3
Nai Jesus boot liu Moisés
1 Maun-alin sira, imi nee Maromak nian, i Nia hili ona imi atu tama iha lalehan. Imi tenki hanoin klean kona ba Jesus. Tanba ita rekonhese katak Nia mak Maromak nia Apostolu, i Nia nee Nai Lulik Boot. 2 Bainhira Maromak haruka Jesus mai, Jesus halo tuir lo-loos Maromak nia hakarak, hanesan mos Moisés uluk halo tuir Maromak nia hakarak hodi serbi Maromak nia povu hotu.✡Númerus (Bilangan) 12:7 3 Maibee Jesus mak serve atu simu respeitu liu fali Moisés. Ita bele kompara ho ema nebee halo uma, ema seluk gaba liu ema nee duke sira gaba uma nebee mak nia halo. 4 Uma ida-idak, ema mak halo, maibee buat hotu-hotu nebee iha, Maromak mak halo. 5 Moisés halo tuir Maromak nia hakarak hodi serbi Maromak nia povu nudar atan ida iha Maromak nia uma laran. I nia koalia kona ba buat nebee mak Maromak atu foo sai aban-bainrua. 6 Maibee Jesus Kristu halo tuir Maromak nia hakarak hodi toma konta Maromak nia uma laran nudar Maromak nia Oan rasik. I ita nee Nia familia uma laran, naran katak ita brani nafatin hodi laran metin ba promesa nebee Maromak foo ona mai ita.
La bele ulun toos kontra Nai Maromak
7 Tanba nee mak imi tenki halo tuir buat nebee Espiritu Santu dehan,
“Ohin loron, se imi rona Maromak nia liafuan,
8 la bele ulun toos
hanesan imi nia bei-ala sira uluk kontra Maromak
hodi koko Nia iha rai fuik maran.
9 Durante tinan haat-nulu nia laran sira haree Nia milagre,
maibee sira koko Nia nafatin.
10 Tanba nee mak Nia hirus sira hodi dehan,
‘Ema sira nee sempre lao sees husi dalan loos,
i lakohi rona Hau nia liafuan.’
11 Maromak hirus too Nia jura dehan,
‘Ema sira nee sei la tama iha Hau nia fatin deskansa.’ ”✡Salmus (Mazmur) 95:7-11
12 Nunee maun-alin sira, kuidadu! Keta halo be imi balu nia laran hakarak halo sala i lakohi fiar too fila kotuk ba Maromak Moris. 13 Agora sei tama iha tempu nebee Espiritu Santu bolu “ohin loron”. Nunee imi tenki foo hanoin ba malu loro-loron, para imi la bele monu ba sala hodi tuir fali lia bosok too sai ulun toos kontra Maromak. 14 Ita sai ona laran ida ho Jesus Kristu, naran katak ita kaer metin nafatin ita nia fiar husi huun too rohan. 15 Hanesan ohin hatete tiha ona iha leten:
“Ohin loron, se imi rona Maromak nia liafuan,
la bele ulun toos
hanesan imi nia bei-ala sira uluk kontra Maromak.”✡Salmus (Mazmur) 95:7-8
16 See mak rona Maromak nia liafuan maibee kontra fali nee? Sira nee mak ita nia bei-ala sira nebee Moisés lori sai tiha ona husi rai Ejitu. 17 Durante tinan haat-nulu nia laran Maromak hirus see? Nia hirus ita nia bei-ala sira nebee halo sala, sira mate namkari iha rai fuik maran. 18 Momentu nebaa Maromak jura dehan, “Ema sira nee sei la tama iha Hau nia fatin deskansa.” Nia koalia kona ba see? Nia koalia kona ba ema sira nebee mak lakohi rona Nia.✡Númerus (Bilangan) 14:1-35 19 Nunee ita hatene ona katak, sira la bele tama iha fatin deskansa nee tanba sira lakohi fiar ba Maromak.