1 Teako ho fohi’areo ty fimaneako ho anaharo naho o e Laodikia añeo vaho o mbe tsy nifañatre-daharañ’ amako iabio, 2 hañohòako ty arofo’ iareo, ie fa nampivandìreñe am-pikokoañe, amy hene vara vokare’ ty faharendrehañe pea, ie fohiñe mazava, i hatò mietake aman’ Añahare Rae aoy, i Norizañey; 3 ama’e ty ietaha’ ze fonga varan-kihitse naho hilala*Ies 11:2, Kol 2:9. 4 Itaroñako ‘nio, hera ao ty hamañahy am-bolam-pañèdre. 5 Aa ndra te tsy eo an-tsandrin-draho, mbe ama’ areo an-troke, mirebeke te mahatrea ty fitraofa’ areo rehake naho ty fatokisa’ areo i Norizañey.

6 Aa kanao rinambe’ areo i Talè Iesoà Norizañey, mañaveloa ama’e, 7 ie soa fivahatse naho nivoatse ama’e, naho niventèñe am-patokisañe ty amy naòke, vaho mandopatse fañandriañañe.

8 Mitaoa ke eo ty hañamengoke anahareo an-kilala miheotse naho famañahiañe kòake mirampy amo lili’ ondatio naho amo sata’ foto-ty tane toio†Kol 1:20, Gal 4:3,9, fa tsy amy Norizañey, 9 izay imo­neña’ ty haliforan’ Añahare am-pañòva, 10 le nifonireñe ama’e nahareo, amy t’ie ty lohà’ ze hene fifeheañe naho lily.

11 Ama’e ka nahareo ro sinavatse an-tsavatse tsy nanoem-pitàñe fa nampikorendahañe ty fandilia’ i haondaty hambo’ey amy sandriñey ami’ty fanavara’ i Norizañey, 12 ie nalenteke mindre ama’e amy lipo­tsey naho nindre natroatse ama’e am-patokisañe ami’ty fitoloñan’ Añahare nampitroats’ aze an-kavilasiy. 13 Ie nivetrake an-kakeo naho ami’ty tsy fanavara’ i nofotsey ro vinelo’e mindre ama’e, le fonga nafaha’e o tahin-tikañeo, 14 ie namaopaoke i takelan-tsongoy, o fepetse‡Kol 2:20, Efe 2: nanisý antikañe naho nañamengoke antikañeo; nasita’e añe izay, amy nipehañ’ aze amy hatae ajaley, 15 ie nampikorendahe’e ty lili’ o mpifeleke naho o mpañadilio, vaho nampiborahe’e ho fisambàñe am-batraike eo, ie fa rineba’e amy hatae ajaley.

16 Asoao arè tsy iaia ty hapo’ areo hanìñe ty fikamañe ndra finomañe, naho o andro nifotoañañeo naho o jiri-bolañeo vaho o Sabatao§Iek 45:17 17 (toe fanalinjoa’ o raha ho avio irezay) —fa ty Fañova’ i Norizañey*Mat 18:15-20; Kol 1:18,24. 18 Asoao tsy hikatramoeñe ty tambe’ areo, ie sigiheñe hirè-batañe naho hitalaho amo anjelio; ie mitsibelezeñe amo raha nitrea’eo, naho mirengevoke am-pive­tsevetsen-kaondaty hambo’e, 19 naho tsy mitambozòtse amy Añamboney, i Mpamahañe i Fañòvay iabiy vaho mampirekets’ aze amo fange’eo naho amo lahin’ ozatseo, hitomboa’e ami’ty fampibodobodoan’ Añahare.

20 Ie nindre nivilasy amy Norizañey amo sata’ foto†Kol 2:14; Efe 2:15; Kol 2:8, Gal 4:3,9 ’ ty tane toio, akore te mbe manao hoe veloñe ami’ty voatse toy, mañorike o fañè’e manao ty hoe: 21 Ko mandrambe! ko mitsopeke! ko mitsapa. 22 Ie ho fonga modo am-pitoloñañe, amy te mifototse ami’ty lily naho fañòha’ ondaty‡Ies 29:13; Mat 15:8-9, Mar 7:6-7. 23 Ie toe misare hilala am-pitalahoañe an-tsatrin-troke naho am-pirehañe vande naho fampalovilovian-tsandriñe; f’ie tsy vente’e, naho tsy mahasebañe ty hadrao’ o nofotseo.