1 Hiche kum lhamasa pen chun Israel mite Zin gamthip ahunglhung tauvin Kadesh mun'a akichol do uvin, hikom mun'a akicholdo laitah un Miriam chu athi’n hiche mun'a chun avui tauve. 2 Hiche mun'a chun twi don ding aum tah lou jeh chun mipi ho chu Mose le Aaron dounan akiphin tauvin ahi. ✡Potdohbu 17:1-7 3 Mipi ho chun Mose themmo achan un, hitin asei tauvin gamthip lah achun Pakai masanga kasopi teho toh ana thi khom taleuveng kanom uve, atiuve. 4 Mose’n hiche Pathen chate mi hijat hi gamthip lah a athi chaikei ding’a keiho le ka gancha teu neipui uham, tin adong uve. 5 Ipi dinga Egypt gam'a konna chu neihin puidoh uham hitobang gam leiset chavai tah mun ahi atiuve. Hiche leiset gampheng ahin agasoh jong aumpon, olive thei, kolbuthei chule lengpithei cha jong umlou chuleh twi don ding jong imacha aumpoi tin aseiyun ahi. 6 Mose le Aaron chu mipi ho lah a kon'in aki nunghei lhon tan, Houbuh maicham jotna lam chu ahin nai lhon tai, hichun amani chu tolgo lam a amai asuto lhonin chuin Pakai mailhaisel kidangtah chu amani heng lamah ahung kilang doh in, 7 chuin Pakaiyin Mose heng’a hiti hin aseijin, 8 nang le Aaron in na tenggol lhon chu nachoi lhon ding Israel mipi chu aboncha nakhop tup lhon ding, mipi hon na umchan, nakhan chan lhon avet ding’u, songpi chu na thua na nunsah a na koudoh tho ding ahi. Chuteng twi don ding hung putdoh ding ahi. Nangman song chunga patna twi mipi te don ding kham na putdoh sah ding, mipi jouse chu na donva sah cheh diu ahi. 9 Chuin Pakaiyin asei bang chun Mose’n jong aboltai. Aman Pakai masanga akikoina a konin atenggol chu alatan ahi. 10 Hichun Mose le Aaron chun mipi chu songpi kom langa dingin akou lhon tai. Mose’n hitin asam tan, “Ngaijun sei ngailou milouchal ho! Songpi a konna hi twi kapotdoh sah lhon ding ham? ati. 11 Chutah chun Mose’n akhut a tenggol chu adom sang'in songpi chu nivei ajep khum tan ahileh twi chu ahung kikhodoh tai. Hichun mipi jouse ahin gancha jousen jong adonva sohkei tauvin ahi. 12 Ahinlah Pathen'in Mose le Aaron jah a aseijin nangni’n nei tahsan lhon hi alhing jou tapoi, Israel mipi hi ka themna namusah jou tapoi keiman ka teppeh nau gam leiset geija chu napuilut louding ahitai, ati. 13 Hiche mun hi Meribah twi tin akihen (hichu “kinelna” tina ahi) hiche lai muntah ahin athenna chu akilangdoh deh in ahi.

18 Ahinlah Edom lengpan hitin adonbut in, keima gamsunga kon'in kikhindoh un ahilouleh ka galsat hotoh ikimuto diu ahi! ati. 19 Israel ten adonbut un, keiho lamlen a bou kaum diu ahi. Ka gancha teuvin twi adon ujongleh aman kapeh diu ahi. Na gamsung bou nei jotsah un. Hiche bou chu kangeh u ahi.” ati. 20 Amavang Edom lengpan hitin ahin donbut in, “Kikhin doh un! Ka gamsung na hopa theilou diu ahi.” Hiche ahou lim jou chun agalsat hotoh akitolun Israel mite chu ano tauvin ahi. 21 Ajehchu Edom in Israel ten agamsung ahopa diu anompon, Israel te chu hunam in akilehei sah tan ahi.

22 Israel mipi chu Kadesh apatnin akinung le un Hor molsang chu alhung tauve. 23 Chuin Edom gam ning lam ah chun Pathen'in Mose le Aaron heng'ah aseijin, 24 Aaron dingin thina a apu apa tetoh akichol khomna ding phat ahunglhung tai. Keiman Israel te kapehna gam chu lut louding ahi, ajeh chu Meribah a twi chung changa ka thupeh dounan nangni na chon lhon tan ahi. 25 Tun Aaron le achapa Eleazer chu Hor molsang lam ah puitou tan. 26 Hiche mun a chu nangin Aaron athemputna von chu na sutlhah a achapa Eleazar na vonpeh ding ahi. Chumun’a chu Aaron thi ding apu apate toh kigom ding ahitai. 27 Hichun Mose’n Pathen'in aseipeh bang tah chun abol tan ahi. Amaho thum chu Hor molchung lam'ah akaltou u mipin avetvin ahi. 28 Molchung ah chun, Mose'n Aaron thempu von chu asutlhah peh in Aaron chapa Eleazer chu avonpeh tai. Chuti chun Aaron chu molchungah chun athi tan, chule Mose le Eleazer chu ahung nungkum lhon tai. ✡Potdohbu 29:29; Minbu 33:38; Danbu Ni Na 10:6 29 Mipi hon Aaron athi tai ti ahetchen phat un, Israel miten ni somthum jen alunghempi tauvin ahi.