1 Pakaiyin Mose henga hiti hin aseijin, 2 Pakaijin dan thupeh aneiyin Israel mite seipeh un bongchal nou asan khat, tibah bukimsel natong khalou khat hi ding ahi. 3 Hiche bongnou san chu Eleazer thempu chu petan chuteng ngahmun pamlam'a Eleazer thempupa masanga natha diu ahi. 4 Eleazer thempu pan gan thisan chu akhutna anumat a Pakai Houbuh maicham masang lam'a sagi vei athe khum ding ahi. 5 Eleazer thempupa chun hiche bongnou san chu athisan jaona a aboncha meiya ahalvam hel ding ahiye. 6 Eleazer thempu chun cedar thing kha,t hyssop bah chule mojapat san themkhat chu alan bongnou meiya kihal lah achun aseplut in ahi. 7 Chuteng thempu chun aponsil akisuh ngim ding twija kisil ngim ding, hiche ho akichai teng ngahmun'a hung kinung le ding kisuhthengna chu nilhah lam le anei thei ding ahi. 8 Pasal koi tobang gancha gouvam a pang chun twija avon ho asoptheng selding ama tah jeng jong twiya kisil ngimsel ding chule nilhah khojin tokah a atheng louva um ding ahi. 9 Chule koi tobang akisutheng sel'a umpa chun hiche bongnou chal asan chu achop khom'a, ngahmun pam muntheng lah a akoi tup ding, hiche meivam chu Israel miten kisuhthengna dia manchah dinga akikoi diu ahi. Hiche kintheng natohna ding hi chonset sopthengna a man chah ding ahi. ✡Heb 9:13 10 Hiche pasal bongchal san kihalvamna aloh a pang pa chun avon jouse akisop theng cheh ding, chule nilhah khojin tokah geiya amapa chu aboh a um ding, hiche dan kisem hi Israel miten akhang akhanga ajui diu amaho lah a koitobang chidang namdang aching hon jong ajui cheh diu ahi. 11 Koi hijongleh, thilong thamkha aum tah leh nisagi aboh a um ding ahi. 12 Amaho chu hitobanga nithum le nisagi alhin teng twija kisuthenga um diu, amaho chu nisagi sunga chu akisuhtheng tahlou ule hapta khat le nisagi hung lhing tajongleh atheng louva um ding ahiuve. 13 Koi hita jongleh mithilong atham khah tah a ahi ding lomtah akisuhtheng tah louleh Pakai Houbuh chu aja lou ahitan, amaho chu Israel mipi te lah a konna pampaija um diu ahi. Ajeh chu twi kithe khum a suhthengna aum tahlou jeh a achonsetna uva chu hitia chu kibol ahitai. 14 Hiche danbu kisuhthengna dinga kisem hi hitia manchah ding, koi tobang ponbuh noija aum pettah uva ahung thi khah leh Houbuh sunga um jouse mithi longin adalpha chan chu nisagi atheng louva um jing diu ahi. 15 Thilkeu kong le lheng ipi hita jongleh asin kisin loupetna kitung kha thil ponbuh sunga um jouse chu aboh a kisim ding ahi. 16 Tollhang a um mihem long athisa ho, chemjam a kithat hihen, athikam hihen, mi thisa gu le chang ho hijongleh thamkha penpen chu nisagi sung’a aboh a um ding ahitai. 17 Hiche mi kisubohpa suhtheng theina dia chu govam thilto a bongchal kigona vam chu nalah uva leibel a nakhum diu twitheng chu na sunkhum diu ahi. 18 Chuteng aki subohlou mikhat chun Hyssop twi alah a twija adelut ding, hiche pa chun ponbuh ahin, bongbuh kiskonna jol ho ahin, ponbuh sung’a um miho ahin, mi thikam leh mithigu tongkha jouse ahin, ahilouleh lhan goh keu thamkha ho ham chu twitheng toh hyssop chu athin khum a asuhtheng ding ahi. 19 Nithum lhinni jongleh athenga um jingpa chun aki suboh jouse chu athinkhum jing nahlai ding ahi. Nisagi alhinni leh akisuboh miho chu amaho leh amaho kisiltheng uva avon ho’u akisoptheng diu, abohna uva konna atheng hi diu ahitai. 20 Ahinlah amaho lah a koi tobang aki suhbohna ho kisuh thenglou changse vang chu mipi lah a konna kichom khen ahi tauve. Ajeh chu ama hon Pakai Hou-In chu asuhboh u ahitai. Kisuhthengna dia twi kithin khum chu achung uva chukha talou ahijeh a, aboh a um jing ding ahi tauve. 21 Hiche hi mipi ho dinga dan phat sottah a ding ahin koi hita jongleh twi kithe khum jouse jong avon le apon’u akisop theng cheh diu, koi tobang kisuhthengna twi thamkha aum jongleh nilhah lang geija atheng louva um ding ahiuve. 22 Mihem hihen thilkeu hita jongleh akisuboh pan athamkhah jouse chu nilhah geija aboh a kisim ding ahi.