SAMUEL
LEKHABU NINA
Samuel Lekhabu Nina Sung Thu Umdan
David chu athil kilhen dihlou jeh in gimna achunga ana lhungin, hitobanga ka chonna chunga jong Pathen'in ichan'a eingailut hitam? atin ahi. Alangkhat a David chu Israel te leng ahina leh Pathen toh kiguijopna neija houpa ahi, ti akihedoh in ahi. Hijeh chun David dinga kinepna aum nahlai bangin, eiho jouse dingin jong kinepna aumin ahi!
Lekhabu Jihpa Chule Ajih Kum
Samuel lekhabu nina hi, koipen in ana jih ham ti kichentah in akisei theipoi. Hinlah lekhabu kijih dungjuijin Samuel, Nathan ahilouleh Gad jih hidin ginchat ahi (1Chro. 29:29 ven). Chule hiche lekhabu hi Solomon thinung leh lenggam kihop khen jou—925 BC a kijih ahi.
Lekhabu Kijihlona
Hiche lekhabu hin Israel te thusim Saul thia pat David lengvaipoh kichai chan akiseijin, hichu 1010-970 BC sung ahi. Chule alhangpin kitahna le thungai louna jeh a thilsoh thudol akimun ahi.
1
Saul Thi David In Ahetdoh
1 Saul thi jouvin ahitin ahi, David chun Amalek mite chunga galjona anei jouvin ahung kinunglen Ziklag munnah nini sung aumden in ahi. 2 Anithum nin mikhat Saul ngahmun a kon'in von tel dehduh le aluchunga leiset nat pum in lunghem vetsahnan ahungin, David angsung'ah jana neitah in abohkhup tan ahi.
3 Chuin David in adongin, “Hoiya kon hung nahim”? atileh amapan adonbut in,
“Israel te ngahmun a kon hung jamdoh kahi” ati.
4 Chuin David in adongin, “Ipiti hitam?” “Gal umchan thu nei seipeh in” ati.
Chuin aman adonbut in, “ Sepai jouse galmun akon ajam gam uvin, mitampin thina atoh un, chule Saul le achapa Jonathan jong athi lhon tai,” ati.
5 Chuin David in gollhangpa ja ah, “Saul le Jonathan athi tai ti iti nahet ham?” ati.
6 Chuin mipan adonbut in, “Keima Gilboa Mol chungah kaga umkhan ahileh, hi ah chun Saul in a tengcha chu anaop phan chuleh agal mite sakol kangtalai ho leh sakol them hon ahin delphah kon chau chu ahitai. ✡1 Samuel 31:1-6; 1 Thusimbu 10:1-6
7 Chuin ama ahung kiheiyin keima eimu phat in ama kom adin eikoutai. Chuin keiman kadongin, iti kaki thopi ding ham kati e.
8 Hichun aman eidonbut in, 'Nang koi nahim eiti?'
Chuin keiman kaseipih in, 'Keima Amalek mi kahi kahi,' kati.
9 Hichun ama 'Kaheng'ah ataovin, hungin lang neihung that tan, ajeh chu keiman kanatna hi kathoh jou tapon hijeh chun kathi nomtai,' ati.
10 “Hijeh chun “Keiman ama chu kathat tai,” tin Amalek mipa chun David kom'ah aseitai. “Ajeh chu keiman kahet ahitai ama ahinjou tah louding chu. Hiti chun a Lallukhuh leh abanbul tomna ho kahin lan nakom'ah kahin lhut e, ka pakai,” ati.
11 Hitobang thusoh chu David leh amiten ajah doh phat un apon u abot eh un alung genthei lheh tauvin ahi. 12 Hiti chun ama hon sun nilhum in Saul chule achapa Jonathan ding, Pakai sepai ho leh Israel nam mite adin an angol'un, akap un, pul adou un alunghem un ahi, ajeh chu hiche nikho a hi amaho chemjam a thisoh ahiuve.
13 Hichun David in thu hinpo gollhang pa kom'ah chun aseitan, “Hoiya kon hung nahim?” ati.
Chuin aman adonbut in, “Keima gamdang, jatdang Amalek mi, nagam uva khosa kahi,” ati.
14 Chuin David in adongin, “Ipi tidan a nangman Pakai thaonu mikhat chu tha ding kichatna nanei louhel ham?” ati.
15 Chuin David in amiho khat pen kom'ah chun asei in, “That in!” ati. Hichun mipan Amalek mipa chu achemjam in adot in athat tan ahi. 16 Chujouvin David in aseijin, “Nang le nang themmo kichan nahi, ajeh chu nangman nakam tah a Pakai thaonu pa chu kathat tai,” nati.
Saul Le Jonathan Dia David Labol
17 Hiti chun David in Saul le Jonathan din kala asemin, 18 chuleh hiche hi Judah te jong hil ding ahi tin thupeh aneijin ahi. Hiche la hi thalpi la tin akihen chuleh hiche hi Jashar Lekhabu.a kijih lut ahi. ✡Joshua 10:13
19 Vo Israel, naloupi nau le nakipa nau chu molsang chungah athi tai!
Oh, i-atileh gal-hang mihat ho chu lhugam uhitam!
20 Gath mun'a thusoh hi seidoh hih un,
Ashkelon lamlen dungah jong phongdoh hih un,
achuti louva ahileh Philistine chanute kipah untin
chule cheptanlou ho jong galjou banga nui diu ahi.
21 O Gilboa molsang ho,
na chungah daitwi lhah dahen ahilouleh go jong juhda hen,
chule loujaova lou hon jong amuchiga hin sepdoh dauhen.
Ajeh chu mihatpa lumdal chu suhboh in aum tan;
Saul lumdal chu thaotwi nulouva um ahitai.
22 Jonathan thalpi chu nasatah ahin,
chule Saul chemjam chun na loupitah atongdoh in ahi.
Ama hon agal miteu thisan aso uvin
chule gal-hat mi hangsan ho tahsa asunin ahi.
23 Saul le Jonathan chu iti ngailut le lungset um hitam!
Ahinlai sung lhon leh athigei lhon'in aumkhom jing lhon'in ahi.
Amani hi Muvanlai sanga gangjo leh keipi bahkai sanga jong hatjo ahilhon'in ahi.
24 Vo Israel chanu te, Saul a dingin kap un,
ajeh chu ama hi ponsanthip deium man tamtah a nachun pau le
sana a najem pau chu ahi.
25 Oh, iti gal-hat miho galmun'a lhugam'u hitam!
Munsang chungah Jonathan jong athisan akijam tai.
26 Jonathan kasopipa, nangjeh in ka kap-kap jeng e!
Oh, ichan a kangailut nahi hitam!
Chule nangman nei ngailutna hi athuh lheh in,
numei ngailutna sangin athuh jon ahi!
27 Oh, iti mihat ho lhugam a!
Gal manchah ho mangsoh a, amaho athia kijam chap jeng hitam?
DRAFT COPY