Korinto II
1
I Paoly, Firàhe’ Iesoà Norizañey ami’ty satrin’ Añahare, naho i Timoty rahalahintika. Ho ami’ty Fivorin’ Añahare e Korinto ao mitraoke amo noro’e iaby miparaitake Akaia añeo. Hasoa naho fañanintsiñe ama’areo boak’ aman’ Añahare Raentika naho Iesoà Talè Norizañey.
Andrianañahare-Mpañohò
Andriañeñ’ abey t’i Andrianañahare Rae’ i Talèntika Iesoà Norizañey, i Raem-pitretrezañe naho Andrianañahare’ ze hene fañohoañey, toe Andrianañahare. Ie ty mañohò anay amo hasotria’ay iabio, hañohoa’ay ka o mioremèñeo, amy fañohoañe añohoan’ Añahare anaiy, Hambañe amy te mitobake ama’ay o hasotria’ i Norizañeio, ty andoparam-pañohoañe añamy Norizañey. Naho ampalovilovien-jahay, le ho fañanintsiñe naho fandrombahañe anahareo, ie ohòñen-jahay le ho ami’ty fañohoañe anahareo; toe mampanintsiñe o hasotriañe anotriañe anaio naho ifeàhañe. Tsy mihilotse ty fisalalà’ay anahareo, fohiñe t’ie mitraok’ amo fisotria’aio le manahake zay ka amy fañohòañey.
O ry longo, tsy tea’ay te tsy hapota’ areo o feh’ ohatse nanoañe anay Asia añeo, ie nampijinieñe mandikoatse ty haozara’ay* Ko II 4:8-9, 17, ie ho namoe aiñe. Eka, nivoa-fàtse havetrake an-tsandri’ay zahay, tsy mone niato-batañe, fa aman’ Añahare mpampitroatse o vilasio; 10 ie nañaha anay amy hankàñe ho nampihomakey, le mbe hañaha avao; i nampijadoña’ay o fitama’aio ro mbe mitolom-pañaha anay: 11 Nañolotse anay ka nahareo amo halali’ areoo vaho maro ka ty hañonjom-pañandriañañe ty ama’ay, ty amy falalàñe natolots’ anay añamy maroy.
Mamotoañe t’i Paoly
12 Zao ‘nio ty fitrèña’ay, ty talim-pitsakorea’ay, t’ie am-piavahañe naho ami’ty halio-tahin’ Añahare, tsy ami’ty hihi’ ty voatse toy, fa ami’ty hasoan’ Añahare ty nitoloña’ay ami’ty voatse toy, àntsake ama’ areo; 13 Toe tsy anokira’ay naho tsy o vaki’ areo naho fohi’ areoo, fe atokisako t’ie haharendreke pak’am-pigadoña’e henaneo, 14 toe eo ty nirendre’ areo ama’ay, te inahareo ro foto’ ty fisengea’ay, naho zahay anahareo amy andro’ Iesoà Talèntikañey.
15 Amy fatokisañe zay, ty nilaharako te hiheo mb’ama’ areo mb’eo heike, hahazoa’ areo tilike fañindroe’e, 16 Eka, hiary mb’ama’ areo raho naho mb’e Makedonia ao vaho hibalike, hampionjona’ areo mb’e Iehodà añe.
17 Nifejofejo hao raho amy nilaharakoy? He i italifirakoy ro nisafirieko amy haondaty hambo’ey ao? soa te songa hanoeko ty hoe Eka, Eka naho Aiy avao? 18 Fe manahake te migahiñe t’i Andrianañahare, le tsy Eka naho Aiy o fivola’ay ama’ areoo. 19 Amy te tsy Eka naho Aiy i Anan’ Añahare, Iesoà Norizañe nitaroñe’ay naho i Silasy vaho i Timoty ama’ areoy, fa Eka avao ty ama’e ao. 20 Aa ndra fire-fire ty fampitamàn’ Añahare, le hene Eka o ama’eo; vaho ie ty anoa’ay Amena amy fandrengea’ay an’ Andrianañaharey.
21 Fa mampipitike antikañe amy Norizañey t’i Andrianañahare, ie hinoso’e 22 naho vinoli-tombo’e vaho natolo’e an-tron-tikañ’ ao i Aro­fo’ey ho tsaloke. 23 Aa le koiheko ho valolom­belon-troko t’i Andrianañahare te i fiheveako anahareoy ty tsy nombako mb’e Korinto mb’eo heike. 24 Tsy te senge’ay hery o fatokisa’ areoo, f’ie mpifanehake ama’ areo ho ami’ty hafalea’ areo, amy t’ie mijadoñe soa am-patokisañe.

*1:8 Ko II 4:8-9, 17