye. Chule amaho chun akikhop nauva, aman amaho chu houbunga konin anodoh in ahi. 11 Golngaitah, hichepa vettoh thei ahilou hin nangma nalung lutsah hih hen. Aphabou chu juiyin. Thilphabol ho chun Pathen chate ahiu aphotchennau ahin, chule thilsebol ho chun Pathen ahet lou u ahi ti Thutah'in hettoh sahna aneibouvin ahi. 12 Amitakip in Demetrius aseiphauvin ahi. Eimaho tah in hitima chu ama chung chang thu iseitheiyu ahi, chule keihon thutah kaseiyu nanghon naheuve.
Salam chaina
13 Keiman seibe ding tampi kaneiye, hinlah keiman hichu lekhathot'ah kahin sei nom poi. 14 Ajeh chu nangma toh kimaitoa kimuto vahding kakinemin ahi. Chuphat leh kimaitoa ikihoulim ding ahi. 15 Cham-lungmonna in umpiuvin. Hiche muna nagol hon chibai nahin peuve: Keima tah in chibai kahin bolna hi chuche muna umho henga achang cheh'un seipeh'un.
DRAFT COPY