1 Nikhat hi Pharisee ho leh Sadducee ho Jesu koma apatep dingin ahungun, athuneina thudola melchihna kidang khat ahung ngeh uvin ahi.✡Matt 12:38; Lk 11:16 2 Aman adonbut in, “Nanghon janteng van asan le jingleh kho phading ahi natiuvin, 3 Jingkah a van asan le nilhuma kho phalou ding ahi natiuva nahet u ahi. Nanghon kho phat ding thua van'a melchihna a konna nahet u ahi, hinlah phat umdol amelchihna na hedoh thei pouve. 4 Khang gilou le jonthanhoi na khang miten melchihna kidang ahol uve, hinlah melchihna khat bou amaho kapeh dingu chu Themgao Jonah melchihna bou hi ding ahi,” ati.✡Matt 12:39; Lk 11:29

5 Chuche jouvin, Dillen langkhat lama agalkai phat in, seijui hon changlhah apoh lou uchu ahin geldoh tauve. 6 Jesun amaho agihsal'in, “Pharisee ho le Sadducee ho chol'a konin kichih theiyun,” ati.✡Lk 12:1 7 Amahon changlhah apoh tahlou jeh u chun khat le khat akinel den tauve. 8 Jesun amahon ipi seija ahiu chu ahen, hiti chun, “Na tahsanu alhom tave! Changlhah neilou jeh a ipi dia kinela nahiuvem? 9 Tugeiya hi nahetdoh lou uham? Mi sangnga changlhah pheng nga a kavahva chu aval paipeh ijat nalodoh u hitam?✡Matt 14:17-21 10 Ahilou jongleh mi sangli changlhah pheng sagia, chule aval paipeh tamtah nalodoh u hitam?✡Matt 15:34-38 11 Ipi iti dana changlhah chung thua kasei ahipoi ti hedoh theilou nahiuvem? Hitia hi avela kasei ahi, Pharisee ho leh Sadducee ho chol lah achun kichih theiyun kati ahi,” ati. 12 Chuphat in anunung pena, Aman changlhah a chol thu asei hilouva, Pharisee ho le Sadducee ho doha lhep lhahna thuhil aneiyuva achihthei diuva ahil chu ahedoh tauve.

13 Jesun Caesarea Philippi ahunggei phat in, aseijui ho jah a “Mihon, Mihem Chapa hi koi ahi atiuvem?” tin adong tai. 14 Amahon adonbut un, “Mi phabep chun Twilutsah John ahi atiuvin, mi phabep chun Elijah ahi atiuvin, chule adang phabepma chun Jeremiah ahilouleh themgao ho lah a khatpen hinte,” atiuve.✡Matt 14:1,2; Mk 6:14,15; Lk 9:7,8 15 Chujouvin, amaho chu thu adongin, “Nanghon koi ahi nei tiuvem?” ati. 16 Simon Peter in adonbut in, “Nangma Messiah, Pathen hing Chapa nahi,” ati.✡Jn 6:68,69 17 Jesun adonbut in, “Nangma anunnom a nahi, John chapa Simon, ajeh chu nangman mihem koima a konna nahet ahipon, van'a ka-Pan na henga hiche hi ahin phondoh ahi. 18 Na henga kasei ahi, nangma Peter (Song) nahi, chule hiche Songpi (Christa) chunga hi Ka houbung Ka tundoh ding ahi, chule Damun thaneina in ajo joulou ding ahi. 19 Chule Keiman Van gam kot heh ho kapeh ding nahi. Leiset chunga ipi hijongleh bollou dinga na thupeh chan chu van'a jong kibol lou ding, chule leiset chunga ipi hijongleh na noppeh chan chu van'a jong kinop peh ding ahi,” ati.✡Matt 18:18; Jn 20:23 20 Chujouvin Aman aseijui ho jah achun koima koma Messiah ahi chu, aphondoh louna ding uvin hatah in agihtai.

21 Chuchea pat chun Jesun aseijuite koma kichen tah in, Jerusalem a aga che ding angai khohna aseiyin, chule aman hou vaipo loi le thempu le houdan thuhil hoa konna thil tampi gimnei hahsa ho athoh ding chu ahiltai. Ama ahin tha diu, hinlah anithum lhinni leh thina a konna thoudoh ding ahi. 22 Hinlah Peter chun Ama apuidoh in chule chutia thu asei chu haphon aphoh in, “Pakai Vanin jong oiponte, hiche hi na chunga lhung hih beh jeng hen,” atitai. 23 Jesu, Peter lama akiheiyin, ajah a, “Satan, kakoma konin chemang in! Nang hi keima dinga tijat um thangkol nahi. Nangman Pathen a kon hilouvin mihem lunggel a konna navet jeh ahi,” ati. 24 Chuphat in Jesun aseijuite koma, “Nalah uva koi hijongleh eijui noma chun, nacham chon nauva konna nahung kiheiyuva, na thingpel nakiput uva, chule neijui diu ahi.✡Matt 10:38; Lk 14:27 25 Na hinkhou naki kolchah jom uva ahileh, na mansah dingu ahi. Hinlah nanghon keima jal'a nahin nau naphal doh uva ahileh, naki huhhing diu ahi.✡Matt 10:39; Lk 17:33; Jn 12:25 26 Chule vannoi apumpi nanga hihen lang, na hinna chan tale chun ipi phachom ding ham? Na hinna sanga manlujo ipi um nalaiyem? 27 Ajeh chu Mihem Chapa hi avantil teho toh apa loupina a hung ding chule mi jouse chu atoh dungjui cheh a athu u atan ding ahi.✡Matt 25:31; Labu 62:12; Rm 2:6 28 Chule Keiman thutah ka seipeh nahiuve, hikoma tupetna ding ho lah a Mihem Chapa a Lenggama ahung masanga thilou ding aum uve,” ati.