94
Pakaijin Amite Dinga Phu Alah Ding.
1 O Pakai, phulaji Pathen,
O phulaji Pathen, na thutanna dihtah loupi tah chu hung kilangdoh hen!
2 Thoudoh in, vannoi thutanpa.
Mi kiletsah ho chu achan ding dol u chansah in.
3 Itih chan, O Pakai?
Itih chan hi miphalou ho kipah diu ham?
4 Itih chan kiletsah tah a thu asei diu ham?
Hiche migilou ho hi itih chanpi kihatsah diu ham?
5 Pakai, ama hon na mite asuchip gam tauve,
nangma mite ho hi ama hon a sugentheiyun ahi.
6 Ama hon meithai ho leh gamdang mi
chule chaga ho athat gam'un ahi.
7 Ama hon aseiyun, “Pakaijin eive pouve,
chule, Israel Pathen'in anahsah poi.”
8 Kigel phakit un, mingol ho!
Itih tah le nahin hethei diuvem?
9 Na nakol sempa chu—a nangong ham?
Namit sempau chu—amitcho a ham?
10 Aman chitin namtin te ana engbol in—nang jong na engbol louding ham?
Aman ima jouse ahesohkei in—nangin ipi nabol jong ahet sohkei louding ham?
11 Pakaijin mitin lunggel ahesohkei e;
imacha phatchomna neilou ahi ahesohkei e!
12 Pakai, na danthu a nahil ho leh,
na suhdih ho chu iti kipa uhitam?
13 Migilou te kimatna ding leikotong akilai kahsen
nangman amaho chu boina a kon'in lung olna nape e.
14 Pakaijin amite nungsun ponte;
Aman ami deitumte donlou in koi ponte.
15 Thutanna mun a thudih kimu ding,
chuleh michonpha ho jousen apanhu diu ahi.
16 Gitlouna akon a koi ham eidal ding?
Miphalou ho masang'a eidinpeh ding koi ham?
17 Pakaijin eina kithopi lou hile,
keima thina lhankhuh mun a thipchet a ana kicholdo tading kahi.
18 “Keima ka lhutai” tin kakap jah e!
O Pakai, na mingailutna longlou chun, eiphong dingin ahi.
19 Keima lungdonna a kadim teng,
na milungmonna chun kinepna le kipana eipeji e.
20 Dandih louva natong lamkai ho chun—
Pakai kalang'a pang ding ahi ati ngamna diuvem?
21 Themmona beiho dou din amaho akiloikhom'un
mona neilou chungah thina chan'in athepmo sah uve.
22 Ahin Pakai chu ka kulpi ahin;
ka Pathen hi ka kiselna songpi chu ahi.
23 Pathen'in migiloute achonset nau chu alethuh ding ahi.
Achonset nau jeh a asuhgam ding ahi.
Pakai, I-Pathen uvin asuhgam dingu ahi.
DRAFT COPY