1 Hiche laichun mipi ho chu atamlheh jeng tan chule neh ding ima aneilou jeh un Jesun aseijuite chu akouvin ajah uva, 2 “Mihonpi hi kakoma aumnau nithum ahitan, amahon neh ding ima anei pouve, 3 Chule anne louvin a inlam chan uva solleng lampia lhasampa ding ahiuve. Akimkhat hi gamla tah a kon hung ahiuve,” ati. 4 Aseijui ten adonbut un, “Hikom gamthip laiya mi hijatpi hi lhingset a vahna ding changlhah kon hoiya alah ding ham?” atiuvin ahi. 5 Jesun adongin, “Changlhah pheng ijat naneiyum?” ati leh, “Pheng sagi aum e,” atiuvin ahi. 6 Chuin Aman mihonpi chu tolla tou din asolin, changlhah pheng sagi chu alan, athangvah-in, chujouvin ahehbalbalin a-angsung uva luipeh dingin aseijuite chu apen, amahon mipi anga chun aluipeh-ui. 7 Chule aseijui ten nga neochacha phabep khat jong aneiyun, hijong chu phatthei aboh in a-angsung uva luipeh dingin asoltan ahi. 8 Chuin amahon aneuvin, avasoh keiyun, anehmoh-u anong aval chu longkai sagi alohdoh un ahi. 9 Amaho chu numei chapang simlouvin mi sangli jen ahiuvin, anehva jouvun Jesun inlam'ah asol tauve. 10 Phat chomkhat jouvin, Ama aseijuite toh konga alutpaiyun, Dalmanutha gam alhung tauve.

11 Pharisee hon Jesu ahunglhung tai, ti ajah phatnun kinelkalpi dingin ahungun ahi. Athunei photchenna dingin van'a kon melchihna avetsah diuvin angeh un ahi.✡Matt 12:38; Lk 11:16 12 Chuin alungsungah akhoisan, “Tukhang mite hin ibol a melchihna ahol uham? Tahbeh a kasei ahi, hiche tukhang mite hi imacha melchihna kipelou ding ahi,” atitai.✡Matt 12:39; Lk 11:29 13 Chuin amaho chu adalhan, konga alut kit'in, langkhat panga dingin akipatdoh tai.

14 Hinlah aseijui ten changlhah kipoh ding ahin haimil tauve. Konga chunla changlhah phengkhat tailou adang aum hihhel in ahi. 15 Chuin Aman amaho chu ahilchah in, “Chingtheiyun, Pharisee ho le Herod chol lah a kihongpha uvin,” ati.✡Lk 12:1 16 Hiche aseiya kon chun changlhah ahin poh haimil jeh un amaho akihoulimun, akioimoto uvin ahi. 17 Akihou nau chu Jesun ahen, ajah uva, “Changlhah naneilou jeh uva ibola kioimoto nahiuvem? Tugeiya nalung uva hedoh loulai nahiuvem? Hetthemna dinga nalungu hibangloma tah lheh jeng ham? 18 Mit nei uva—mutheilou nahiuvem? Nakhang nei uva—jatheilou nahiuvem? Gel jong nageldoh lou mongu ham?✡Jeremiah 5:21; Ezekiel 12:2; Mk 4:12 19 Mi sang nga changlhah pheng nga kahoppeh a chu amoh ahal paipeh ijat nalodimum?” atileh amahon, “Som le ni ahi,” atiuvin ahi. 20 Mi sangli lah a changlhah pheng sagi kihoppeh a chu nehmoh aval longkai ijat nalodimum? atikit leh, “Sagi ahi,” atiuvin, 21 “Achutile tugeiya jong hedoh loulai nahiu ham?” atin ahi.

22 Amaho Bethsaida alhun phat un, mi phabep in mitchopa chu Jesu henglam'a ahin puiyun, chule amahon atohkhah a adamsah din angeh uvin ahi. 23 Jesun mitchopa chu akhut in atuh in, khosunga konin apuidoh tan ahi. Chuin amit a achil aset in achunga akhut angam in, “Tua hi kho namum?” tin adongin ahi. 24 Mipa chun akimvel dung aven, “Henge, miho kamun, ahinla kichentah in kamu theipoi, thingphungte chat lele tobangin kamui,” ati. 25 Chujouvin akhut in amit atham kit in, ave changmelin ahileh adamhel jeng tan, ima jouse kichentah in amu thei tan ahi. 26 Jesun ama asoldoh in, “Khosunga chun lutpa tahih in,” tin akham'in ahi.

27 Jesu le aseijui ten Galilee gam adalha uvin, Caesarea Philippi koma khoho a chun ache leuvin ahi. Lampia alamjot laiyun thu adongin, “Keima hi mihon koi ahi eitiuvem?” ati leh, 28 Aseijui ten, “Loikhat in John Baptist, loikhat in Elijah chule loikhat kit chun Nangma hi themgao ho lah a achom khat hinte atiuve,” tin adonbut uve.✡Mk 6:14,15; Lk 9:7,8 29 Chuin Jesun, “Ahileh nanghonla kei hi koi ahi neiti uvem?” tia adoh leh, Peter in, “Nangma Messiah chu nahi,” ati.✡Jn 6:68,69 30 Ahinlah Jesun koimacha koma aseidoh loubeh diuvin ahilchah tan ahi.

31 Chuin Aman amaho chu Mihem Chapan thohgimna tamtah athoh a, vaipo upaho le thempu pipuho chule dan thusun hon adoudal diu thuho aseipeh e. Chule thalih a auma, nithum jouleh thoudoh kit tei ding ahi chu ahilpan tan ahi. 32 Aman hichu phongtah a aseijuite koma asei jing laiyin, Peter in apuidoh in hitobang thu ho chu aseilou din angeh in ahi. 33 Ahin Ama akiheiyin, aseijuite aven Peter chu aphoh in, “Kanung lama chen, Satan! Nangman Pathen thulam gellouvin, mihem thulam jeng nagel'e,” atin ahi. 34 Chuin Aman aseijuiho le mihonpi chu ahenglam'a akouvin, “Nalah uva koi hijongleh eijui nom'a chun, nacham chonnauva kon'a nahung kiheiyuva, na thingpel nakiput uva, chule neijui dingu ahi.✡Matt 10:38; Lk 14:27 35 Ijeh inem itileh koi hile ahinna huhhing nom'a chun alhaso ding ahi. Amavang koi hile keima jal le Kipana Thupha jal'a ahinna lhaso a chun akihuhhing joh ding ahi.✡Matt 10:39; Lk 17:33; Jn 12:25 36 Ijeh-inem itileh min vannoi pumpi neihen lang ahinna chan taleh, ipi phatchomna anei ding ham? 37 Min ahinna khel'a ipi apeh ding ham? 38 Ijeh inem itileh koi hileh tulai chon thanhoina le chonsetna khanga keima le kathuhil jachatpi chu Mihem Chapan jong apa loupinaa vantil thengte toh ahungni leh, amapa chu ajachatpi ding ahi,” ati.