NAHUM
THEMGAO LEKHABU
Nahum Themgao Lekhabu Sung Thu Umdan
Nahum Themgao Lekhabu hi Jonah toh hung kijom peh ahi. Jonah chun Nineveh kisuhchim ding thudol’in sapphongna ana neijin—hinlah Khopi le Lamkai cheng hon kisih in lung ana heijun, chuin Pathen in hepina ana chang’un ahoidoh tauvin ahi. Tuhin, achesa phat’a Nineveh dinmun toh kibang in, hiche khopi mite hin, Pathen tahsanna neita louvin; phatlounan adim kit tauvin ahi. Hijeh chun lung heija kisihna aum tahlou jeh chun Pathen in Assyrian khopi chunga hi thutanna alhunsah ahitai.
Nahum Themgao chun Pathen hi tantih neilou atheng chungnung (Nahum 1:2), kidangtah le thanei pen (Nahum 1:3), aphapen le hepinaa dim (Nahum 1:7), chule thudih le kitahnaa dim (Nahum 1:14), Pathen ahiti, kicheh tah’in aphongdoh in ahi.
Lekhabu Jihpa, Akijih Kum Chule Koi Henga Anajih Ham?
Hiche lekhabu hi, Nahum Themgao in, 663-609 BC sunga anajih ahi. Chule Nahum Themgao chun Nineveh khopi mite ding leh Judah te adinga anajih ahi. Assyria mite chunga Pathen thutanna ahung guilhun ding phondohna, chule hiche thutah ahung guilhung dinga kon’a chu Judah te tilkhou naa anajih ahi.
1
A Galmi Te Chung’a Pathen Lunghan Na
1 Hiche hi Nineveh khopi chung chang thudola thuphondoh, Elkosh khoa pat Nahum kitipan themgaovin thil’amu banga athil amu ho kisutna lekhabu ahi. ✡Isa 10:5-34; 14:24-27; Zephaniah 2:13-15 2 Pakai hi Pathen engsetah leh phula jing Pathen ahi. Aman a-lunghan teng phulah abol jin, Pathen in ama doudal te chung’a phu alah ding, A ma lunghanna chu a galmite chung a abuhlhah ding ahi. 3 Pakai hi kintah’a lunghang lou Thahattah ahi. Chule ajeh beijin Pakaiyin themmo nahi amoh ngaidam jipoi. Pakai hi chimpei le khopi huija alamlhan, Meilhang jouse jong hi akengphanga leivui jeng ahibouve. 4 Twikhanglen jeng jong aphoa ahileh twi akanghel jitan, vadung jouse jong abonchan atingkang soh hel jin ahi; chule Bashan phai le Carmel mol jong anitah lhon in agop lha jitan, Lebanon lhang noulai jong agop paiji tai. 5 Pakai masanga molsang ho jeng jong akihot lingji tauvin, Thing lhang gam ho jong angimsoh jitan ahi; Chule Pakai angsunga leiset jong ahomkeovin Aum jitan, Vannoi pumpi leh asunga cheng jouse jong abeisoh jitauve. 6 Pakai a-lunghan teng koiham Ama masanga ding ngam ding? Alung han deu jeju chu koiham athoh ngapcha ding? Ajeh chu alunghan teng mei-al kisung lha tobang ahin, Songpi jouse jong hi Pakai jeh-in apoh keh jitauve. 7 Pakai hi nunnem tah ahin, Gim le hesoh nikhoa kisel na kulpi ahi; Amaa kiselji mihem ho chu Pakaiyin amelchih sohkei ahi. 8 Ama kidoupite vang chu Twisoh hattah letjeng junga hunglong chu atolmang sah hel ding, Amelmate jong chu muthim khojing lah’a adel lut ding ahi. 9 Ipi dinga Pakai dounaa thilgon naneiju ham? Pakaiyin achaina hel’a asuh manghel ding; akisatpite chunga chu nivei phulah khel-a khatveija asuhgam hel ding ahi. 10 Ama kisatpite chu lingleh khao kihel chom tobanga, mangthah bep diu, chule changpol gosa banga mangthah ahitauve. 11 Pakai douna dinga tohgon neija, hangsan tah’a thuseija pang, nangmaa kon mihem khatbe hung louham? 12 Pakai Pathen in hiti hin aseije: “Amaho hi thahat’u hen lang mi tamu jongleh abonchauva kisatgam’uva kitolmang del diu ahi. Nangma vang bol gentheijin ana um jongleh chun, tun nabol genthei kit tapong’e. 13 Chule tua ama namkol jon napoh chu kaloilhah peh ding, Chule na kikanna thihkhao jouse jong ka botan peh soh hel ding ahi,” ati. 14 Chule nangma Assyria te chung chang thudol’a Pakaiyin thu apen, namin pu ding cha le nao hung peng kitlou ding ahitai; ajeh chu Pathen lim nasemthu nahou naa kona milim kilhajol hole kikhengjol ho aboncha ka paimanga, chule nangma kivuina ding lhankhuh, jachatna tampi kasempeh ding nahi,” ati.
Nine’veh Khopi Chim Thu Kithang
15 Ven molchung lah’a Kipana thupha choija chamna thu samphongpa kengphang te ni khu! Vo Judah na kut bol ding jouse kibol’in chule nakitepna bulhih soh keijin, Ajeh chu nangma lam’a migiloupa hung kit talou ding ahi, Ama chu kisumang hel ahitai. ✡Isa 52:7
DRAFT COPY