1 Chuin Mose le Israel mite'n Pakai avahchoijun la asa uve: “Keiman Pakai vahchoila ka sah ding, ajeh chu aman loupitah in gal ajou tai; sakol ahin achung toupa Pakaiyin twikhanglen lailunga aseplut tan ahi.” ✡Rev 15:3 2 “Pakai hi kei dinga, ka thahat na le ka vahchoi dinga lomtah ahi; ajeh chu aman galjona eipetai.” Ama hi ka Pathen, ka vahchoi ding ahi, chule kapau Pathen ahin, choiat dinga lom Ama bou ahi! ✡Labu 118:14; Isa 12:2 3 “Pakai hi galhattah ahin, ajeh chu amin jong Pakai ahiye!”. 4 “Pharaoh kangtalai jouse le agalsat jouse, Pakaiyin twikhanglen lailunga aseplut tauvin; Pharaoh deitum le alhentum ho abonchauvin Twipi San dunga aseplut gamtauvin ahi”. 5 Twikhanglen kinong in achup gamsoh hel jeng uvin; abonchauvin songtum bangin twinoi lamma a lhalhum gam tauve. 6 “O Pakai nakhut jetlam hi loupi le thahat chungnung ahi. Melmate jeng jong asugam hel tan ahi. 7 Na lalna leh na loupina jalin na melmate na lehkhup jeng e, na lunghanna nasatah in nahin tahlang jitan ahile; abonchauvin meijin changpol akah vamkei bangin akavam sohhel tauve. 8 Nangma husan a kon'in twipi kinong jeng jong alhuh den in ahile atang jeng tai. Chule twikhanglen lailung'a twi kitang jong chu ale chupsoh hel jengin ahi.” 9 “Chuin Melmapa chun hitin aseiye, 'Keiman anung kadel ding ka phah tei ding ahi. Thil kiladoh kale lah ding chule ka deichat bangtah a kakile lah ding ahiye; ka chemjam ka sadoh ding, abonchauva kasat chap jeng ding ahiuve.' 10 Ahinlah nangman na haikhum in ahile, abonchauvin twikhanglen in achup tauve. Twipi hattah lailung'a alhum gam tauvin ahi. 11 “O Pakai, Pathen dang ho jouse lah jeng'a jong koimacha nang kal lhah aumpon, amaho chu imacha toh akite thei deh pouvin, nangma kala koimacha thenna chang ding aum hih e. Loupina leh tijat umtah a thilbol a koiham? 12 Nangman nakhut jetlam na jahdoh in ahile, hichun leiset a melmate avallhum gam tauve.” 13 “Na lungsetna long louvin, na lhatdohsa mite aumpi jingin ahi. Na chena mun geijin na mite nahin puilhung tai. 14 Mitin vaipin hichu ahin jasoh tauvin ahile; Philistine gamsung'a cheng jouse din nat hesoh achang tauve. 15 Edom gamsung'a lamkai kiti phot alung thomhao gamtan; Moab gam'a lamkai jouse jong akithing sohhel tauve. Canaaan gam'a cheng jouse jong alungthoi gam tauve. 17 Nangman namite nahin puilut ding nangma molsang chungvum a chu na tundoh ding ahiye; ajeh chu nangman hiche laimun chu na chenna dinga na tundohsa ahitai, O Pakai nangman mun theng lai jeng jong chu na khut tenia na tundoh ahitai. 18 Pakai hi tonsot tonsot a chungnung chang ahitai!” 19 Ajeh chu Pharaoh sakol kangtalai jouse twikhanglen lailung'a atollut in, Pakai thahat chun achungvum uvah twikhanglen chu alechup sah gam ahitai. Ahinlah Israel chate abonchauvin twikhanglen lailung tolgo lah achun akijot galkai sah tauvin ahi. 20 Chuin Aaron sopinu, themgao Miriam chun akhut a sum-eng behging akilah in numei jouse alamkaijin, behging abengun alam tauve. 21 Chule Miriam chun hiche jaila hi a-oijin ahi: “Pakai vahchoila sau hite, Aman loupitah in gal asat in ajou tai; sakol chung'a toupa le akangtalai jeng jong twikhanglen lailung'a aleh hup jeng tai.”

22 Mose'n jong Twipi San a kon'in Israel te chu ahin pui nalaiyun, chuin Shur kiti neldi gam'a akitol lut tauvin ahi. twidon ding thei louvin nithum sung'in akitol tauve. 23 Marah mun ahunggei tauvin ahile hiche mun a twi chu akha'n don thei ahi tapoi. Hijeh chun hiche lai mun chu Marah asah tauvin ahi (hichu akha tina ahi). 24 Chuin mipi chun Mose dounan “Ipi kadon diu hitam?” atiuve. 25 Mose jong Pakai lam sang'in kap pumin atao tai. Pakaiyin thing lhon neokhat avetsah in hichu asat doh in twi lah a chu akholut a ahile twi chu donthei ahung sohdoh tan ahi. Chuin Pakaiyin hiche Marah munna chun Israel te dingin chonna dan khat asempeh in Ama a akitah jingna diuvin jong hilchetna aneiyin ahi. 26 “Aman hiti hin aseije, “Nangman ching thei tah in na Pakai na Pathen thusei ngaijin, Ama mitmua thudih jeng'a na chon ding, athupeh jouse nanit ding, hitia chu Egypt mite chung'a gamna hoise ka lansah chu nangho chung'a ka lansah louhel ding ahiye, ajeh chu keima na damsah na Pakai chu kahi,” ati. 27 Marah mun adalhah phat uvin Israel mite jong Elim kiti twiko som le ni putdohna mun tomthing somsagi kena munna twipang achun ngahmun akisem tauvin ahi.