2 KINGS
LENGTE LEKHABU
NINA
2 Kings Lekhabu Sung Thu Umdan
Thusim kigom khom munli hi abih-bih chan akikhenin ahi. Hichu 1 Samuel’a akipanin 2 Kings a akichaije. Alhangpi'n nam sunga kilamkaina thu jeng ahi. Lamkai ho thusim chedol chu lengte thu jeng seh hilouvin, themgao ho leh aseijui ho jaona ahi. Chule Themgao ho chun 1 le 2 Kings lekhabu sunga hin thucheng sang-nga le jakhat le somni le gup aseidoh un, lengte vang chun sangli le jaget le somni le nga aseidoh uve. Hijeh chun thusim hi gamsung thu jeng hilouvin, dengchang tah a Pakaiya kon thupolea pang ho thuseidoh jong ajaovin ahi.
Lekhabu kipatna lam hi, Themgao ni makaina ahin: Amasan Elijah natoh le ijakai matah in akichaijin; ani channan Elisah in amite chu anung kouvin, Pathen dihtah chu ahousah un ahi.
Lekhabu Jih Chule Akijih Kum
Koipen in ajih ham ti hetdoh ahahsan ahi. Hinlah khanglui laija pat chondan toh kilhon'in, themgao ho lah a phabep chun hiche abih-bih a kihom khen lekhabu hi anajih u ahi tihi alhangpia pomdan ahi. Koiyin anajih hita jongleh, hiche phat laiya thusim chedol akon hetchet bailam pen chu ahi (I Kings 11:41; 14:19, 29). 2 Kings Lekhabu hi 853 le 562 BC sunga kijih ahi.
Koi Henga Chule Ipi Dinga Ana Kijih Ham?
Israel chate Babylon a kon akitol uva, Israel le Judah Thusim chintup a aum jing na ding ahi. Kitah louna a kon thilsoh chung chang ahin, chule suhkhelna akon kihilna ding ahi.
1 Samuel apat 2 Kings sung thusim hopli sunga hin, themgao somni le khat hoa kon thu kiseidoh aum'in ahi. Themgao dihtah keo hilouvin, themgao lhem jong ajaovin; kimkhat chu aminthang uvin kimkhat ma chu pannabei, akum lhing le chapang chule numei le pasal jaona ahi.
1
Elijah In Ahaziah Lengpa Akimaitopi
1 Ahab lengpa thi jouvin, Moab ten Israel dounan gal ahin sat uvin ahi.
2 Nikhat Israel te leng thah, Ahaziah chu Samaria khopi inchung dan kalbia kon'in ahung kitang-lhan akiha suhkhah lheh jengin ahi. Hijeh chun aman Ekron gam mite semthu pathen Baalzebub hou-in’ah mi asol'in, kadam doh jou ding hinam tin agadoh sah in ahi.
3 Ahin Pakai vantil khat in Tishbe a konna hung Elijah kom’ah – “Chen Samaria lengpa thupole ho khu gakimaito pin lang hitin gaseipeh in, “Israel lah a hi Pathen umlouva hitam? Nangma ipi dinga Ekron semthu pathen Baalzebub kom’a leng damdoh ding leh damdoh louding donga nache ham?” tin gaseipeh tan ati. 4 Tun, hijehchun, Pakaijin hitin aseije, “Nangin nalupna najalkhun na dalhah louding nathiden tei-tei ding ahitai,” ati. Hiti chun Elijah achen hichu aga seipeh tan ahi.
5 Hichea thupole ho chu lengpa kom agalhun phat un “I-atileh gang tah a nahung kilekit u hitam?” tin adongin ahi.
6 Ama hon adonbut un, “Mikhat kakom uvah ahungin nangho kilekit uvin lang hiche thu hi lengpa kom’a seipeh un eitiuvin ahi,” chuleh Pakaijin hitin aseije – “Israel te lah a Pathen umlou hija Ekron gam’a semthu pathen Baalzebub kom’a na damdoh ding le na damdoh louding donga nache uham?” atipeh uvin ahi.
7 Lengpan adongin “Ama chu itobang mihem ham? Chule alim chu itobang ham?” tin ana ledoh kit in ahi.
8 Ama hon adonbut un, “Ama chu asam asaovin chuleh akongah savun konggah akigah e,” atiuve.
Hichun lengpan jong, “Tishbe a konna Elijah hichula em?” ati. ✡Matt 3:4; Mk 1:6
9 Hijou chun aman sepai lamkai khat chu asepai somnga toh, Elijah man ding chun asol tan ahi. Ama hon molchung khat a atoupet agamu uvin ahi. Sepai lamkaipan ama kom’a chun, “Pathen mipa lengpa thupeh dungjuijin hung kumlhan kilhon uhite,” ati.
10 Ahin Elijah in sepai lamkaipa kom’a, “Keima Pathen mi kahileh vanna kon'in meikong hung lenglhan tin nang leh namite somnga chu sumang hen,” ati. Hichun vanna kon'in meikong ahung lenglhan amaho chu athat gamtan ahi. ✡Lk 9:54
11 Hijeh chun lengpan mi somnga toh sepai lamkai khat ma asol kit in, sepai lamkaipa chun “Pathen mipa lengpan hung kumlha loihen ati,” aga tin ahi.
12 Hichun Elijah in adonbut in, “Keima Pathen mi kahi leh vanna kon'in meikong hunglha henlang nang le namite som nga chu sumang hen,” ati. Chuti chun vanna kon'in meikong ahung lenglhan amaho chu athat gam kittan ahi.
13 Avellin lengpan jong athum channa in sepai lamkai khat mi somnga toh asol kit in ahi. Ahin tuvang'in sepai lamkaipa chu molchung'ah akal touvin Elijah kengbul’ah akhup boh in achun akom’a chun ataovin, “Vo Pathen mipa, kei leh nasohte mi somnga ho hi nei hinghoi teiteijun. 14 Ven vanna konna meikong hung lenglha chun mi loini chu athat gamtan ahi. Tunvang lungset tah in nei hinghoi teijun!” atin ahi.
15 Hichun Pakai vantil khat in Elijah kom’ah hitin aseije, “Ama hitoh kumlha khom lhon'in, ama hi kicha hih in” ati. Hiti chun Elijah akipatdoh in ama chutoh lengpa kom’ah chun achelhon tan ahi.
16 Elijah in lengpa kom’a chun, “Pakaijin hitin aseije nangin ipi bolla Ekron mite semthu pathen Baalzebub kom’a na damdoh ding le na damdoh louding thu donga nasol ham? Israel te lah a Pathen umlou hitam? Hitia hi nachon jeh in tua nalupna hi na dalhah louhel ding ahitai; chuleh nathi tei-tei ding ahi.” atipeh tan ahi.
17 Hiti chun Pakaijin Elijah mang chan aseidohsa athutep bang-bang chun Ahaziah chu athi tan ahi. Ahaziah chun ama goulo ding chapa aneilou jeh chun asopipa Joram chu ama banin leng ahung chang tan ahi. Hiche hi Judah leng Jehoshaphat chapa Jehoram leng vaihom kumni channa thilsoh ahi.
18 Ahaziah vaihom sunga thilsoh dang ho chu Israel Lengte Thusimbua chun akisunlut in ahi.
DRAFT COPY