NEHEMIAH
LEKHABU
Nehemiah Lekhabu Sung Thu Umdan
Thil hahsa kimaitopi khah loulai nahim, ahilouleh thil khat kimaitopi ding hahsa nasah a ahileh hitobang ho hi Nehemiah thudol’a kon hetthemna nanei ding ahi. Nehemiah chu lamkai ahitoh kilhon'in phatseh a thil hahsa akimaitopi dan hiti hi ahi: Toh thoa midang atilkhouna, thunoh baotam dinpi jouna, lhep lhahna thei hoa kon dinjouna—hiti ho hi akimaitopin agalkai jouve. Chule lhagao thutoh kisaijin lamkai hina chu aneijin, hiche gohkeu chu hilouvin Pathen'in angansena bangin hahsatna dinmun jenga jong athoh jouve, ti kicheh tah in mudoh ahi.
Nehemiah Lekhabu Jihpa Chule Ajih Kum
Nehemiah lekhabu hi Nehemiah ama tah in anajih ahi. Scholar ho seidan ahilouleh tahsan dan in Ezra lekhabu jong Nehemiah jih hidin atahsan uvin, chule Nehemiah lekhabu hi 445-432 BC sunga ana kijih ahi.
Lekhabu Ajihlona
Nehemiah lekhabu hi Thulhun Lui sunga dia thusimbu nukhah pen ahi. Chule hiche Nehemiah lekhabu hin, soh changa aum nauva kon Jerusalem ahung kileu athum channa thusim le ahinkho uva ahinto hou jouse chu ana jihlut ahi. Chujongleh Jerusalem kulpi baang kisah phat thudol jong ana jihlut in, amiten atahsan uva kon’a ahung kithahsem kit nau thudol jong ana jihlut in ahi.
1
1 Hiche ho hi Hacaliah chapa Nehemiah tohdoh chengse ho chu ahi.
Nehemiah In Jerusalem Akhohsah
Chavang kichai lam'a Artaxerxes in lengvai apoh kal kum somni lhin kum Kislev lhasungin, keima Nehemiah hi gamsung’a khopi lenpen Susa khopi sunga kana um'in ahi. 2 Kasopi ho lah a mikhat Hanani kitipa chun mi phabep khat toh Judah gam'a kon'in eihung vil’un ahi. Keiman amaho chu Judah te ho Babylon a asohchan nauva konna ana kile kit ho chu itobang nauvem chule Jerusalem chu itobang nam tithu kana dongin ahi.
3 Ama hon hiti hin eidonbut uve, “Sohchan na a konna hung kile Judah te chu, hinkho hahsa tah le avel'a cheng namdang ten anoise lheh uve. Chule Jerusalem kulpi bang chu akisuhchim nia pat kelkot ho jouse jong meiya ana kihal lhah gam jou apat semphat louvin aum'e,” ti eiseipeh un ahi.
4 Hiche thu hi kajah phat in katou lha jengin kakap jah tai. Chuti chun nikho phabep sung chun lunghem tah in an kangol’in chule van Pathen kom'a kataovin ahi. 5 Hichun kaseijin,
“O Pakai, van Pathen, nathupeh nit ho leh nangma ngailu jingho chunga na milungsetna le nakitepna chepi jinga loupi tah le tijat umtah Pathen nahi! 6 Nami Israel te dinga sun le jan'a kataona hi venlang chule kataona hi neihin ngaipeh in! Ajeh chu keiho hi nangma douna a chonse kahi tauve, keima insung le keima tah jeng jong kachonse tauve! 7 Chule na lhachapa Mose a konna neipeh u nathupeh ho le chonna dan chule nei thugahna hou kanit pouvin melse tah in kachonse tauve.
8 Chule nangman na lhachapa Mose kom'a na-na seisa, “Nangho keima kom'a nakitah lou ule keiman chitin namtin lah a kathe cheh ding nahiuve. ✡Thempu Dan 26:33 9 Amavang nangho kaheng’a nahung kile hei uva ka thupeh nanit uva hiche dungjuiya chu nachon uva ahileh leiset kolmong geiya ana kithechehsa hijongleu chun kamin dopsangna dinga keiman kagonpeh nau gam'a chu kahin nung puilut kit diu ahi nati chu hin geldoh kit in.' ✡Danbu Ni Na 30:1-5
10 Hiche nam mite hi nalhacha te ahiuve, naban gol thahatna le na thaneina a na huhdohsa ahiuve. 11 O Pakai kataona hi lungset tah in nei ngaipeh in! Nangma jabolna a thanomte taona ngaipeh in, tuni hin lengpa khohsahna nei musah inlang nei lolhin sah in; lengpa lungsunga khotona nei musah in,” kati. Hiche phatlai chun lengpa juhaidom in kana pange.
DRAFT COPY