1 Chuin David chapa Absalom chun sopi numei hoitah khat aneijin, amin chu Tamar akiti. Chule Amnon chu Tamar ding'a asopi pa ahin, amapa chun adeicha lheh tan ahi. 2 Amnon chun Tamar chu adeichat behseh jeh in adammo lotan ahi; ijeh inem itileh Tamar chu nungah thengsel ahina laiyin, chule Amnon in amanu chu kachan joulou ding hitam tin alungin agel tan ahi.

3 Ahivangin Amnon hin kiloipi gol lungthim suhtohje themtah khat aneijin, amin jong Jonadab akiti; amapa hi David loipa Shimea chapa ahi. 4 Nikhat Jonadab in Amnon kom'ah, “Ipi bola lengpa chapa jingkah seh le mingol ho um banga um jing nahim? Ipi ham naboina?” tin adongin ahi.

Amnon in jong aseipeh tai, “Keiman kasopi pa Absalom naonu Tamar khu ka deichat jeh ahi,” tin aphong doh tan ahi.

5 Chuphat in Jonadab chun, “Aphai, keiman ipi nabol ding na seipeh nange. Nungchen lang nalupna a khun lumin lang kinat lhem sah in. Napa chu nangma ve dinga ahung tengleh napa kom'a hitin seiyin, Tamar chu ahunga nangma dia anneh themkhat nahung bolpeh din thum'in. Chule aman namitmu a akhut tah a nahung vah a ahileh nangma naol chom din jong seipeh tan,” ati.

6 Hichun Amnon in jong asei bang bang chun alupna a alumin akinat lhem sah tai. Chuin lengpa chu ave din ahungtan ahileh Amnon chun lengpa kom'a chun aseitai, “Lungset tah in kanaonu Tamar chu neihin solpeh inlang keima mitmun kadutah khat neh ding eihung sempeh hen, chutile ken ama khutsoh mong-mong chu nenge,” ati tai. 7 Hijeh chun David jong anom in Tamar chu Amnon in a agache a anneh ding them khat agasem peh din asol tan ahi.

8 Chuphat in Tamar jong Amnon in'a achen alhun phat in, alupna langa achelut tai. Hichun changbong goina alan changbong agoiyin, Amnon mitmu tah in changlhah chu asem’in akanpeh tai. 9 Ahin amanun akhangbel sunga a changlhah kansa chu Amnon angsunga agathah lutpeh vang'in amapan ane deh tapon ahi. Hichun Amnon’in asohte kom'ah aseijin, “Kakom'a kon'in nabon'un potdoh un,” ati. Hijeh chun abonchauvin ama kom'a kon'in apotdoh sohkei tauve.

10 Chutah chun Amnon in Tamar kom'a asei in, “Tun anneh ding chu kalupna langah hinchoilut inlang chule nei nehsah tan,” ati. Hichun Tamar injong anneh ding chu achoilut peh tan ahi. 11 Ahin amanun anehsah jing lai chun, amapan ahin tuhchah kheh in chule athum tan ahi, “Hungin neihung luppin kalungset kanaonu,” ati.

12 Chuin Tamar chu akap in “Ahipoi, he-u!, ngol hih in! hitobang pihi keima kom'ah bol hihbeh in! Hitobang ngol hoitah thil hi Israel chate lah a kibol ngailou ahi. 13 Chule keiman hoilam a jum kathoh ngam ding ham? Chule nang jong Israel chate lah a michavai mingol khat mong-mong nahi ding hita chume. Hijeh a chu katao tho ahi, lengpa kom'a nei kithum lechun aman jong nang ding beh a chu ajahda louhel ding ahinai,” ati.

14 Ahin Amnon chun amanu thusei chu angaipeh tapon, amanu sanga athahat joh jeh chun pumhat in aluppi tai. 15 Chuin hetman louvin Amnon lungsetna chu mudana joh ahungsoh tan, chule amuda dan chu masanga adeichatna sang'in akhoh jotan ahi. Hijeh chun Amnon chun akom'a hitin aseitai, “Kithoudoh loiyin lang potdoh loiyin,” tin asoldoh loitan ahi.

16 Chuin Tamar in kap pumin aseijin, “Ahipoi he-u! Hitobang thildih louva neisol doh loi hi neibol masatna sanga khoh cheh jo ahi,” ativangin Amnon in angai peh deh tapon ahi. 17 Chujouvin Amnon in alhacha ho akouvin thu apetan ahi, “Hiche nu hi kamasang a kon'in soldoh loiyun lang anunga kotpi chu kamloi un!” ati.

18 Hiti chun Amnon lhacha hon Tamar chu asoldoh loiyun anunga kotpi akamden tan ahi. Tamar chun sangkhol chol hoitah aki-ah ahi; ajeh chu chuche lai khanga chonna dan dungjui a leng chanu nungahtheng ho chu hitobanga chu ana kivonji mongu ahiye. 19 Ahinlah tun Tamar in asang khol chol chu abottel’in chule alujang'ah vutvam akiloi tan ahi. Chuin akhut chu amai ah akoi in, othongje jun akap in achemang tan ahi.

20 Hichun a-upa Absalom in ana dongin “Na sopipa Amnon chun naum khompi hiteiyin te ong? Hijongleh tun thipchet in umtan, ajeh chu ama jong na upa ahi bouve. Chule athilbol hi nalungthim a chinda tan,” ati. Hijeh chun Tamar jong a upa Absalom in’a chun lung genthei tah in acheng den tan ahi.

21 Chuin David lengpan hitobang thilsoh ho hi ajahdoh phat in alunghang lheh jeng tan ahi. 22 Chule Absalom in hitobang thilsoh hi Amnon kom'a aseidoh lou vang'in Amnon chu nasatah in avetda lheh jeng tan ahi ajeh chu anaonu chunga athilbol aum chan jeh chu ahi.

23 Hiti chun kumni jouvin Absalom chun Ephriam kom'a Baal-hazor khoa kelngoi mul avou in, Chule Absalom chun leng chapa te jouse chu abonchan golvah a chun akou sohkei in ahi. 24 Hichun Absalom jong lengpa henga achen hitin agaseiye, “Ka kelngoimul vou hon tun na atongun, hijeh chun lengpa le asoh te jouse jong lungset tah a nahung uva hiche nikho hi keitoh neihung man khompi diu ham? tin agaseitai.

25 Ahivangin lengpan Absalom adonbut in, “Ahipoi kacha, kabon uva kahung uleh nang dinga khanlel kahi diu ahi,” ati. Ahinla Absalom in aha tem cheh jengin, Absalom chu aphattheina aboh jeng vang'in David chu ache dehpoi.

26 Chuphat in Absalom'in, “Aphai, khutia nang nahung thei louding leh iti nagel em kanaopa Amnon hinsol ding chu?” ati. Chuin lengpan ahin donbut in,

“Ipi jeh a Amnon hung ding?” ati. 27 Ahin Absalomin aseikit in Amnon le leng chapa te aboncha solpeh ding lengpa anop masang'in angeh-ngeh jeng tan ahi. Ajeh chu Absalom kigotna hi lengte jaona dia kilomtah a kin agon ahi.

28 Chujou in Absalom chun asoh te chu thu aseipeh masat in, “Amnon chu lengpitwi ahung kham ve-lhi jing jeng uvin lang, keiman najah-uva, ‘Amnon chu jep uvin tia kahin sei tengleh that jeng uvin, kicha hih hel’uvin. Ajeh chu keiman thu kapeh louva nabol u ham? Hangsan tah le thaneitah in pang uvin,” tin aseipeh tai. 29 Hijeh chun Absalom sohten jong Absalom in athupeh bang-bang uvin Amnon chu athat tauvin ahi. Chuin lengpa chapa te adang ho se abonchan akipat uvin asakol pol cheh chunga atoudoh sohkei uvin ajam gam tauve.

30 Hichun amaho Jerusalem ahung akile uvin, David henga thu ahung kithang lut masan: “Absalom'in lengpa chapa te jouse athat gam e, khat a khat cha jong ahing hoi tapoi!” tin ahung kisei e. 31 Chutah chun lengpa jong akipatdoh paiyin aponsil jouse abottel’in tollhanga akijam tai; chuin akom'a ding alhacha jousen jong tijat jeh le lungkham jeh in aponsil akibotel sohkei tauvin ahi.

32 Chuin David golpa Shimea chapa Jonadab chu David kom'a ahungin hitin aseije, “Ahipoi tahsan hihbeh in, lengpa chapa te ho jouse aboncha atha ahi sampoi, Amnon chang seh kithat ahi bouve; ijeh-inem itileh Absalom'in hiche bol ding hi masanga pat Amnon'in anaonu Tamar pumhat san a abolset nikhoa pat a chu gonsa anakoi ahitai. 33 Ahipoi, kapu lengpa na chapa te abonchauva thigam ahipoi! Amnon sehbou thi ahi,” ati. 34 Hiche phat tah chun Absalom chu ajammang tai.

Chuin Jerusalem a mive lhia pangpa chu akhodah in agah vet a ahileh, “Vetan, Horonaim molsang pang langa chun mihem tamtah ahung kijot kamui,” tin lengpa seipeh din alhai tan ahi.

35 Hichun Jonadab chun lengpa jah ah, “Ven! Tun leng chapa te khu ahung tauve!; Na lhachapa keiman ka seipeh bangin ahung tauve,” ati peh e.

36 Chule Jonadab chun thu asei jou jouvin, vetan, lengpa chapa te chu ahunglhung pai tauvin, chuin apeng jah uvin akap cheh tauvin ahileh, lengpa le alhacha ho jong abonchauvin lhase tah in akap sohkei uve. 37 Chuin David in nisotpi achapa Amnon pul adouvin ahi.

Absalom vang chu apupa Geshur lengpa Ammihud chapa Talmai kom'a ajam tan ahi. ✡2 Samuel 3:3 38 Hiti chun Absalom Geshur gam'ah kumthum sungin aga um tan ahi. 39 Chule tun leng David injong Amnon thi chung changa kichamna nei a, achapa Absalom toh kithah gopkhom kit ding chu angaicha lheh tan ahi.