85
Hepina Le Huhhingna Dia Taona.
Korah chilhah te labol.
1 Pakai nangin na gamsung'ah phatthei bohna na sunglhan ahi!
Hiti chun nangin Israel phatthei naboh in ahi.
2 Nangman na mite chonsetna na ngaidam'in—
hichun achonset nau jouse na lekhu peh e.
Selah
3 Nangin nalung hanna natuh tang'in,
nalung hanna deujah jeng chu naki khamji e.
4 Eisuhal kit uvin, eihuhhing pau O Pathen.
Ka chung uva nalung hanna tolmang kittan.
5 Kachung uva na lunghan jing jeng ding ham?
Nalung hanna khang jouse chu naum sah jing jeng ding hitam?
6 Na mite kipah le thanom'a aum jing theina ding a,
Nei suhhal kit lou diu hitam?
7 Vo Pakai, na mingailutna longlou chu nei musah in,
na mihuhhingna jong neipe uvin.
8 Chingthei tah in Pakai Pathen thusei chu kangaiye,
ajeh chu Aman mikitah ho kom'ah chamna thu aseiye.
Ahinla amaho angol nau lampi ah kilekit dauhen.
9 Tahbeh in Ama gingte dingin huhhingna hi naicha uma ahin,
chutileh igamsungu jong aloupina dim ding ahi.
10 Ngailutna longlou leh thutah akimuto e.
Chonphatna le chamna akichopto lhon e!
11 Kitahna hi leiset a kon'a hung doh ahin,
chuleh chonphatna chu van'a kon a mai lhaisel'a hung kumlha ahi.
12 Adih e, Pakaijin phatthei boh hi ahin lonlhah sah ahi.
Gam leiset a hi ninglhing tah a ahin gadoh sah a ikisan jiu ahi.
13 Chonphatna hin Pakai hung na ding,
semtohna ding nikho asap masat ji ahi.
DRAFT COPY