1 Hicheng jou chun, van'a mipi atam'a tam awgin tobang kisam ging chun, “Pakai chu vahchoiyun, Huhhingna le loupina chule thahat thilbol theina chu I-Pathen uva ahi. 2 Athutanna ho adih in chule akitah e. Aman numei kijoh minthangnu, ajonthanhoina a leiset subohnu chu gimbolna apetai. Asohte that a pangnu chunga aman phu alatai.”✡Danbu Ni Na 32:43; 2 Lengte 9:7 3 Chule amaho awgin chu ahung kithongdoh in, “Pakai chu vahchoiyun! Chuche khopia kon'in ameikhu chu tonsot atonsot a dingin akaltoutai,” ati.✡Isa 34:10 4 Chujou chun Upa somni le li leh hinna nei liho chu abohkhup un chuin laltouna a toupa Pathen chu ahouvun ahi. Amaho chun asam'un, “Hihen, Pakai chu vahchoiyun,” atiuve. 5 Chule laltouna a kon chun aw khat in, “I-Pathen u chu asohte jousen, Ama ging jousen, aneopen a pat alenpen geiyin, vahchoiyun,” atiuve.✡Labu 115:13

6 Chuphat in keiman mihonpi khosap aw tobang kajan, twikhanglen kinong gin ngaitah tobang'in, van gin kithong gin tobang chun, “Pakai chu vahchoiyun, Ajeh chu Pakai I-Pathen'u, Hatchungnung chun vai apotai.✡Ezekiel 1:24; Labu 93:1; 97:1; 99:1 7 Eiho kipah uhitin, chule thanopna neiyuhite, chule Ama jabolna peuhite. Ajeh chu aphat, Kelngoinou moupui golvah ankong umkhomna ding chu phat hunglhunga ahitai, chule Aji dingnu jong kigosademin aumtai. 8 Amanu chu tupat ponnem hoipen tah athengsel bangleh chu akipetai,” tin aseiye. Ijeh ham itileh tonjih ponnem hoitah chun avetsah chu Pathen mitheng te thilpha bol chu ahi. 9 Chule vantil chun kajah a, “Hiche hi jihdoh in: Kelngoinou moupui golvah an nedia akikou ho chu anunnom ahiuve,” tin aseiye. Chuin aman aseiben, “Hiche ho hi Pathen a hungkon thu tahbeh chu ahi,” ati.✡Matt 22:2,3 10 Chuphat in keima ka bohkhup in ama chu hou kagotai, hinlah ama chun, “Ahipoi, keima neihou hih in. Keima nangma tobang bep nasopi te lah a Jesu tahsan'a ahettohsah a pang Pathen soh khat kahi. Pathen bou houvin. Ajeh chu themgao thusei lona jeh chu, Jesu thu kichentah a hettohsah a pan hi ahi,” ati.

11 Chujou chun keiman van akihonna chule sakol kang khat chuche mun'a adin chu kamun ahi. Achunga toupa chu Tahsan umtah le Adih ahi, ajeh chu Aman dihtah a thu atan ahin, chule chonphatnaa gal asat ji ahi.✡Ezekiel 1:1; Labu 96:13; Isa 11:4 12 Amit teni chu meikou tobang ahin, chule aluchunga lallukhuh tampi aumin ahi. Achunga min khat akijih in, hichu Ama tailou koima dangin ahechenpoi.✡Daniel 10:6 13 Aman ponsil khat thisan'a kidelut chu akisilin, chule aminput chu Pathen Thu akiti. 14 Van sepaite, tupat ponnem bangleh hoipen tah le thengsel in akivonun, sakol ho chunga atou un ahi. 15 Akama kon'in chemjam hemtah ahung potdoh in chitin namtin asatchap gamin ahi. Aman amaho chu thih tenggol a vai apoh ding ahi. Aman Hatchungnung Pathen lunghanna nasatah chu lengpi hehna a kon'a lengpitwi hung longdoh banga ahin lhadoh ding ahi.✡Labu 2:9; Isa 63:3; Joel 3:13; Rev 14:20 16 Aponsil le amal bul a hiche: “lengho Lengpa le pakaiho Pakaipa” thu hi akijih in ahi. 17 Chujou chun keiman vantil khat nisa noiya adin kamun, muthong lengleho henga asamin, “Hunguvin! Pathen'in agonsa golvah loupitah a hin hung kikhom uvin.✡Ezekiel 39:17-20 18 Hungun lang lengho le agal lamkaiteu chule gal hat ho, chuban a asakol hou le achunga touho; chule mijouse chamlhat le soh ho, alen le aneoho tahsaphe hung neuvin,” ati. 19 Chuphat in keiman sahem le vannoi lengho chule asepaiteu chu sakol chunga toupa le galmanchah choite ho chu dou dingin akikhop khom u kamun ahi. 20 Chuin sahem chu aman tauve, chule ama toh chun themgaolhem, sahem thalhenga thil kidangtah tah bolpa–hiche thil kidang chu sahem melchihna kilah ho le alim houho jouse lheplhahna a kimang chu ahi. Chuin Sahem le athemgao lhempa chu anilhonin mei-al lenglung meikou sunga chun alehlut tauve.✡Rev 13:1-18 21 A sepai hou jouse chu sakol kang chunga toupa kamsung'a kon'a chemjam hemtah chun asatlih gam tauve. Chule muthongho chu mithiho tahsa lungna chimset in anetauvin ahi.