1 Jesu chu suhlou chang umna loujaova, cholngah nia aseijuite toh ahopa nauvah agilkel tauvin, hijeh chun amahon suhlou changvui chu amal lhauvin ane pan tauve.✡Danbu Ni Na 23:25 2 Hinlah Pharisee ho phabep in amaho um chan amuvin chule nopmo sahna aphongdoh un, “Ven, na seijui ten cholngah nikhoa suhlou changvui amal'u hin dan apalkeh uve,” atiuve.

3 Jesun ajah uva, “Nangho Pathen Lekhabu simkhalou nahiuvem? David in agilkel pet a chu akilhonpi hotoh ipi abol uvem?✡1 Samuel 21:1-6 4 Ama Pathenin a alut in chule ama leh aloihon dan apalkeh uvin, thempu ho bouvin aneh ding uva kiphal changlhah theng chu ane uvin ahi.✡Thempu Dan 24:9 5 Chule Mose danbua Thempu Hou-In a lhacha hon cholngah nikhoa na atoh thei diu phal ahi chu simdoh khalou nahiuvem?✡Minbu 28:9,10 6 Ka seipeh nahiuve, Hou-In sanga lenjo khat hichea aum e. 7 Hiche Pathen Thubun asei, ‘Keiman kilhaina thilto hilouvin, khotona nanei diu ka deijoh ahi,’ tihi ipi kiseina ahi nahetdoh'u hileh themmona neilou Ka seijui ho themmo na chan lou diu ahi.✡Matt 9:13; Hosea 6:6 8 Ijeh inem itileh Mihem Chapa chu cholngah nikho chunga Pakai ahiye,” ati. 9 Chutah in Jesun akikhop nau in chu ajon paitai.

10 Chumun a chun khut ngoi khat amudoh in ahi. Pharisee ho chun Jesu adong un, “Cholngah nikhoa ana damsahna chu dan in aphal em?” atiuve. (Amaho chun Aman aphal'e tin seihen lang Ama themmo chansah na kinei hen atiu ahi). 11 Chuin Aman adonbut in, “Nanghon kelngoi khat twikul a cholngah nin lhalut hen lang hileh, lahdoh tei ding nagon lou diu ham? Thon moa nagon diu ahi.✡Lk 14:5 12 Chule kelngoi khat sanga mihem khat ichan geiya lujoa hitam? Tahbeh in cholngah nikhoa mikhat in thilpha abol ding chu dan in aphal ahi,” ati. 13 Chutah in Aman mipa jah a chun, “Nakhut domin” ati. Hiti chun aman jong akhut adomin ahileh adamtai. 14 Chuphat in Pharisee ho aki khom uvin, Jesu chu iti tha ding ham ti tohgon anei tauve.

15 Hinlah Jesun ipi agonu ahen, hiche mun chu adalhan chule mi atama tamin anung ajuitai. Amaho lah a ana damlou jouse aboldam in ahi. 16 Hinlah aman amaho chu koi ahi aphondoh louna ding un ahil chah in ahi. 17 Hiche hi Isaiah thusei Ama chunga agui lhunna ahi. 18 Ka lhacha Ka lhendoh hi ven, Amahi Ka cha deitah, Ka lung lhaina tah ahi. Keiman Ka Lhagao achunga kakoi ding, chule Aman chitin namtin lah a dih tah a thu atan ding ahi.✡Isa 42:1-4 19 Aman doumah abollou ding, kisenlou ding, jalah a awsanga thu aseilou ding ahi. 20 Aman pumpeng chip jong aheboh pailou ding ahilouleh khoilu thaomei kihal khu athamit pailou ding ahi. Aman thudih a thutan chu jona aumsah kahsea ding ahi. 21 Chule Amin chu vannoi pumpi kinepna hi ding ahi.

22 Chujouvin lhagaoboh vop khat, ama chu mitcho le pao theilou ahin, Jesu koma ahin pui tauve. Ama chu adamsah in ahileh thu asei theiyin chule kho jong amu tai. 23 Mihonpi chun adatmo uvin chule adong tauvin, “Hiche Jesu hi David Chapa Messiah chu hi talou ding ham?” atiuve. 24 Hinlah Pharisee ho chun thil kidang kibol thu ajah phat un, aseiyun, “Aman lhagaoboh ho anodoh datmo hih un. Aman athaneina hi lhagaoboh ho lengpa Satan thahatna a kon ahibouve,” atiuve.✡Matt 9:34; 10:25

25 Jesun alunggelu ahen, chuin adonbut in, “Lenggam ama le ama kidou amahthah ji'n, chule khopi hihen insung hijongleh akidou chan chu ding joulou ding ahi.” 26 Chule Satan in Satan anodoh a ahileh, ama le ama kikhentel'a chule kidouva hi ding, alenggam chu ding doh joulou ding ahi. 27 Chule Keima Satan in thahatna eipeh ahileh nalah uva, lhagaoboh nodoh ho khula? Amahon jong lhagaoboh ho anodoh u ahin, hijeh a chu na thusei uva chu themmo nahin chan diu ahi. 28 Hinlah Keiman Pathen Lhagao jal a lhagaoboh ho kanodoh a ahileh, Pathen Lenggam chu nalah uva hung lhunga ahitai. 29 Ajeh chu Satan tobang leuva hat mikhat ina thanei tah galut a chule aneiho gachom ding koi ham? Ama sanga hatjoa bou chun ama chu akantum a chule a in chu aphet lhah peh ding ahi.

30 “Koi hijongleh Keima lama pang lou chun eidou ahi, chule koi hileh Keima toh tongkhom lou chun Keima douna a na atoh ahi.”✡Mk 9:40 31 “Ka seipeh nahiuve, itobang chonset kibol hihen chule Pathen taitomna thusei doh hijongleh kingaidam thei ahi; Lhagao Theng taitomna a thusei doh vang kingaidam louding ahi. 32 Mihem Chapa douna a thusei doh koi hijongleh kingaidam ding ahi, hinlah Lhagao Theng douna a thusei doh ho chu hiche vannoiya hihen, ahilouleh ahung lhung nalai ding vannoiya hijongleh kingaidam talou ding ahi.”✡Lk 12:10

33 “Thingphung khat chu agan aphotchet ahi. Thingphung khat chu aphat a ahileh aga pha ding ahi. Thingphung khat chu aphat louva ahileh, aga phalou ding ahi.✡Matt 7:20; Lk 6:44 34 Nangho gul chilhah ho! Mi gilouvin thupha le thudih iti nasei thei diu ham? Ajeh chu nalung uva nagel lhah chan uchu ipi hijongleh na phondoh u ahitai.✡Matt 3:7; 23:33; Lk 3:7; Matt 15:18; Lk 6:45 35 Mipha khat chun alunggel a thilpha kikhol jeh a apha chu ahin phondoh ahin chule mi phalou khat chun alunggel a thil phalou akikhol jeh a aphalou aphondoh ahi. 36 Chule hiche hi ka seipeh nahiuve, mohthu nasei chengse chungchang thu chu thutanna nikhoa napeh ding ahi. 37 Nathusei ho chun nathem chan ahilouleh na themmo chansah ding ahi.” ati.

38 Nikhat hou dan thuhil ho le Pharisee ho Jesu henga ahungun chule aseiyun, “Pu, na thuneina photchetna nangma a kon'in melchihna kidang khat kamu nom uve,” ahung tiuve.✡Matt 16:1; Mk 8:11; Lk 11:16 39 Hinlah Jesun adonbut in, “Khang gilou le chon thanghoi khang miten melchihna ahol uve, hinlah melchihna khat bou kapeh ding chu Themgao Jonah melchihna hi ding ahi.✡Matt 16:4; Mk 8:12 40 Ajeh chu Jonah ngapi oisunga nithum le janthum aum banga, Mihem Chapa hi leilai gil a nithum le janthum um ding ahi.”✡Jonah 1:17

41 “Thutan nikho tengleh Nineveh mite hung dingdoh uva, tulai khang mite hi themmo ahin chan diu ahi, ajeh chu amahon Jonah thusei phonga chun lung aheiyuve. Tun Jonah sanga chungnungjo hikoma hin aum in, hinlah nanghon lung nahei nom deh pouve.✡Jonah 3:5 42 Sheba Lengnu chu thutan nikho tengleh tulai khang mite douna a hung ding'a themmo ahin chan ding ahi, ajeh chu ama mun gamla tah a konin Solomon chihna thu ngai din ahung e. Tuhin Solomon sanga chungnungjo hikoma hin aum in, hinlah nanghon asei na ngai pouve.✡1 Lgt 10:1-10; 2 Thusimbu 9:1-12

43 “Lhagao phalou chun mikhat chu adalhah tengleh gamthip a aga chen, choldona ding ahol len, hinlah amu joupoi. 44 Chuteng aman aseiyin, ‘Keima kahung potdohna pa koma gakile kit tange ati. Hiti chun ahung kile kit in ahileh ahungdohna in chu koima ana umpon, ki theh ngim le kitup keicha aum chu amun ahi. 45 Chutah in lhagao chun ama sanga phaloujo lhagao sagi chu aga mun, chule mihempa sunga chun alut un acheng den tauve. Hiti chun ama chu masanga sangin akhohsejo cheh tai.’ Hichu tukhang gilou mite hin ahin hetchet diu ahi,” ati.

46 Jesun mihonpi henga thu aseipet in, anu le asopi pasal ho ahungun, polama aumun, akihoulimpi nom uvin ahi. 47 Chuphat in mikhat in ajah a, “Ven, nanu le nasopi pasal ho polama ading un, namu nom uve,” tin ahung seiyin ahi. 48 Hinlah Aman adonbut in chule ajah a aseiyin, “Koi ham kanu? Chule koi ham ka sopiho chu?” ati. 49 Chuin aman akhut chun aseijuite lam akoh in aseitai, “Veuvin, kanu le kasopite hohi! 50 Ajeh chu Koi hijongleh Van'a um ka Pa lunglam bol ho chu kanu, kasopipa chule kasopinu ho ahiuve,” ati.