1 Mose’n Israel chate phung upaho akouvin aseipeh in, hiche hi Pakai thupeh ahiye: 2 Na lah uva pasal khat touvin Pakaiya kitepna aneiya ahilouleh kihahselna noiya kitepna anei leh apalkeh thei louhel ding ahi. Aman aseidohsa bang bang’a chu abol ding ahi. ✡Danbu Ni Na 23:21-23; Matt 5:33 3 Chule numei khat in apa insunga achen laiya Pakaiya kitepna anei khah a, 4 chule apan akitepna chu ajah a phamo asah louleh akitepna bang bang'a um ding ahi. 5 Ahinlah hiche numei nun kitepna anei chu apan ajah a alunglhai louleh, akitepna thulah louva um ding ahi. Apan abulhit dia pha asahlou jeh a Pakaiyin amanu chu angaidam ding ahi. 6 Tun avetsahnan numei khangdong khat in kitilkhouna thei tah kitepna neijin akikan gah in chujou chun ajinei tan ahi. 7 Khonung’a ajipan hiche kitepna chu ahin hetdoh a phamo asah louva ahile, amanu kitepna chu kisudet jing ding ahitai. 8 Ahinlah amanun kitepna asemdohsa chu ajipa’n ajahdohni nia adeipeh louva ahile, Pakaiyin ahile hiche akitepna thudol'a chu amanu angaidam ding ahi. 9 Iham tia meithai ahilouleh aji in ada ahileh, akitepna chu asuh bulhit ding ahi. 10 Ahinlah tekah khat in numei chun ajineina insunga kitepna neijin kikan gehna anei tan ahi. 11 Ajipan ajinu kitepna chu ahetdoh nung jenga jong phamo asah louva ahile, akitepna chu keh theilou ding ahi. 12 Ahinlah ajipan adeisah peh louva ahile hiche akitepna thudol'a chu Pakaijin amanu angaidam ding ahi. 13 Hijeh a chu ajipan aphatsah peh thei adeimo peh thei dungjuiya amanu aum thei ngai ahi. 14 Ahinlah ajipan ahin jahdohni a phamo asah louva ahile amanu kitepna jouse chu anoppeh ahitai. 15 Ama pan amanu kitepna ho manmo sopehna dinga nikhat val anga nalaiya ahile, amanu themmona theiya chu amapa joh gotna chang ding ahi. 16 Hiche dan ho hi Pakaijin Mose apeh pasal le ajinu kah, chule mipa le achanu toh insunga achenkhom laiya chon dan apeh ho chu ahi.