1 Janjiño ty tsara’Iehovà: ry ana’ Israeleo;

amy te atreatré’ Iehovà o mpimoneñe an-tane atoio.

Fa tsy aman-katò,

tsy mitretrè, tsy mahafohiñe

an’ Andrianañahare ty an-tane ao.

2 Te mone fàtse, naho lañitse,

naho hohodan-doza,

naho kametse,

vaho hakarapiloañe ty itoloña’ iareo,

le mifanoitoy ami’ty lio ty lio.

3 Aa le handala ty tane, naho

fonga hinìke ze mpimoneñe ao,

naho o bibin-kivokeo

naho o voron-dikerañeo;

vaho hasese añe ka o fian-driakeo.

4 Asoao tsy ho liereñe

tsy ho endakendaheñe,

fa manahake ty mpifandietse

ami’ty mpisoroñe ondatikoo.

5 Aa le hikorovoke antoandro irehe,

le hindre hihotrak’ ama’o ty mpitoky

naho haleñe, vaho havetrako ty rene’o.

6 Rotsake ondatikoo fa po-hilala,

aa kanao narinjèñe’o ty hihitse

le hariako amo fisoroñañeo irehe;

kanao nandikofa’o

o Tsaran’Añahare’oo,

le ho haliñoko ka o ana’oo.

7 Ie nampitoaboreñe iereo

àntsake t’ie nandilatse amako;

aa le hafoteko ho fisalarañe ty asi’ iareo.

8 Fihinana’ iareo o engan-kakeo’ ondatikoo,

vontitire’ iereo an-tro’e ao o tahi’ iareoo.

9 Le zao ty ho ie te

hiray ami’ty ondaty ty mpisoroñe;

sindre ho liloveko ty amo sata’eo,

vaho hondroheko ty amo fitoloña’eo.

10 Hikama iereo fe tsy ho anjañe;

hanao hakarapiloañe fe tsy hitombo,

amy te napo’ iereo ty hañaoñe

am’ Iehovà

11 Mitavañe arofo ty hakarapiloañe,

naho ty divay, vaho i divay vaoy.

12 Mihalaly hevetse am-poto-katae’eo ondatikoo,

vaho manoiñe ty kobai’ iareo;

fa nampandilatse iareo

ty fañahin-kakarapiloañe,

vaho nifarie’iereo t’i Andrianañahare’iareo.

13 Mañenga soroñe am-bohitse ey iereo

naho mañembok’ an-kaboañe ey,

ambane’ o kileo naho o talìo,

vaho o mendoraveñeo,

o mañaloke soao;

aa le handrato o anak’ ampela’ areoo,

vaho hanao hakarapiloañe

o ana-drahavavem-bali’ areoo.

14 Tsy ho tiliheko o anak’ampela’ areoo

t’ie manao hakarapiloañe,

naho o ana-drahavavem-bali’ areoo, t’ie mandranto

fa mitrao-pañenga amo tsimirirañeo iereo, vaho miharo soroñe amo kalalijakeo;

toe hihotrake ondaty tsy aman-kilalao.

15 Aa ndra te manao hakarapiloan-drehe Israele, ko ampandilare’o t’Iehodà;

ko migodañe mb’e Gilgale, naho

ko mionjomb’e Bet’avène*Bet’avene: trañon-kakoahañe mb’eo,

vaho ko mifanta ty hoe

Kanao veloñe t’Iehovà.

16 Fa midisa-voly manahake

ty fidisa-volin-kiloa t’Israele;

aa vaho ho fahana’ Iehovà

hoe añondri-lahy midada iereo?

17 Kanao mitolon-tsamposampo

t’i Efraime†Efraime: mahavokatse; mitombo; adono ey.

18 Fa maseñe ty divai’ iareo;

ie mitoloñe hakarapiloañe avao;

tea’ o mpifehe’oo ty haloloañe

te ami’ty engeñe.

19 Fa kinolopo’ i tiokey añ’ela’e ao iereo

le ho salatse ty amo fisoroña’ iareoo