1 Hiti chun Nathan themgaopa chu Pakaijin David kom'ah asol tan ahi: Hichun Nathanin jong David kom'a hitin aga seiye, “Khopi sung khat a hin pasal ni acheng lhon'in, khatpa chu mihao ahin, khat jopa vang chu mivaicha ahi. ✡Labu 51 2 Hichun mihaopa hin kelngoi hon tamtah le bonghon tampi aneijin ahi. 3 Ahin mivaichapa vang chun imacha aneipoi, ahin aman alel-lel a akichoh kelngoipi khat seh-seh aneiye. Hijongleh aman akelngoipi chu akivah vah in achate toh phate chan avah in ahi; kelngoipi hin ama changlhah aneh ding an jong aneijin, adon ding twi jong ama khon sunga kon'in adonji e; chutengleh a angsunga alumjin, achanu tobang bangin aum tan ahi. 4 Hiche lai hin kholjin mikhat mihaopa kom'a chun ahunglhungin ahileh, hiche kholjinpa thapeh ding chun mihaopan jong ama kelngoi hon lah a khattou thapeh ding jong a-ittan, chule ama bonghon lah a konna khattou thapeh ding jong a-it tai; ahin mivaichapa kelngoipi khat seh anei chu aman in akom'a hung kholjin pa ding chun atha peh tan ahi,” ati.

5 Chutah chun David jong alunghangjah jengin hiche mihaopa douna chun Nathan themgao kom'a chun hitin aseitai, “Pakai hingjing min'a kasei ahi, hitobanga kisa chonvalpa chu thi dinga kilom mong ahi bouve! 6 Chujongleh aman voujang natna beihel'a hitobang thil pihi abol jeh hin aman kelngoipi chu ajat li a asah kit ding ahi,’ atitai.

7 Chuin Nathan themgaopan David kom'a aseipai jengin, “Hichea kisei mihaopa hi nangma nahi, Pakai Israel Pathen'in hitin aseiye, ‘Nang hi keiman Israel chate chunga leng chang dinga thao kanusa nahin, chule Saul thaneina a kon kana huhdoh nahiye. 8 Chujongleh napupa Saul’in, ajiteu jouse chule Israel insung pumpi le Judah insung pumpi jong kapeh nahi; hicheng jong hi alhom behseh nahlaiya ahileh tamtah kapehbe ding nahi nalaiye. 9 Chuti ahileh ipi dinga nangman Pakai thusei nanot thap a hitobang tijat umtah thil hi nabol hitam? Nangman Hit mipa Uriah chu na dengin Ammon mite chemjamin nathat nin, chule ajinu jong naji din nakipui jeng theiye. 10 Hijeh a chu tua hi nangma insunga konna jong chemjam lang jing jeng ding ahi. ajeh chu nangin keima nahsah mon neibol'in, Hit mipa Uriah jinu chu naji din nakipuitai,’ tin aseiye.

11 Chuin Pakaijin hitin aseiye, ajeh chu nangman nathil bol banga, keiman nangma insunga konna nadou ding thilse kahin kondoh sah ding ahi. chule namitmu changtah a najite jeng jong kalahpeh a naheng nakom mite kapeh doh ding, chule ama hon japi mitmu lai jenga jong najite chu aluppi dingu ahi. ✡2 Samuel 16:22 12 Ijeh inem itileh nangman na thilbol chu guhthim'a nabol ahin, keiman vang Israel chate pumpi mitmu dinga kabol ding ahi,’ tin aseiye.”

13 Chutah chun David in jong Nathan kom'a hitin aseiye, “Keima Pakai dounan kachonse tai,” atin ahileh; Nathan jong chun David kom'a asei paiyin, “Pakaijin na chonset angaidam tai. Hijeh a chu hiche chonset jeh in nangma thi tapon nate. 14 Hijongleh nangin hiche thil hi nabol a Pakai chu nahsahmo tah a nabol a nataitom ahitan, hijeh a chu ahung peng ding nacha chu thi tei-tei ding ahitai,” tin aseitai.

15 Hichun Nathan a inlam'a achejou chun Pakaijin Uriah jinu hin David chapa chu gotna apen ahileh naosen chu apet-pet in adammo paitan ahi. 16 Hijeh chun David jong naosen adamna din Pakai henga atao-tao tan ahi; David chun an angolin apotdoh in, jan khovah hel chun tollhanga alumin ahi. 17 Chuphat in a insung mi upa chengsen ajol-jol jeng uvin chule tollhanga alupnaa konna thodoh sah tei din agouve; ahinla David chu akithou doh dehpon, chule an jong ane dehpoi.

18 Ahivangin nisagi lhin nin naosen chu athi tan ahi. Hichun naosen chu athitai tia David kom'a seipeh ding asohte chu akicha tauve; ajeh chu amaho geldol'a, vetan, naosen ahin laiya bon eiho thusei angai louva ahileh, tua naosen athitai, tia iti iseidoh ngam diu ham? Ama le ama kithalo mai ding ahi,” tia angaitou ahiye.

19 Ahin David chun asohte chu akhoisa cheh tauve ti ahetdoh phat in naosen chu athi ahitai tin David in ahedoh pai paitan ahi; hijeh chun David chun asohte chu adongin, “Naosen chu athia hitam?” ati.

Ama hon jong, “Heng'e, ama chu athitai,’ atiuve.

20 Chuphat in David jong tol'a alupna a kon'in ahung thoudoh in akisil ngimin, thao akinun, aponsil akhel’in, Pakai Hou-In sunga avahlut in chibai agaboh e; chujouvin David chu ama inlama ahungin an athum in ama hon jong ankong aluipeh uva ahileh, an anetan ahi.

21 Hichun asohten ajah a, “Ipi bola hitia hi naum ham? Naosen ahai-hai pet in an na ngol'in nakap-kap jengin, naosen athi tahbah phat in na thoudoh in an nane jenge,’ atiuve.

22 Hichun David in jong, “Naosen ahinpet a chu an kangol'a ka ka-ka ahin, kon ija ahet thei ham, ajo le Pakaijin eilungset a naosen hi ahin hinsah thei ahi, tia keiman kagel jeh ahi. 23 Ahin tunvang ama athia ahitan ibola an kangol ngol nahlai ding ham? Ken ama chu kahinsah theiya nabol uham? Kei bou ama kom'a nikhat le kache ding ahin, ama chu kaheng'a hung kile kit louhel ding ahitai,” tin adonbut uve.

24 Hichun David in ajinu Bathsheba alhem lungmongin akom'a agalut kit in aluppin ahileh amanun nao ahin vop in chapa khat ahing kit e, chule David in amin Solomon asah in ahi. Pakaijin ama hi angailui. 25 Hijeh chun Nathan themgaopa henga ahin hetsah in ahileh Nathan'in Pakai thusei dungjuijin ama chu amin Jedidiah tinjong aminvo kit e, (hichu “Pakaijin angailut” tina ahi).

26 Chuin Joab chun Ammon mite khopi lailung Rabbah chu adel khumin gal’in akisat pin ahileh ajouvin leng khopi chu alatan ahi. 27 Chuin Joab chun David kom'a sottolle miho asol’in agasei sah tai, “Keiman Rabbah kaga kisat pin, twiphai khopi chu kajoutai,” ati. 28 Hijeh chun tun mipi amoh cheng khomtup inlang khopi dounan ngahmun hung sem tan, chule akhopi jong hung toupha jengin, achuti louva ahileh keiman akhopi hi kalah a keima min kaputsah ding ahitai,” ati.

29 Hijeh chun David in mipi abonchan akhom sohkeijin Rabbah khopi lama achen, chule akhopi dounan gal abol’in akisat pin ahileh ajouvin akhopi chu alatan ahi. 30 Chule alengpau lallukhuh chu David in aluchanga kon'in alahdoh peh in chule ama luchang'ah akikoi tan ahi. Alallukhuh chu sana le songmantam a kisem chule agih dan chu pound somsagi le nga ahi. Chujongleh asunga chun song mantam tah akikoijin ahi. Chujongleh David chun Rabbah khopia thil thang tamtah ahin chom doh in ahi. 31 Chujongleh akhopi sunga cheng mipi jouse chu gal hingin akaiyin, chule thing-at ding leh tuphul kheng ding leh, heicha kheng dingin agoiyin, chule cheh dengin apansah tai. Hiti chun David chun hitobanga hi Ammon mite khopi jouse anabol ahi; chujouvin David le mipi chu abonchauvin Jerusalem'a ahung kile kit tauvin ahi.