1 Israel lengpa Pekah in lengvai ahop kal kum som le sagi lhinin, Jotham chapa Ahaz chun Judah gam’ah lengvai ahin hom pantan ahi. 2 Ahaz chu leng achan chun kum somni alhingtan ahi. Aman Jerusalem’ah kum som le gup sungin lengvai ana hom’in ahi. Aman apu David khonung ajuijin Pakai a Pathen mitmu’n thilpha jeng ana bolpon ahi. 3 Hiche sang chun, Israel lengho umchan ana juijin, achapa tah jeng jong kilhaina dingin ana tohdoh in ahi. Hiti chun aman Pathen'in Israel mite masanga ana deldoh peh u Pathen neilou nam mite thet umtah thil ana bolji hou chu ana juitan ahi. ✡Danbu Ni Na 12:31 4 Aman kilhaina gantha ana bollin, doi phung leh thinglhang chunglah thingdo-eng noi tinnah gimnamtui ana lhut in ahi.

5 Hijou chun Aram lengpa Rezin leh Israel lengpa Pekah chu Jerusalem sat dingin ahungtou lhon tan ahi. Amanin Ahaz anokhum lhon'in ahinlah ana jou lhon pon ahi. ✡Isa 7:1 6 Hichelai phat tah chun Edom lengpan Elath khopi chu Edom mite dingin agalelah kittan ahi. Aman Judah te chu adeldoh in Edom mite chu-achun achen lutsah in, tuni geijin achengun ahi.

7 Ahaz lengpan Assyria lengpa Tiglath-pileser chu thu athot in, “Keima hi nanoiya um nasoh kahin, hung touvin lang Israel lengpa le Aram lengpan eihung delkhum lhon akon hin neihung huhdoh in,” atin ahi. 8 Hijou chun Ahaz in Pakai Hou-In’a kon'in sana, dangka ho leh leng inpia sum le pai kholna a kon'in sana le dagka ho achomkhom in Assyria lengpa chu athot tan ahi. 9 Hiti chun Assyria lengpan Aram mite khopi Damascus chu anokhum’in amipite chu gal hingin akaijin Kir gamsungah achen sah tan ahi. Aman Rezin lengpa jong chu athat in ahi.

10 Ahaz lengpa chu Assyria lengpa Tiglath-pileser toh kimuto dingin Damascus a achen ahi. Hilai munna aumpet chun, aman maicham phung kiboldan ho chu aven amelchih in, hijou chun aman alimdan ho chu hoitah in ajih doh in Uriah thempupa chu athot tan ahi. 11 Uriah chun lengpan ahilna ajuijin, maicham phung khat alim ahung kithot tobang bang chun ana semdoh in, lengpa Damascus a konna ahung kile tengleh avet dingin gonsan akoitan ahi. 12 Lengpa ahung kile phat in, hiche maicham phung chu aga kholchil in, hichun pumgo thilto abolpai tai. 13 Aman pumgo thilto atoh in, lhosoh thilto jong atoh in, lengpithei thilto jong achunga asunglhan chuleh maicham chunga chun chamna thilto thisan jong athe khum in ahi.

14 Hijou chun Ahaz lengpan maicham thah le lutna lampi kikah a um Pakai Hou-In maija um sum-englui maicham chu aladoh in, maicham thahpa sah langa chun achon tan ahi. ✡Potdohbu 27:1,2; 2 Thusimbu 4:1 15 Aman Uriah thempupa kom’a chun, “Hiche maicham thahpa hi, jingkah a pumgo thilto kihalna ding leh, nilhah lang’a lhohsoh thilto ho tona ding, lengpa pumgo thilto tona ding, chuleh mipite jouse pumgo thil tona chuleh lhohso thilto leh atwija kisunglha tona ding ahi. Govam thilto ho leh pumgo thilto jouse a konna athisan chu maicham thah chunga hi nathe khum ding ahi. Sum-eng maicham vang hi keima chang maicham ding ahi,” ati. 16 Uriah thempu pan jong Ahaz lengpan aseipeh bang bangin abollin ahi.

17 Ahaz lengpa chun Hou-In a kimang sum-eng kangtalai ho chengse chu aphelhan, hichea kon chun kisilna kong chu atoldoh paijin anoija kidinsah sum-eng bongchal ho chunga kon'in twikong chu adom lhan, chuin song inbul khat ah akoitai. ✡1 Lgt 7:23-39; 2 Thusimbu 4:2-6 18 Assyria lengpa lunglhai sah tei ding gotnan, Ahaz lengpan Hou-In sunga kisa, cholngah nikhoa lengte thuseina phung aladoh in, chujongleh Hou-In sunga lengpa lutna kotpi geiyin atoldoh sohtai.

19 Ahaz vaihom sunga thilsoh jouse leh aman anatoh ho aboncha Judah Lengte Thusimbu a kijihlut sohkei ahi. 20 Ahaz athi phat in David khopia apu apate kivuina mun'ah avui tauvin ahi. Hijou chun achapa Hezekiah chun ama khel'in lengmun alotan ahi. ✡Isa 14:28