1 Chuphat in keiman Kelngoinou chu Zion Mol chunga adin kamun, chule Ama chutoh mi sang jakhat le sang som li le sang li chalpanga Ama min le Apa min kijih chu kamun ahi.✡Ezekiel 9:4; Rev 7:3 2 Chule keiman vana kon twikhanglen kinong gin tobang leuva hugin ahilouleh van-gin kitol tobang chu kajan ahi. Hiche gin umdan chu selangdah tampi kitumging tobang leuvin ahung kithongdoh in ahi. 3 Hiche lasaho tamtah chun lathah kidangtah chu Pathen Laltouna masangleh Hinnanei li ho masang chule upa somni le li ho masanga chun asauve. Hiche la hi koimacha dang in sathem theilou mi sang jakhat le sang som li le sang li leiset a kon lhatdam changho bouvin asahtheiyu ahi. 4 Amaho hi nungah-thengsel ho tobanga kivet tupna nei ahiuvin, Kelngoinou chu achena chan-a juiya ahiuve. Amaho chengse hi vannoi leiset mitea kon'a Pathen le Kelngoinou dinga kikatdoh theng lhatdam changsaho chu ahiuve. 5 Amaho hi jou seikha louhel, nolna beihel hinkho mang ahiuve.✡Zephaniah 3:13

6 Chule keiman vantil chom dang khat vantham jol'a lenglelea tonsot Kipana Thupha chu hiche vannoi mite namtin, phungtin, paotin, chule miho jah a, 7 “Pathen gingun, Amaa loupina peuvin. Ijeh ham itileh Aman thu atanna ding phat hunglhunga ahitai. Vanho le leiset, twikhanglen le twinah ho jouse sempa chu Hou un,” tin asamin ahi. 8 Chujouvin vanlai jol'a vantil chom dang khat in ama chu ajuiyin, asamin, “Babylon hi achim-a ahitai, chuche khopi lentah chu achimtai, ajeh chu amanu hin vannoi namtin jouse ajonthanhoi jeh'a lunghanna lengpiju chitin namtin le phungtin adonsah ahi,” ati.✡Isa 21:9; Jeremiah 51:8; Rev 18:2 9 Chujouvin vantil thumna chun amani nung chu ajuiyin, asamin, “Koi hileh sahem le alim chu Pathen houva hou ahilouleh amelchihna achalpang ahilouleh akhut jetlam'a kibeh achun, 10 Pathen lunghanna khon'a chu lhingsetna kisung lha a umsa chu adon ding ahi. Chule amaho chu mei le kath'a Kelngoinou le avantil thengte masanga chu kisugim diu ahi.✡Isa 51:17; Semtilbu 19:24; Ezekiel 38:22 11 Amaho kigimbolna meikhu chu a-itih a ding ahi, chule amaho kigimbolna chu sun le jana angah tih umlou ding ahitai, ijeh inem itileh amaho chun sahem le alim chu ahou'un chule ama melchihna akisan uvin ahi.✡Isa 34:10 12 Hiche hin Pathen mithengte chun gimbol hesohna thoh hattah'a athoh diu, athupeh ho anit diu, athupeh ho anit uva chule Yeshua atahsan nauva alung-u angapdet diu ahi. 13 Chule keiman vana kon in aw khat in hitia asei kajai,

“Hiche hi jihdoh in: Tua pat'a Pakaiya thiho anunnomui. Ahiye, tin Lhagaovin aseiye, amaho anunnom monga ahiuve, ijeh inem itileh amaho anatoh gimnauva kon'a kicholdoa ahitauvin; athilpha boluvin anung-u ajuiye.” 14 Chujou chun keiman meibol bangleh khat kamun chule meibol chunga toupa chu Mihem Chapa lheh lheh ahi. Ama chun Sana lallukhuh alua akikhuh in chule akhut a chun koite hemtah khat akichoi in ahi.✡Daniel 7:13 15 Chuphat in vantil chom dang khat Hou-in a kon chun ahungin, meibol chunga toupa chu asamin, “Koite chu kilap pantan, ijeh ham itileh chang atphat chu hunglhunga ahitai: leiset chunga chang ga chu min ahitai,” ati.✡Joel 3:13 16 Hiti chun meibol lah'a toupa chun akoite chu leiset chunga chun alampan in, chule leiset pumpi chu akiat chaitai. 17 Hiche jou chun, van Hou-in a kon chun vantil chom khat ahungin, chule ama jong chun koite hemtah khat aneiye. 18 Chuphat in vantil chomkhat, meiya kon'a suhmang theina thaneina neipa chu maicham'a konin ahunge. Ama chun koite hemtah choi vantil chu ahinsamin, “Na koite chu tun kilap pan in lang leiset lengpiga aboh a konin khom khomtan, ijeh ham itileh athutan dinga min'a ahitai,” ati. 19 Hiti chun vantil chun akoite chu leiset chunga chun alampanin, chule lengpiga chu Pathen lunghanna lengpiga hehna a chun asepluttan ahi. 20 Lengpithei gaho chu khopi pamlam'a lengpiga hehna a akichillut tan, chule lengpiga hehna a kon chun thisan chu vacha hunglongdoh bangin; mile jakhat le somget saovin twilon in alongin, chule sakol kamdal chan ahung geidoh in ahi.✡Isa 63:3; Ka La 1:15; Rev 19:15