1 Nikhat hi mihonpi kikhom chu amu phat in, Jesu chu moul chung a akaldoh in chule atou phat in aseijuite chu akimvel'a ahung kikhom un ahi. 2 Chuin Ama apaodoh in amaho chu hiche thu hi ahil pan in, ajah uva asei tai.

3 “Lhagaova vaichaho Pathenin phatthei aboh diu ahi, ijeh inem itileh Van Lenggam chu amaho'a ahi. 4 Lhasetna neiho Pathenin phatthei aboh diu ahi, ijeh inem itileh amaho chu lhamonga um diu ahi.✡Isa 61:2 5 Mi lungneng ho Pathenin phatthei aboh diu ahi, ijeh inem itileh ama hon leiset chung pumpi alo diu ahi.✡Labu 37:11 6 Thudih a din jeh a gilkel dangchah thoh ho Pathenin phatthei aboh diu ahi, ijeh inem itileh ama hon lung nachimna anei diu ahi.✡Isa 55:1,2 7 Mi lungset them ho Pathenin phatthei aboh diu ahi, ijeh inem itileh amaho chu lungsetna chang diu ahi. 8 Mi lungtheng ho Pathenin phatthei aboh diu ahi, ijeh inem itileh amahon Pathen amu diu ahi.✡Labu 24:3,4 9 Mi sucham ho Pathenin phatthei aboh diu ahi, ijeh inem itileh amaho Pathen chate kiti diu ahi. 10 Adih bol jeh a hesohna chang ho Pathenin phatthei aboh diu ahi, ijeh inem itileh Van gam chu amahoa ahi.✡1 Pet 3:14 11 Kanung jui nahi jeh uva mihon nahouset uva, nabol hesoh uva, jouva nabol'uva chule nang ho douna a thil phalou jouse aseiteng uleh Pathen phatthei boh chang ding nahiuve.✡1 Pet 4:14 12 Nang ho kipah thanom'un chule hapan kipah uvin, ajeh chu van a nasan dingu kipaman alen e. Ajeh chu amahon themgao masaho jong chu hitobanga hi anabol hesoh'u ahi.✡2 Thusimbu 36:16; Act 7:52

13 “Nangho leiset chi nahiuve. Hinlah chi chu a alna bei taleh ipin ki alsah kit tantem? Chule ima chan phachom tapon tin, paimang le miho chotpha bep hi ding ahi.✡Mk 9:50; Lk 14:34,35 14 ‘Nang ho vannoi vah nahiuve, lhang vuma khopi kisel theilou tobang chu nahiuve.’✡Jn 8:12; 9:5 15 Koiman thaomei avah in chujouleh lo akhu khum jipoi. Hisang chun akhom chunga aki tung in, insunga um jouse avah chun asalvah jin ahi.✡Mk 4:21; Lk 8:16; 11:33 16 Hitobang chun navah uchu miho masang ah kilang hen, chuteng amahon na thilpha bol uchu mu uvin tin, van'a um na Pau chu avahchoi diu ahi.✡1 Pet 2:12

17 “Ipi jeh a hunga kahi nei hekhel hih un. Keima hi Mose Danbu ahilouleh themgao ho lekhajih subei dinga hung kahipoi. Asumang dinga hunga hijo louva, asubulhit a hung kahijoi. 18 Tahbeh a ka seipeh nahiuve, Van le leiset aman masanga Pathen Dan thu chu aguilhun sohkei masang sea, ajem neopen le ajem sipah geiya jong mang lou ding ahi.✡Lk 16:17 19 Nang man thupeh aneopen na nahsah moa chule midang jong hitia chu nahil'a ahileh, Van gam'a chu aneopen nahi ding ahi. Hinlah koi hijongleh Pathen Dan thu juiya chule hiche ho chu ahil'a ahileh Van gam'a alen kiti ding ahi. 20 Hinlah kahil chah nahiuve. Nangho na chonphat nau chu Dan thuhil ho le Pharisee ho sanga aphat joh louva ahileh Van gam'a chu nalut louhel diu ahi.

21 “Nanghon ipu ipateu jah a, ‘Tolthat hih in, koi hijongleh mithat chu thupi tanna dinga kicha jinga um ding ahi’ tia ana kiseipeh chu naja tauve.✡Potdohbu 20:13; Danbu Ni Na 5:17 22 Hinlah keiman nangho jah a ka seipeh nahiuve, koi hijongleh khat chunga lunghanga chu athu kitan ding ahi. Nangman koi ham khat chu mingol panna bei nati leh thutanna mun'a kipuilut ding kicha a um ding nahi. Nangman mi na gaosap a ahileh Damun meidil'a kicha a um ding nahi. 23 Hijeh chun nangman Hou-In a maicham thilto ding nachoiya, mi koiham khat in nangma kilung doupina nanei na geldoh a ahileh, 24 Maicham mun'a na thilto ding chu dalhan, gachen chuche mi chutoh gakicham in, chutengleh hungin chule Pathen maicham'a kilhaina thilto chu napeh ding ahi. 25 Na kidoupi chutoh thutanna mun'a dinga na kilhonpina lampia chun, aganna theiyin kihou champi jengin. Achuti louleh themmo na chanpa chun thutan vaihompa khut a napedoh intin, ama chun amopo khat khut a peson intin, chule songkul a na khumpai ding ahi. 26 Hiti chu hita henlang hileh, nangman achaina pen sum nasah chai masang sea chu itinama jongleh chua konna chu nalha ong thol kit louding ahitai.

27 “Thupeh a thu ana kiseisa, ‘Nangman jonbol hih in’ kiti hi nana ja tauve.✡Potdohbu 20:14; Danbu Ni Na 5:18 28 Hinlah keiman ka seipeh nahiuve, koi hileh numei khat jon lunga ve achu amanu chutoh alunga jong ahitai. 29 Hijeh chun namit chu mitpha hikhat tou jongleh hichun na kipal lhuhsah a ahileh, kaldoh in lang paimang jengin, nangma dingin natibah khat namansah chu na tahsa pumpi damun a akilelut sangin aphajoi.✡Matt 18:9; Mk 9:47 30 Chule nakhut jetlam in na chonset sah a ahileh satlhan lang paimang jengin. Ajeh chu nangma dinga na tahsa pumpi damun a akilelut sangin, natibah khat aman chu aphajoi.✡Matt 18:8; Mk 9:43

31 “Danbua thu kisun, ‘Pasal in ajinu ada ding leh amanu chu dana lekha apeh a ahetsah leh ahithei jenge’ tia kisei chu naja tauve.✡Danbu Ni Na 24:1-4; Matt 19:7; Mk 10:4 32 Hinlah keiman kasei ahi, mikhat in aji chu pasal dang toh alup khom jeh tilouva thu dang jeh a ada ahileh, amanu chu ajonsah ahitai: chule koi hijongleh akidasa numei kichenpia chu mijong ahi.✡Matt 19:9; Mk 10:11,12; Lk 16:18; 1 Crth 7:10,11

33 “Chule malai mite kiseipehsa thu nana jahsau chu, ‘Nangman nakihahsel na chu sukeh hih in, nangman Pakaiya na kihahselna nabulhit tei ding ahi’ kiti ahi.✡Thempu Dan 19:12; Minbu 30:2; Danbu Ni Na 23:21 34 Hinlah keiman ka seipeh nahiuve, imachan kihahsel hih beh un! Van pan in kihahsel hih un, ajeh chu van chu Pathen laltouna ahi.✡Jac 5:12; Isa 66:1; Matt 23:22 35 Chule leiset pan in kihahsel hih un, ajeh chu leiset hi akengto ngapna ahi. Chule Jerusalem pan in kihahsel hih un, ajeh chu Jerusalem hi Leng loupi khopi ahi.✡Isa 66:1; Labu 48:2 36 Ka luchung pan beh a kaki hahsel ding hitante ti hih in. Ajeh chu nangman na samjang khat cha jong nakan sah theilou chule na vomsah theipoi. 37 Hinlah na kihoulim nau chu ‘Henge, kanom e ahilouleh ka nompoi’ tia sei chu hijeng hen. Hicheng kalval chu agiloupa a kon ahi.

38 “Dan thun gimbolna chu atotoh hi ding: Mit khat khel'a mit khat, chule ha khat khel'a ha khat hi ding ahi kiti chu naja tauve.✡Potdohbu 21:24; Thempu Dan 24:20; Danbu Ni Na 19:21 39 Hinlah ka seipeh nahiuve, migilou lethuh hih un! Koiham khat in na ngeiphe jetlam abeh'a ahileh, na ngeiphe alang khat jong dopeh in. 40 Chule koi hileh nahehse aum a chule na sangkhol ah alah manga ahileh na ponchol jong chu pehtha jeng tan. 41 Chule sepai khat in athilpo dia nacham louva, mile khat napui leh mile ni chan gathah peh in. 42 Na henga thum ho chu pen, chule nangma koma bat a thum chu kihei mangsan go hih in.

43 “Danbu in, ‘Naheng nakom ngailun’ chule namelma chu hot bol in, tia asei chu naja tauve. 44 Hinlah keiman kasei ahi, na melma teu chu ngailu uvin, na gaosap teu chu phatthei boh un, na hotbol teu dingin thilpha bol un, chule nahsahmo tah a nabol teu le na gimbol teu dingin taovun. 45 Hitia na bol uchu nangho van'a um na Pau chate tahbeh nahiu kihetna ahi. Ajeh chu Aman migilou le mipha chunga nisa vah apen, chule midih le midihlou chunga jong go ajuhsah in ahi. 46 Nang hon na ngailu teu bou na ngailut uva ahileh, hichea chu ipi kipaman nasan diu um ding ham? Kaidong hon jong hitobang chu abolu ahi. 47 Nangho nagol teu dinga bou na phat uva ahileh, midang to ipi naki kheh nau um em? Hitobang chu milim hou hon jong abolu ahi. 48 Hijeh chun van a um na Pau chamkim ahi bangin, nangho jong chamkim un” ati.✡Thempu Dan 19:2; Danbu Ni Na 18:13