EZEKIEL
THEMGAO LEKHABU
Ezekiel Themgao Lekhabu Sung Thu Umdan
Pathen namlhen te chunga boina leh manthahna dingin aum kimvel laijin, Assyria, Egypt leh Babylon kivaihomna huinun chun Jerusalem dinmun chu asuling lau lheh jengin ahi. Vaihom lenglen ho akikhel toh lhonin Pathen in amite khoto najal chun amahon ahinle bel kit theina diuvin themgao ho mangchan ana kou jingin, hiche lah a chun Jeremiah, Ezekiel leh Daniel ho jong ana mangchan ahi. Hinlah hiche kouna nahsahmo a aum jing jeh u chun Pakaiyin Babylon lengpa khutna apedoh tauvin ahi (2 Chron. 36:15-17).
Ezekiel lekhabu hin Pathen in ami Israelte hi hoilai mun hijongleh adel a ahinle puiji thu ahilchen in ahi. Pathen in amite vamang na a konna akhonna kheh teng achungthu atan ji ahi. Hinlah Pathen in achungthu tan sanga angaidam nom ji ahin, hinlah lonlouva athunun lou teng uleh achungthu u atana ajep ji ahi. Hijeh chun Pathen in migilou ho thina chunga kakipah pon, ahin midihlou chun adihlouna a konna akisih a ahung kile leh sohcha ding, amavang midih jong chun chonset abol tahle achonset manna thiding ahi ati (Ezekiel 18:23-32). Hijeh a chu mipi akisih a achungthu kitanna a kon hoidoh theina ding kinepna jal'a, lungneng tah leh khoto tah a amite “hung kinung heijun, nathi diu kanom poi” tia kou jing ahi.
Lekhabu Jihpa, Ajih Kum Chule Ajih Lona
Ezekiel bung khat - chang thum naa Ezekiel themgaopa jih ahidan akimu chen’e. Amahi thempu insunga hung kon Buzi chapa ahin, Babylon a sohchanga aum laiya gaothilmu aneija Pathen mite ang-a samphong dinga ngansena chang ahi. Amin – Ezekiel hin “Pathen in ahatsah,” ahiloule “Pathen a kon hatna chang,” tina ahi. Ezekiel lekhabu hi BC 593 leh 565 sunga kijih hidin ginchat ahi.
Ezekiel lekhabu hi isimleh ahilchet nom thilnga akimue: (1) Pathen in mihem mangcha’n mihemte mama ahoulimpi ji'e; (2) Gal lelna hihen, lungjinna hijongleh Pathen miten Pathen chu thanei chungnung ahi ti, asuhmil lou diu thudol ahil’e; (3) Pathen thusei hi aleng/asoi ngaipoi; (4) Pathen chu mun jousea um ahin, mun jousea hou thei ahi; chuleh (5) Mihemten phatthei channa din Pathen thungai-angaije ti aseidoh nom ahi.
1
Ezekiel In Pathen’a Kon Mu Anei
1 Juda mi Babylon gam Chebar vadung pang a sohchang ho lah a kana umna kum somle kumthum alhin kum July 31 lhinni achun van ana kihongin chule Pathen thilmu theina chu kana mui. ✡Rev 19:11 2 Hiche hi Jehoiachin lengpa asohchan jou kal kum nga lhin kuma chu soh ahi. ✡2 Lengte 24:10-16; 2 Thusimbu 36:9,10 3 (Pakaiyin hiche thuhi Buzi chapa Ezekiel thempupa kom a Babylon lenggam Chebar vadung panga aum petna anapeh ahin, chule Pakai khut chu achungah ana kingame)
Sahlama Kona Huipi Hungnung
4 Keiman kavet pettah chun Sahlam a kon huipi gopi nasatah ahung kitol kamun, Meilhang lentah masanga kolphe toh kitho a vah pempumin ahunge. Meilom lah a chun meikou aumin, chule meikou lailunga chun khichang tobang meikou vahlap lap aume.
Mihem Melpu Thilhing Li
5 Meilom lailunga kon chun mihem melput tobang thil hing thei li ahung doh e. ✡Rev 4:6 6 Maili leh lhaving li aneiyu tailouvin, 7 Akeng hou chu ajangpet in, akengphangu chu bongnou keng to abangin alange. 8 Alhaving li noicheh a chun mihem ho khut kamu doh e. 9 Ahingthei ho lhaving ho chu khat le khat akijop jel cheh in ahi. Khat cheh a chu akipat doh teng leh kihei louvin jangpet in masang lam ngan akijot jiuve.
Amai Uva Melso Dan
10 Amasang uva chun mihem mai aneiyun, ajetlang uva chun keipi mai aneiyun, aveilang uva chun bongchal mai aneiyun, chule anung lam uva chun muvanlai mai anei cheh uve. ✡Ezekiel 10:14; Rev 4:7 11 Khat cheh chun lhaving kijal doh kopni cheh aneiyun, kopn khat cheh chu akijal doh teng ganhing achom khat cheh lhaving chutoh akijop mat jel jengin, chule kop khat cheh chun atahsao akhu chah kheh cheh un ahi. 12 Amaho chu ipi hijongle lhagaovin alhenpeh nalam ngan ajet aveija kiheidoh lou hellin jangpet in ache pai jeng jiuve. 13 Ganhing liho chu meihol ampem puma kou abangin, ahilouleh meisel lou vah pempum kide abangin, chule kolphe vah bangin amaho lah a chun aki nungtol akima tollun ahi. ✡Rev 4:5 14 Chule ganhing liho chu kolphe vahlap lap bang khun achom le jap jap jeng uvin ahi.
Kang Lailunga Kang Um
15 Hitia keiman ganhing liho chu kavetna ahileh leiset chunga chun kangtalai kang ho chu akomuva chun kamun kang khat cheh chu amaho khat cheh a achandiu chu ahi. ✡Ezekiel 10:9-13 16 Kangtalai khat cheh chu hoitah a vahsetna song en tobanga kisemin akimun, liho chu abpn uvin kibang cheh akimun, chule amaho chu kibang cheh a kisem ahiuvin kang khat cheh velkol a chu kangni na aneicheh uve. 17 Hiche ho chu akitol tengule kihei lou hella gamkai li a achu angat na lam lama chu kihei jeng thei ahiuve. 18 Hiche kang li ho chu sang tah cheh ahiuvin, chule timul tho aumin, chule akang ho kimvel a chun met jeng mit jeng in atom dimsetne. ✡Rev 4:8 19 Ganhing ho chu ache tenguleh kangtalai kang ho jong chu amaho toh thakhat'in achekhom jiuvin, chung langa alen tou teng uleh akang ho jong chu ache tou jiuve. 20 Ganhing ho lhagao chu akang ho a chu uma ahi. Hijeh a chu lhagao chena lam lama chu akang ho le ganhing ho jong che jiu ahi. 21 Hiche ho chu ache teng uleh akang ho chu che jiu ahin, hiche ho chu adin teng uleh akang ho kinga ji ahi. Hiche ho chu chung langa alen tou tengu leh akanga chu ganhing ho lhagao uma ahijeh chun akang ho chu akipat doh jiuvin ahi. 22 Aluvum uva kijal doh chu vanthamjol tobang khat akidalin songvalset vah'in avahsetne. ✡Rev 4:6 23 Anoija chun ganhing ho lhavingu chu khat leh khat kijop cheh in akijal doh in chule alhaving ni chun atahsau khat cheh chu akhun ahi. 24 Alen teng ule alhaving ho gin husau chu keima jah in twitam tah in twipang hattah a atagin ahiloule Hatchungung ogin ahiloule, sepai hon tamtah husa gin bangin kajan ahi. Adin teng uleh alhaving u chu akhailha jiuve. ✡Rev 1:4-15; 19:6 25 Alhaving u akhailhah uva adin teng uleh vanthamjol tobang valset chunga kon chun o khat in thu ahin seijin ahi.
Laltouna Chunga Mihem Lim Melpu
26 Achung vum'a chun songval duma kisem laltouna tobang khat akimun ahi. Chule hiche laltouna sangtah chunga kitousah pachu mihem lim leh melput tobang ahi. ✡Ezekiel 10:1; Rev 4:2,3 27 Akongbuh akipat akilah dan chu khichang vala meikou olla kimujap bangin akimun ahi. Chule akongbuh noilamse chu meikou tobang'in akimvel vah pempum bangin akimun ahi. ✡Ezekiel 8:2 28 Gojuh nikho a meilah a lhagui kimu bang khun avah pempum in ahi. Hiche hi Pakai loupina keiman kamu abangin, keiman hichehi kamu phat in kamai tollah kasulut in ahileh ogin khat in keima koma ogin kkhat anasei chu kajan ahi.
DRAFT COPY