JUDGES
THUTAN VAIHOM HO
LEKHABU
Judges Lekhabu Sung Thu Umdan
Judges thusim hohi tulai vannoi mite nun le khan to-jong vetkahna thei tampi aum e: hichu tijat umtah kitha kimat, jonthan hoi chule khat le khat chungnun ding kichuna thudol aseijin ahi. Hitobang thusim hohi sunggil lam’a dia kitil khouna phatah ahin, chujongleh Judges lekhabu hin kiloikhomna hoa kivaihomna akitup lou teng, ipi sohji em, tijong aseijin ahi. Mihemten Pathen lam sanga kisih pum’a aka tenguleh, Pathen in mihemte akhotona thudol jong aseije. Hiche lekhabu hin Joshua thinung chule Leng ho phat masanga Israelte Canaan gam’a achen-u thudol jong aseijin ahi.
Judges lekhabu nasim’a kon hi, nangma mimal chungchang le thua nanun louna ho kikhol chilna nanei thei ding, chuteng lunghei le taona tothoa Pathen toh nakigui jopna athahbeh’a nasem phatthei ding ahi.
Judges Lekhabu Jihpa Chule Ajih Kum
Akhang khanga pat phat che dungjui in Samuel themgao jih ahi akiti, hinlah koipen in ajih ham tihi, kicheh tah in akisei poi. Chule Samuel toh kiloi holah’a khat pen in anajih jong himai thei jinte, ahilouleh Themgao holah’a khatpen hidin ginchat ahi, akiti. Judges lekhabu hi 1000 BC vel’a kijih ahin, hiche lekhabua hin kum jathum le somnga sung thilsoh ho aki-jihlut in ahi.
1
Adoni-Bezek, Judah Le Simeon In Anamat Lhon
1 Joshua thinung sangin, Israelten Pakai kommah “Canaan mite satdinga koi phung kon masadingham?” tin anadongun ahi. 2 Pakaiyin “Judah kon masading ahi, ajeh chu hiche gamhi amaho khutna kana pehdohsa ahitai,” ati. 3 Hijeh chun Judah’in asopipa Simeon komachun, “Keima eikipe gamsunga Canaan mite toh kisatna ding kahin neihung kithopin chujouteng nangma nakipehna gam ajong chun gal gasat khomna hite,” ati. Hitichun Simeon’in Judah chu akithopin ahi. 4 Judah miten galmi hochu aga nokhum’un ahileh Pakaiyin Canaan mitele Perizz mite chu agal ajosah in chuleh Bezek khopia chun galmi sangsom athatnun ahi. 5 Hiche Bezek munna chun Adoni-Bezek lengpa chu akisat piuvin galchu anajouvun chule Canaan mitele Perizz mite jong ajou uvin ahi. 6 Adoni-Bezek ajamdoh in, ahinlah Israel ten ahin mannun akhutpile akengpi hochu atanboh peh un ahi. 7 Adoni-Bezek’in, “Keiman phat khatnin leng somsagi hochu akhutpiu leh akengpiu lentah hochu kanatan peh in ka-an nehna table noija alhajah ho in ananeovin ahi, keiman amaho kanabol bangin tun Pathen’in keima eile thuhtan ahi,” ati. Amahon amachu Jerusalemma anapuijun hikomma chu ana thitan ahi.
Judah Phung Miten Hebron Le Jerusalem Analah-U
8 Judah ten Jerusalem ana sat’un anajouvun gammu analaovin amipite ana thatgam’un chuleh akhopi chu meiyin anahal-lha uvin ahi. 9 Hiche jou chun achesuh uvin Negev leh lhumlam molbul thinglhang gamma cheng Canaan mite akisat piuvin ahi. 10 Hiche jou chun Judah ten Hebron’a cheng Canaan mite agakisat piuvin (Hiche Hebron hi tumasanga chu Kiriath- arba anakiti ahi) hichea chun, Shesai, Ahiman le Talmai galmi hojouse jong chu anajouvun ahi.
Othniel In Debir Khopi Alah
11 Hichea kon chun amaho acheuvin Debir khopia chengho satdin akon taove. Debir khopi jonghi masanga chun amin Kiriath-sepher ana kitin ahi. 12 Caleb min koi hileh Kiriath-sepher gasatna ahinlajou penpen chu kachanu Acsah hi ajidinga kapeh ding ahi ati. 13 Caleb naopa Kenaz chapa Othniel’in aga jouvin, hijeh chun Acsah chu Othniel’in akichenpi tai. 14 Acsah in Othniel akichenpi jouchun, Othniel chun Acsah pa kommah loumun khat thum dingin Acsah chun atil’in ahi. Hitichun Acsah chu sangan chunga konna agahkum lhah chun Caleb’in “Ipi hitam?” tin ana dongin ahi. 15 Amanun jong “Thilkhat neipeh ben kati ahi, nangin Negev gamchu neipeh ahitah leh tuinah phung khattoh neipeh than,” ati. Hichun Caleb min tuinah achungnung leh anoinung jong apehbe thatai.
Judah Le Benjamin Phungmite Galjona
16 Judah phung miten lusulei khopi tia kihe Jericho khopi chu adalhah phat’un, Mose nupapa chilhah Kenmite chun Judah gamthip gamachun akilhonpi kit tauvin ahi. Hitichun amaho chutoh Negev gamsunga Arad khopi komma chun agamsung mipiho chutoh agacheng khom tauvin ahi. 17 Hiche jouchun Judah chu Simeon toh apangkhom lhonnin Zephath na cheng Canaan mite chu agasat lhonnin hiche khopi chu agasumang hel lhontan ahi. Hijeh chun hiche khopi chu Hormah anasah un ahi. 18 Hiche ban ajong chun Judah in Gaza, Ashkelon chule Ekron khopi holeh vella gamho chutoh alah thaovin ahi. 19 Pakai chun, Judah mipitechu ana umpin hitichun amahon thinglhanggam pumpi chu ana lokhum tauvin, ahivangin, amahon sakol thih kangtalai mangcha aphaichamma cheng hochu ana deldoh joupouvin ahi. 20 Mose’n ana thuteppeh bangin Caleb chu Hebron ana peuvin ahi. Hitichun Caleb min hiche munnna cheng Anak chate chilhah thum hochu ana nodoh in ahi. ✡ Joshua 15:13,14 21 Ahinlah Benjamin chaten vang Jerusalem’a chengho Jebus mite chu ananodoh joupouvin ahi. Hijeh chun tuni geijin jong Jerusalem khopia Jebus mitehi Benjamin mipite toh achengkhom un ahi. ✡ Joshua 15:63; 2 Samuel 5:6; 1 Thusimbu 11:4 22 Joseph chilhah ten Bethel khopi anasat’un Pakaiyin ana umpiuvin ahi. 23 Amahon khopi velhi dingin mi anasollun ahi (Tumasanga chu Luz ana kiti ahi). 24 Amahon khopia konna hung potdoh mikhat chu ana kihoupiuvin, “Hiche khopi lutna ding lampi neihillun achutileh keihon khotona kamusah diu nahi” atiuve. 25 Hitichun aman alutna theidiu lampi chu ahillin, amaho hiche lampiah chun alutnun hiche khopi sunga umjouse chu abonnin athatnun, hiche mipa chule ainsung mite sevang ahing hoijun ahi. 26 Khonungin hiche mipa chu Hit mite gamma aga chenglut’in, hichea chun khopi khat aphutdoh in, aman akhopi min chu Luz asah in tuni geijin hiche minchu apuden tan ahi.
Israel Phung Dang Hon Adeldoh Joulou Miho
27 Manasseh phungin Beth-shan, Taanach, Dor, Ibleam, Megiddo sunga cheng mipi teho ahin, avelluva chengho ahiuvin anodoh joupouvin ahi, ajeh chu hiche munna cheng Canaan mite chun hiche gamsunga chu chenden teiding anatup’un ahi. ✡ Joshua 17:11-13 28 Israelte chu ahung hatdoh phat’un, hiche Canaan mite chu sohna anatoh sah un ahi, ahinlah gamsunga kon chun adelmang sohjou pouvin ahi. 29 Ephraim phung jong chun Gezer gamsunga cheng Canaan mite chu anadeldoh joupouvin ahi. Hitichun Canaanmite chu amaho lah a chun achengjom tauvin ahi. ✡ Joshua 16:10 30 Zebulun phungmiten jong Kitron leh Nahalol gamsunga chengho ananodoh joupouvin, hitichun Canaanmite chu alah uva chun achengden tauvin ahi. Ahinlah Canaan mite chu anamna in Zebulun’te sohna atohsah tauvin ahi. 31 Asher phungmite chun Acco, Sidon, Ahlab, Aczib, Helbah, Aphik chule Rehob gamsunga chengho anodoh joupouvin ahi. 32 Ahin Asher phung mipite chun hiche gamsunga anachengte Canaan mite chu anodoh joulou jeh uvin, alah uvah chun agachen lut tho tauvin ahi. 33 Hitobang machun Naphtali phung chun Beth-shemash leh Bath-anath gamsunga chengho ana nodoh joupouvin ahi. Hitichun Canaan mite lah a chun ana chenlut tho-uvin ahi. Ahivangin, Beth-shamash leh Beth–anath mipite chu namna in Naphtali mipite sohna anatoh sah un ahi. 34 Dan phung mite chu Amor miten thinglhang gammah ale-nolut kit’un chule amaho chu phaicham ah ahung kumsuh tapouvin ahi. 35 Amor mite chu Heres, Aijalon le Shaalbim mol lammachun chen den ding atupten’un ahi. Ahinla Joseph insung chu ahung hatdoh phat’un Amor mite chu namna in sohna atohsah tauvin ahi. 36 Amor mite gamgi chu Akrabbim a kon in Sela ajonnin hichea kon chun chunglanga akikho toupeh in ahi.
DRAFT COPY