1 Hiche jou chun David in Pakai chu adongin, “Judah ho khopi khat pen-pen a khu ka nungche ding ham?” atin ahileh,

Pakaijin ahin donbut in, “Henge,” ati.

Hijou chun David in adong paijin, “Hoiche pen khopia kache ding ham?” atin ahileh,

Pakaijin adonbut in, “Hebron khopi ah,” ati.

2 David jiteni chu Ahinoam kiti Jezreel mi le Carmel kho a Nabal kiti meithaipa jinu Abigail ahilhon'e. Hiti chun David le ajiteu ✡1 Samuel 25:42,43 3 chuleh ama mite ho jouse leh a insung mite jouse chutoh Judah gam lam'ah akitol uvin, Hebron khopi kom'a chun acheng tauvin ahi. 4 Hiche jou chun Judah gam'a mikhat David kom'a ahungin, amapa chun David chu Judah mite jouse chunga leng din thao ahungnui.

Hiti chun Saul vuija pang ho chu Jabesh – gilead mite ahiuve ti David in ajah doh phat chun, ✡1 Samuel 31:11-13 5 aman hiche thuthot hi anei tauvin ahi: “Nangho Pakaijin phatthei naboh uhen ajeh chu nang hon na pakai pau Saul chunga na kitahnau na vetsah un chule phatah in na-na vuijun ahi. 6 Hijeh chun Pakaijin ami ngailutna longlou chun na umpiu henlang chule kitahna neitah in nabol uhen! Chugoh hilouvin keima jengin jong na thilpha bolna chung uva kipaman kapeh ding nahiuve, ati. 7 Tun Saul athi tan, hijeh chun keima leng thah din Judah miten thao einu tauvin ahi, hijeh a chu keiman katep nahiuve Judah mite bangin keima din hangsan tah le kitah tah in pang uvin.”

8 Ahin Ner chapa Abner, Saul sepai jalamkaipa chu Saul chapa Ishbosheth chutoh Mahanaim lam ah achilhon tan ahi. 9 Chua chun Ishbosheth chu Gilead, Jezreel, Ephraim, Benjamin, Ashur mite gamsung leh Israel pumpi jouse chunga Leng din akiphong doh tan ahi.

10 Saul chapa Ishbosheth chu Israel te chunga leng ahi chun kum somli alhing tan, chule Mahanaim akon kumni lengvai ahinpo panin ahi. Alangkhat a Judah mite vang chu David a din kitah tah in aum jing jengun ahi. 11 David in Hebron chu munpi in asemin, chule Judah mite chungah kum sagi le lhagup sung lengvai anapon ahi.

12 Nikhat Abner in Ishbosheth sepai ho chu Mahanaim akon Gibeon lam apuijin ahi. 13 Hiche phat chat chun, Zeruiah chapa Joab in David sepai ho chun apuidoh in Gibeon twikul ah agakimupi uvin ahi. Chule hiche mun ah chun alang langa atouvun akigal vetto uvin ahi.

14 Chuin Abner in Joab jah ah aseijin, “Isepai teu themkhat imasang lhon'ah kidelsah hite,”

atin ahileh, “Joab jong anom tan ahi.” 15 Hichun alang toa mi som le ni cheh kidel din alhengdoh tauvin ahi – Saul chapa Ishbosheth langa din Benjamin mi som le ni, chule David langa din mi som le ni ma alhengdoh un ahi. 16 Mikhat cheh in akitopi hou sam atuh un chule achemjam un khat cheh pongpeh akisutpehto un ahileh abonchauvin athi tauvin ahi. Hijeh chun Gibeon mun hi a itih in chemjam a kidotna mun, tin akihe jing tan ahi.

17 Hiche jou chun anikho maman nasatah in akisatto uvin chule David sepai te chun Abner le Israel mite chu gal in anajou uvin ahi.

18 Chule hiche nikho chun David sepai te lah a Zeruiah chapa te thum Joab, Abishai, chule Asahel apang uvin ahi. Chule Asahel hi gam sakhinou banga jang tah a lhai thei mi ahi. 19 Chuin Asahel in Abner nung chu junjel'in mundang ima velouvin chule thil imacha jeh a kingapa louvin adel tan ahi. 20 Hichun Abner akinunghei in ahileh amapa ahung chu amutan ahi, chuin aman akou in, “Nangma Asahel nahi ham?” ati.

Chuin aman adonbut in, “eHnge keima kahi,” ati.

21 Chuin Abner in agih in, “Chen lang michom khat gakidelpin! Chule chapang khangdong jep khat chu man inlang amanchah lahpeh in” ati. Hinlah Asahel chun Abner lam chu jangkei in mun danga kiheidoh louvin ajuipeh in ahi.

22 Abner chun Asahel chu ahinsam kit in, “Hiche mun a kon kihei mangin! Keiman nangma katha nompoi. Akhuti leh iti na sopipa Joab mai kamu kit ding ham”? Ati.

23 Ahin Asahel chu ama a kon kiheimang ding anom dehpon, hijeh chun Abner in Asahel oipoh laitah atengcha bul geijin asun lhum'in ahileh atengcha chu anung langah apaidoh leuvin hichun amun maman alhun athiden tan ahi. Chule koi hileh hilai mun hinpha a Asahel thi muchan chu akinga un ading den tauvin ahi.

24 Chuin Joab le Abishai in itabong thilsoh ham ti ahetdoh lhon phat in, Abner nung adel pai lhon tan, ahin Gibeon gamthip jotna lampi, Giah kom Ammah molsang agei lhon'in nisan alhum den lhon tan ahi. 25 Benjamin phungmi Abner sepai ho chu akithah gopkhom kit un molsang chungah chun apang tauvin ahi.

26 Chuin Abner in Joab chu ahin sam in, “Eiho khat le khat ikitha to jing diu hitam? Achaina lung jinna jeng ahi hi n ageldoh loulai uham? Itih tah leh namiteu chu nasopi Israel te nung ahindel nauva kon nakham gah dingu hitam?” ati.

27 Chuin Joab in ahinsei in, “Pathen bouvin ahei ipiti ding ham nangman ima nahin seilou hileh, ajeh chu keima hon jan khovah hella kahin del thei u nahi.” 28 Hichun Joab in saki chu amut gingin ahileh amite jouse chu ading den un Israel sepai te chu adel tapouvin ahi.

29 Chuche jan chun Abner le amite chun Jordan phaicham chu ajot peh un, Jordan vadung chu agalkai un chule jingkah geijin achejom jingun Mahanaim alhun kahseuvin kinga louvin ana chejom jingun ahi.

30 Hitobang tah chun, Joab le amite jong inlam akile tauvin ahi. Chule Joab in amite athiho chu ahin simtan ahileh mi 19 le Asahel alhahsam chu ahin mudoh tan ahi. 31 Ahinlah Abner mi kithat jat chu 360 ahi, chule amaho chu abon uva Benjamin phunga kon ngen ahiuve. 32 Chuin Joab le amite chun Asahel long chu Bethlehem lamah apuvin apa lhankhuh ma achun avui tauvin ahi. Chujouvin amaho jankhovah keiyin akitolun jingkho ahungvah in Hebron alhung tauvin ahi.