1 Joseph chilhah ho chan ding kipeho chu Jericho kom'a Jordan vadunga kon'in ahung kilhungin, Jericho twinah solam, gamthip gam hoipen Bethel thinglhanga alutnin ahi. 2 Bethel a kon'in Ataroth apal galkaijin Arki mite gam'a alutnin ahi. 3 Hichea kon chun lhumlam'a akum suh in Japhlet mite gam'a alutnin Beth-horon chan geijin alutnin, chea kon chun Gezer lah alutnin Mediterranean twikhanglen'a alut galkaijin ahi. 4 Hiche hi Joseph chate Manasseh leh Ephraim insung mite gamlo dinga kipe ahi.

5 Noija ho hi Ephraim phung abahjam ho jouse achan diuva kipe ahi. Amaho gamlo ding solam gamgi chu Ataroth-addar a kipan ahi. Hichea kon chun Beth-horon sah langa alutnin, 6 chujouvin Mediterranian twikhanglen'ah alutnin ahi. Micmethath sahlanga kon'in, gamgi chu ahung kon'in Taanath-shiloh ahopan solam Janoah ajonin ahi. 7 Janoah a kon'in lhanglang ahin jonin Ataroth le Naarah a alutnin Jericho hopan Jordan vadunga atangin ahi. 8 Tappuah a patnin gamgi chu lhumlam a akilhungin Kanah vacha a kon'in Mediterranian twikhanglen na alutnin ahi. Hiche hi Ephraim phung bahkai jouse gamlo ding chu ahi. 9 Hiche banna chun khopi phabep le avel'a khoho Manasseh phung kehkhat chan dinga ana kipe jong chu Ephraim phung dingin akikoipeh tan ahi. 10 Ama hon Gezer a kon'in Canaan mite chu ana nodoh jou pouvin ahinlah Gezer mite chu tuni chan geijin Ephraim mite soh in apang tauve. ✡Thutan Vaihom Ho 1:29