1 Pakaiyin Mose jah a hiti hin aseipeh in, 2 Israel chate jah a seipeh tan, Israel chate lah a mihem kiti phot hihen, chule ahung kholjin kholgam mi hijongleh achateu Molech houna dia tohdoh aum leh, thina chang jeng ding, amapa chu gamsung cheng miten songa aselih jeng ding ahi. 3 Chule hitobang mihem chu keiman jong ka kidoupi ding, amite lah a konna hitobang mihem chu paidoh a um jeng ding ahi; ajeh chu aman asunga konna pengdoh khat chu Molech houna din atohdoh in, hichun keima muntheng asuh boh ahitan, kamin jong asuh chatvai ahi. 4 Ahilou jongleh gamsung cheng miten, hiche pan achate Molech houna dinga atodoh chu akimumo sah khah uva, thana chan dinmun'a konna ahoidoh sah khah tah ule, 5 Keima tah in hiche pa douna chung chona a insung mite dounaa kahung kilah jeng ding, ama jong chule ama nungjuia pang Molech houna a kimangcha akijoh sese chu abonchauva, amite lah uva konna ka pampai jeng ding ahi. 6 Mihem koitobang lhagao dihlou ho leh doithempuho tahsanna neiya amaho juiya apan khah leh, amaho nung ajuiya akijoh ho chonna achon tah a ahileh, Keima tah in hitobang chonna a konna chu kamai kahin lah jeng ding, hitia chu ama chu amite lah a konna pampaiya um jeng ding ahi. 7 Nangma cheh kithenso unlang athengin umdoh jeng tauvin, ajeh chu keima Pakai na Pathen'u chu kahi. 8 Chule ka chonna dan jouse nanit sohkei uva, hichengse chu najui cheh diu ahi, keima nangho jouse sutheng na Pakai uchu kahiye. 9 Koi hileh nalah uva apa ham anu ham, gaosapna neiya naum uva ahileh, ama chu thina chang ding ahi, aman amapa ahilouleh amanu agaosap tah jeh a chu athisan chu ama chunga chu ding ahi. ✡Potdohbu 21:17; Matt 15:4; Mk 7:10 10 Pasal koi hileh aheng akompa jinu chu achonsetpi khah tah leh, ajongpa ahin ajonpinu jaonaa anilhon a thana chan chang lhon ding ahi. ✡Potdohbu 20:14; Thempu Dan 18:20; Danbu Ni Na 5:18 11 Koi hileh apa jinu toh lumkhom aum khah le ama chun apa delchen alhap peh ahitan, ani lhona thina chang jeng lhon ding, thisan soman jong amanin achung cheh lhona akipoh lhon ding ahi. ✡Thempu Dan 18:8; Danbu Ni Na 22:30; 27:20 12 Amounu luppi pasal aum khah jongleh, amapa ahin amounu jong ani lhonna thina chang jeng lhon ding ahi, ajeh chu chonset gitlouna chu abol khah lhon ahitan, thisan soman jong achung cheh lhona akipoh lhon ding ahi. ✡Thempu Dan 18:15 13 Numei kilup khompi bang banga pasal khat chun pasal khat a luppi tah a ahileh, thet umtah a chonkha ahilhon tan, ani lhona thina chansah jeng ding, athisan kisona lhon chu ama cheh in akipoh lhon ding ahi. ✡Thempu Dan 18:22 14 Numei khat jaonaa anu jong ji dinga akipui tha khah a ahileh, hiche pasalpa chun thil phalou chungnung abol khah ahitan, pasalpa jaonaa numei teni ahin, abonchauva meiya govam hel diu, ajeh chu nalah uva hitobang thilse avel'a aum kit louna ding ahi. ✡Thempu Dan 18:17; Danbu Ni Na 27:23 15 Ama kiphal thengtah a gancha lup khompi pasal kiti chu thadoh jeng ding ahi, akitimatpi gancha jeng jong chu natha doh jeng diu ahi. ✡Potdohbu 22:19; Thempu Dan 18:23; Danbu Ni Na 27:21 16 Gancha kiti phot kom'a gachea kitimat sah ding gela kido numei chu, gancha ahin numeinu ahin natha jeng ding, hitia chu ani tah lhona thana nachan sah a, athisan lhon sona chu amani chung cheh a mo akipoh lhon ding ahi. 17 A sopinu apa chanu ham ahilouleh anu chanu ham kipui aum leh, apan amanu chu anih alhap peh ding amanun apa del alhap peh ding, pasal pan jong sagoh keova aum chu avet a, numei nun jong hiche pa sagohkeova aum chu avetpeh khah tah leh, hichu jachatna lah a jachat sangpen ahitan, hitia aum khah lhon tah jeh a chu achate ahilouleh amite lah a konna pampaiya um jeng ding ahi lhon e, hiche pa chun asopinu nih alhap lhah peh ahitan themmona chu aman akipoh ding ahi. ✡Thempu Dan 18:9; Danbu Ni Na 27:22 18 Numei in phat ngai banga thi aneiya, hiche pet a chu pasal in aluppia ahileh, anih alhappeh a sagoh keova alupsah a ahileh, hiche pa chun numei thisan hung potdoh sagoh keova alupsah ahin, chule amanu jong athisan lonlai tah a lumlha jeng ahitan, hijeh a chu hiche teni chu amite lah a konna pampaiya um jeng lhon ding ahi. ✡Thempu Dan 18:19 19 Nanu sopinu ham napa sopinu ham nih chu na sut thei louhel ding, hitia kibol chu a inko puma akeova ajam ahitan; hitia chon ho chun themmona ama cheh in akipoh diu ahi. ✡Thempu Dan 18:12-14 20 Apaneo jinu luppi pasal chun apaneo del asutpeh tobang ahitan, hiche pasalpa le numeinu chun achonset lhon akipoh cheh lhon ding, cha hingthei louva thi lhon ding ahi. 21 Asopipa jinu jidia kipui pasal aum khah tah leh, hiche pa chun dihlouna aboldoh ahitan, hiche pa chun asopipa delchen asut ahitan, hijeh a chu numeinu jaonaa ani lhona thi jeng ding ahi lhon e. ✡Thempu Dan 18:16 22 Nabon chauva keima chondan le ka chondan jouse najui sohkei diu, aboncha keiya nabol tahtah diu ahi, chuteng na chenna diu gamsung ka puilut nauva konna hi kapaidoh louding nahiuve. 23 Chule nangho masanga kana paidoh namtin le vaipi ho chonna bang chun, chon hihhel un; ajeh chu hitobang hoa chonna hinkho a naman tah jeh un, keima dia amaho chu thet umtah anahi tauve. 24 Hiti ho jeh a chu najah uva ka seipeh nahiuve, amaho chenna gam pumpi nang hon nalosoh uva, keiman jong hiche gam'a bongnoi le khoiju lonna hi nalona diuva kapeh nahi tauve, tia kasei ahi. Namtin vaipi lah a nangho atuma lhengdoh a chu na Pakaiyu le na Pathen'u keima hi kahi. 25 Hijeh chun na boncha uvin satheng le sathenglou chu hom khen unlang, vacha atheng ahin athenglou ho nakhen diu; hitia chu hiche ganhing ho ahin, vachate ahin tollhanga kithol tho hijongleh khat a khatcha nakisuh boh theilou diu ahi, hichengse hi athenglou aboh a kase khen sa ahi. 26 Naboncha uva keima dia athenga naum diu, keima hi Pakai kitipa athenga um chu kahin, keima mite nahina diuva namtin le vaipi lah a konna ka lhendohsa chu nahi tauve. 27 Pasal hihen numei hileh lhagao phalou vop a pang ham, mitphel doithem ham, ani gela thina na chansah jeng ding ahi lhone, songa selih jeng ding, athisan sona jal'a mona jong amaho chung cheh a lechuh ding ahi, ati.