1 Hiti chun van le leiset chule asunga thil umjouse chu loupi tah a sem chai ahi tai. 2 ✡Heb 4:4,10Hichun ni sagi lhin nin Pathen in athilsem chu abonchan achaiyin, hiti chun a thilsem ho jouse akon in ama akicholdo tai. ✡Potdohbu 20:11 3 Hiche ni sagi lhinni chu Pathen in phatthei aboh in chule atheng ahi tin aphongdoh tai, ajeh chu athilsem le anatoh jousea kon'a akicholdo ni ahi. 4 Hiche hi van le leiset ahung kisemdoh a akhanggui hung kipatdoh dan ho chu hiti hi anahi. Pathen in leiset le van ahinsem patni chun, 5 Leiset chunga tollhang a jong hamphung keh doh loulai ahi. Ajeh chu Pathen in gotwi leiset chunga ajuhsah loulai ahin chule hia chu koima natong ding umlou lai anahi. 6 Ahin leiset'a konin twimei ahung kaiyin chule leichung jouse chu twiyin achap nouvin ahi. 7 Chuin Pathen in lei chunga konin vutvai achun mihem asemin, chule anahhom'a hinna hu alhakhum a ahile mihem chu hinna nei ahung hitai. ✡1 Crth 15:45

8 Chuphat in Pathen injong niso lama Eden hon aphut doh in hiche achun asem sa mihem chu akoi tai. 9 Chuin Pathen in leichung'a kon in vetnom nom um le neh ding thingga namkim akedoh sah in ahi, chule honlai lung'a chun hinna thingphung jong chule ase le apha hetna thingphung jong akesah in ahi. ✡Rev 2:7; 22:2,14

10 Hiche Eden hon'a kon chun honlei chapnou jing ding in vadung along in, vadung chu vadung li in ahung long khenin vadung li asohdoh e. 11 Vadung khatna chu ahile Pishon ahin, hiche chu sana kimuna vadung ahin Havilah gam pumpia long kimvel ahi. 12 Hiche gam'a sana kimu ho chu ahoi thei lheh in anamtui jah nom umtah chule song namtui jong akimui. 13 Vadung ni lhinna chu amin Gihon ahin, hiche vadung chu Cush gam pumpia long kimvel ahi. 14 Vadung thum lhinna chu ahile Tigris ahin, hiche vadung hi sah solam gam'a Asshur gam pumpia long ahin, chule vadung li lhinna chu Euphrates ahi. 15 Chuin Yaweh Pathen in ami semdohpa chu Eden hon sunga apuilut in hiche hon'a natong ding le avetup ding in apansah tai. 16 Ahin Pathen in mipa koma athupeh chu, “Nang man hiche honsunga theiga ho khu nadei dei naneh thei cheh ahi. 17 Hinlah nangman hon lailung'a ase le apha hetna theiga vang naneh lou beh ding, hichu naneh nini, nathi teitei ding,’’ ahi. 18 Chujong le Pathen in aseiye, “Mihempa achanga aum hi apha poi hijeh chun keiman aum khompi ding khat sempeh ing kate,’’ ati. 19 Chuin Pathen in leivui chu leingan asosah in leichunga ganhing namkim asem in chule vacha ho chung lam'a alensah in chuin hiche ho jouse hi amin ipi pi asah em tin mihempa kom'a ahinpui khom in hiche a mihem pan aminvona jouse chu tuni geiya amin a pang den ahitai. 20 Hiti chun mihempa in ganhing namkim chu aminvo cheh in, chunga lengthei vachate ho leh gamsa jouse jong aminvo soh keiyin ahi. Ahinlah mihempa kithopi ding akimu doh hih laiye. 21 Hijeh chun Pathen in mihempa chu a imutmil sah in a imutmil kah chun Pathen in anahgu khat aladoh in anung chu aphe in atom jol peh in ahi. 22 Chuin Pathen in Adam nahgu alah doh'a kon chun numei khat asemdoh in amanu chu Adam kom'a ahin puilut in ahi. 23 Hichun mihem pan aseiye, “Amanu hi keima gu akon'a kisemdoh ahin, chule aphevou jeng jong keima phevou ahin, amanu hi tua pat'a numei kiti ding ahi, ajeh chu amanu hi pasal'a konna kiladoh ahi,” ati. 24 Hijeh a chu pasal in anu le apa adalhah a aji numei'a beh ding chule amani chu tipum khat kiti lhon ding ahiye. ✡Matt 19:5; Mk 10:7,8; 1 Crth 6:16; Eph 5:31 25 Ahin hiche pet chun pasalpa ahin numeinu ahin ani gel lhon a sagoh keuva um lhon ahin, ahi vangin jachatna anei lhon pon ahi.