22
Balak In Balaam Kou Dia Mi Asol
1 Hichun Israel mite Moab phaicham langa akitol un Jordan solam Jericho mun’a chun abusa tauvin ahi. 2 Moab mite lengpa Zippor chapa Balak in Isreal miten Amor mite chunga anatoh jouseu amu sohkeije. 3 Chule Moab miten Isreal mitampi ahung kitol'u amu phat uchun tijatnan adimset tauvin ahi. 4 Moab lengpa chun Midian lamkai ho kom'ah aseijin, “Hiche mipi khun bongchal in hampa abahgam banga amu chan'u abahgam diu ahi!” ati. Hijeh chun Moab lengpa Balak in, 5 Thupole ho jah a Beor chapa Balaam henga thu athot in, ama chu Ephrates Vadung koma Pethor gam'a cheng mi ahi. A thu thot chu: “Veuvin, hiche mipi ho hi Eygpt apat ahunglhung tauve. Amaho hin leiset pumpi alo dim tauvin chule amaho eigih uvin ahi. ✡Minbu 31:8; 2 Pet 2:15,16; Jde 1:11 6 Lungset tah in hungin lang Isreal mite hi hung gaosap in ajeh chu keiya dingin ahatval un ahi. Hiche teng chule keiman amaho chu kajo a hiche gam'a konna hi kadel mang thei ahi. Na phatthei bohte aphatheiyun, chule na gaosap mite chunga hamsetna achuji e ti ken kahei. 7 Balak thu thot pole Midian le Moab upaho chun sum le pai apo uvin Balaam chu peh a Israel te gaosap sah dingin akondoh athupoh uchu aga lhut tauvin ahi. 8 Balaam in adonbut in “Tujan hikom'ah gehden tauvin,” ati. “Jingkah teng Pakaijin iti eilamhil kaseipeh diu ahi,” ati. Hijeh chun Moab upaho chu Balaam kom'ah aumden tauvin ahi. 9 Hiche jan chun Balaam hengah Pathen ahungin, “Nahungvil uva hiche miho hi koiba hitam?” tin adong'e. 10 Balaam in Pathen hengah, “Zippor kitipa chapa Moab lengpa Balak in hiche thu ho hi eihin thot e: 11 'Vetan, Eygpt apatna hung kipat doh mihon hijat aum uvin chuleh ama hon vannoi pumpi alo dim tauve. Hiche mipi ho hi hung gaosap in, hung temin chuti leh keiman amaho chu ka nodoh jou thei khat leh tia eihung tep ahiuve,' ahiuve ati. 12 Ahinlah Pathenin Balaam chu ahin houlimpi tan, “Amaho toh nakilhon louding ahi. Hiche mite hi Pathen phatthei chang ahi tauvin amaho na gaosap louding ahi!” ati. 13 Ajing jingkah in Balaam in Balak mi hung lamkai ho kom'ah, “Nangho in lam a che tauvin! Pathenin nangho toh chekhom din ei phal poi,” atitai. 14 Hichun Moab lamkai milun ho chu Balak lengpa kom'a din akinung le tauvin chule thu alhut un, “Balaam chu keiho toh hung lhon khom dingin anompoi,” atiuve. 15 Balak in khatvei apatep kit e. Hiche chunga hin Balak in amasa a sangin migun tamjo asol'in ahi. 16 Amaho chu Balaam heng'ah acheuvin hiche thu ho hi aga lhut tauve: “Hiche hi Zippor chapa Balak sei ahi: “Lungset tah in ka kom'a nahunga nei kithopina din imachan nasuboi hihhen. 17 Keiman nangma hoitah a tohman ka bolpeh ding nahin chule ipi hita jongleh nangman bollin nati chan chu kabol peh ding ahi!” ati. 18 Ahinlah Balaam in Balak thupole ho chu hitin adonbut in, Balak in aleng-in dim'a sana le dangka toh eipehtha ding hijongleh Pakai ka Pathen douna a thil boltheina ding ima thaneina kaneipoi. 19 Hijongleh jan khat umbe nalaiyun, Pakaijin kahenga ipi seibe ding anei nahlai em ve ing'e,” ati. 20 Hiche jan chun Balaam heng a Pakai ahungin, “Hhiche milun ho hi naheng’a dinga hung kholjin ahitah jeh un, nangma kipatdoh inlang amaho toh chekhom tan. Ahinlah nangman Ka sei bou nabol ding ahi, ati.
Balaam Leh A Sangan
21 Chuti chun ajingin Balaam athoudoh in, asangan a atoudoh in Moab mite lamkai ho chutoh akipat doh tauvin ahi. 22 Hinlah Balaam in alhonpiu jeh chun Pathen alunghang in, hijeh chun Pakai Vantil asol in lamlen laitah a Balaam alamtin tan ahi. Balaam chu asoh mini toh kilhon ahin, 23 Balaam sangan chun Pakai Vantil lamlen na adin a chemjam akhut a achoi chu amudoh tan ahi. Hichun lamlen a kon'in phailei lam'ah achomlha tan, ahin Balaam in sangan chu ajep in lamlen'ah ahin puilut kit tan ahi. 24 Chuti chun Pakai vantil chu lengpi lei teni kikah a leibang kichi lai achun ana ding tan ahi. 25 Sangan chun Pathen vantil chu amu phat in, aki toldoh kigon Balaam keng le bang chu anombeh khatai. Hijeh chun Balaam in sangan chu ajep kit tan ahi. 26 Chuphat in Pakai Vantil chu agamla jep a akichi chehna mun sangan lhaidoh thei louna ding mun achun ading kit tan ahi. 27 Hiche ahin Sangan in Pakai Vantil chu amu phat in, Balaam noija akol tan ahi. Balaam chu alunghang lheh in sangan chu ajep kit tai. 28 Hichun Pakaiyin sangan chu thusei theina apetai. Balaam chu ahin dongin, “Thumvei jen nei jepna dia ipi suhkhel kanei hitam?” ati. 29 “Nangin kei angol banga neiso tah hila!” tin Balaam akisen e. “Chemjam chu kako hileh katha ding nahi tai!” ati. 30 Sangan chun adonbut in, “Na damsung’a natou jingna sangan chu kahi, keima nidanga chu hitobanga hi kaum khah em? ati. Balaam in adonbut in “Naum khapoi,” ati. 31 Chuin Pakaijin Balaam mit chu ahin hadoh sah tan, hichun Balaam in Pakai vantil lamka laiya adin’a chemjam akhutna akichoi chu amu tan ahi. Balaam akunlhan Pakai angah abohkhup tan ahi. 32 Pakai Vantil chun, “Ipi bolla na sangan chu thumvei jen navoh hitam?” tin adong tan ahi. “Ven, Keima nalampi subing'a hunga kahi ajeh chu nangman louchal tah in nei deh tai. 33 Sangan chun thumvei jen eimu ei peldohji; chutilou leh, Keiman Sangan hi kahing hoiya nangma hi katha doh ding nahitai.” ati. 34 Hichun Balaam in Pakai vantil kom'a chun ngaidam athum tan, “Keima kachon khel tai. Keiman ka lampia neina tin chu ka hetdoh lou ahi. Ka chena hi na deilou ahin keima kile tang'e,” ati. 35 Ahilah Pakaijin Balaam chu aseipeh in, “Hiche miho toh hin kilhonin, ahinlah Ken seijin kati bou nasei ding ahi.” ati . Hichun Balaam chu Balak milun ho chutoh achekhom tan ahi. 36 Balak Lengpa in Balaam chu ahung ahet phat in, gamgi ningchong pen mun Arnon Vadung a Moab te khopi a chu kimupi din akondoh tai. 37 Balak in Balaam thudoh aneitan “Keima henga gang tah a nahung na dinga kahin kou hilou ham? Ibol’a nahung jeng louham?” ati. “Keiman kipaman tamtah peh dia kasei chu na tahsan louham?” ati. 38 Balaam in adonbut in, “Ven, keima ka hung tai, ahinlah keiman kanop nop seitheina tha kaneipoi. Pathen'in ka kam a akoi bou kasei doh ding ahi bouve,” ati. 39 Hichun Balaam in Balak chu Kiriath-huzoth chan akilhon pin, 40 hilai mun a chun lengpan kelngoi le bongchal atohdoh e. Aman hiche sa themkhat chu Balaam toh alhonpi ho chu apen ahi. 41 A jing jingkah chun Balak in Balaam chu Bamoth-baal molchunga apuidoh in ahi. Hiche mun apat a hi lhang langa Israel mite hung kitol chu kimu ahi.
DRAFT COPY