1 Hichehi Messiah Jesu Christa, Pathen Chapa thudola kipana thupha chu ahi. 2 Isaiah Themgaovin anasei: “Veuvin, keiman namasanguva thupole kahin solle. Aman lampi nagonpeh diu ahi. ✡ Malachi 3:1 3 Ama chu ahi gamthip a aw samginga, ‘Pakai hungna ding lampi semtoh-un! Amadin lampi sutheng un!’ tia chu,” anati bangin ahung kipanin ahi. ✡ Isa 40:3 4 Hiche thupole chu Twilutsah John chu ahi. Ama chu gamthip ah aumin chule mihon achonset kisihnau chule ngaidam channa dia Pathen ang akiheilutnau vetsahna dinga baptize achan diuvin thu ahilin ahi. 5 Juda gam jouse, Jerusalem mite jouse chutoh, John muding le thusei ngai dingin acheuvin ahi. Chule amahon achonsetnau aphondoh phat un, aman Jordan Luiyah baptize achansah in ahi. 6 Akivonna chu sangongsang mul pon ahin, savun konggah-in akong ageh-in, chule a-anneh chu khaokho le gam khoiju ahi. ✡ 2 Lengte 1:8 7 John'in, “Koiham khat hungvah ding ahitai, Ama chu keima sanga lenjo-kei sanga lenjo cheh hiding, keima akengchot khao sutlham dinga jong lom kahipoi. 8 Keiman twiya baptize kachansah nahiuvin, ahivangin Ama chun nangho Lhagao Thenga baptize nachansah dingu ahi!” ati.

9 Nikhat Galilee gamsunga Nazareth khoa konin Jesu ahungin, Jordan luiyah John khut'in baptize achangtan ahi. 10 Chuin Jesu twi lah-a konin ahungdohin, van akikehson Lhagao Theng vakhu bangin achungah ahungchui. 11 Van'ah aw ahung gingin: “Nangma kachapa deitah nahi, nachungah kalung alhai tangeiye,” ati. ✡ Semtilbu 22:2; Labu 2:7; Isa 42:1; Matt 3:17; 12:18; Mk 9:7; Lk 3:22

12 Chuin Lhagaochun gamthip'a apuimang paiyin, 13 Chua chun ni somli Satan lhep patep in aumin, gamsaho laha aumin, vantil hon avengkol un ahi.

14 Phat chomkhat jouvin John songkul'a akhum jouvun, Jesu Galilee gamah achen, Pathen Kipana Thupha ahillhanglen, 15 “Pathen phattep ahung lhungtai,” tin asampeh in, “Pathen Lenggam chu anaitai. Chonsetna kisih-unlang, Kipana Thuphahi tahsanun!” atin ahi. ✡ Matt 3:2

16 Nikhat Jesun Galilee Dillen pang ajotpana ah ngaman'a kivah le nehhol, Simon le asopipa Andrew chun dillen a ngamatna len anase lhon agatohkhan ahi. 17 Jesun akoudohin, “Kanung hinjui lhonin, keiman miho matje nahil lhon inge!” atin ahi. 18 Chuin amanin alen adalha lhonin anung ajuipai jeng lhontai. 19 Chuin twipanga kon themkhat ache chon jepleh Jesun Zebedee chapateni, Jacob le anaopa John chun kongsunga len anakhuiphat pet lhon amun, 20 Amani chu akouvin ahile, amanin apau Zebedee toh kongsunga um thaloa agoihou chu adalha lhonin ajui lhontai. 21 Jesu le akilhonpiho Capernaum khopiah achelut'un ahi. Cholngahni ahung lhunchun houin'ah acheuvin, hiachun thu ahil pantan ahi. 22 Aman danthu sunho banga hillouva, thuneitah banga ahil jeh'in miho chun athuhil chu kidang asalheh-un ahi. ✡ Matt 7:28,29

23 Chuin hetloukah'in lhagao-boh vop mikhat houin'ah anaumin, ama chun ahinsampaiyin, 24 “Nazareth Jesu, Ipi dinga kalah'uva hung kikum nahim? Keiho suchimit dinga hung nahim? Nangma koi nahi kahenai—Pathen Theng chu nahi!” ati. 25 Jesun amachu aphoh-in, “Thipmin! Amaa kon chun hungdoh'in,” tin thu apen ahi. 26 Chuin lhagao-boh chun mipa chu aheh-in, hapen in apengin ahung potdoh tai. 27 Mijousen kidang asauvin, thilsoh chungchanga chun khat le khat akidongun ahi. “Hiche hi ipi kihilna thuthah hikit hitam? Itobang thuneina hitantem! Lhagao-boh jengin jong athupeh angaiye!” atiuvin ahi. 28 Jesu Christa thu chu Galilee gamsung pumpiah akithangsoh pai jeng tan ahi.

29 Kikhopna in chu Jesun Jacob le John toh adalhah jouvin Simon le Andrew in'ah alut un ahi. 30 Chua chun Simon nupanu chu khosih dammon analum e. Amahon adammo thu chu Jesu ahetsahpaiyun ahi. 31 Hichun amanu koma chun achepheiyin akhut in atuh-in, akaithouvin atousah tai. Hichun akhosih chun alhatan, chuin amanu chu amaho nehding semin apangtai.

32 Nilhum jou nilhah-in mihon ana-damlou le thilhavop ho chu Jesu komah ahin puiyui. 33 Khomite jouse chu ave din kotkhah phunga akitit dimsoh jenge. 34 Chuin Aman hivei chom chom veiya damlou mi tamtah adamsah'in, chule thilha tamtahma adeldoh'in ahi. Hinla Ama Christa ahi chu thilhahon ahet'u ahijeh-in thilhaho chu apaodoh sahpoi. 35 Khovahlhah masang ajing jingkah-in Jesu athouvin, apotdohin gamthip munah achen, chua chun taona agamangin ahi. 36 Chomkhat jouvin Simon le aloiho apotdohun, chuin agamudoh tauvin ahi. 37 Amudoh phatnun ajah-a, “Mijouse hinla Nang nahol cheh-un,” atiuvin ahi. 38 Jesun adonbut in “Khopi danga jong kahillhangle theinadin cheute, hiche dinga chu hung kahi,” ati. 39 Chuin Galilee gamsungseah achelen, akikhopnau intin'ah thu ahillhanglen chule thilha adeldohpeh in ahi. ✡ Matt 4:23; 9:35

40 Chuin miphah khat Jesu hengah kijendamsah dingin ahungin, adilsun, ajah-a, “Nalung ahileh neidamsah'a neisuh theng thei ahi,” ahung titai. 41 Athusei chun alung atohkhah behseh jeh'in, Jesun akhut alhangin athamin, “Kalung ahi,” atitai. Chuin, “Damthengtan!” ati leh, 42 Apetpet'in aphah chu aphapai jengin, adamthengtai. 43 Chuin amapa chu khamgahna aneiyin asoldohtai. 44 “Hichehi koima komah seidoh hih in. Hisang chun thempu koma chen lang gakivetsah'in. Mose dan thupehsa dungjuiya phah kijendamhon maicham thilto apeh ding dol chu choiyin lang gapetan. Hichu nadam thengna mipi het'a phondohna hiding ahi,” tin thupeh aneiyin ahi. ✡ Thempu Dan 14:1-32 45 Ahivangin amapa apotdohin, thil-umdol chu aseiphongle tan ahi. Hichea kon chun Jesu chu mipin aumkivelle jeng tan, hijehchun lhangphongin khopi sungah alut thei tapoi. Hichun munthip thip lah-a aumjotan, ahijeng vang'in muntina konin mipin ahin jonlut jing nalaiyui.