1 Popòho e Tsione ao ty antsiva,

koiho an-kaboako miavake ey ty hazolava;

ee te hihondrahondra iaby

ondaty an-tane atoio,

fa hitsatoke ty andro’ Iehovà;

toe fa an-titotse; 2 Andro maieñe naho mimoromoroñe,

andro mandrahoñe naho aman-talinjo

mihanake am-bohitsey

manahake t’ie manjirik’andro;

ondaty mifamorohotse naho ­fàtratse;

mboe lia’e tsy niañ’ohatse;

vaho le lia’e tsy ho limbezañe,

ampara’ ty taon-tariratse maro añe. 3 Mamorototo aolo’e eo ty afo,

vaho mivoly ama’e ty soba miforehetse,

ie hoe golobo’ i Edene*Edene: Hafalea; Finembanembañe ty aolo’e eo

le liolio, mangoakoake ty amboho’e;

tsy eo ty mahaborifitse ama’e. 4 Manahake o soavalao iereo,

naho o mpiningi-tsoavalao,

izay ty fitsondemboha’ iareo. 5 Manahake ty fitrakotrakon-tsarete mitrantràñe an-dengom-bohitse ey,

hoe ty fikosisiha’ ty lel’afo

mipilotse ahetse,

naho ondaty maozatse miriritse hialy. 6 Mampalorè ondatio te zoeñe;

fonga mikò-foty o laharañeo.

7 Manahake o fanalolahio ty filaisa’ iareo,

anganiha’ iareo o kijolio hoe lahin-defoñe,

songa mandrodo amy lala’ey,

tsy eo ty mivitsok’ am-pidadaña’e. 8 Tsy mifampikititse iereo

fa songa mitrokotroko amy lala’ey;

aa ndra te mipenkañe ty singa

ipaoha’e, ie tsy fere. 9 Herereafe’ ty rova,

mirimatse an-drindriñe,

manganike mb’anjomba ao;

mitsoropoke an-dalan-kede hoe malaso. 10 Manginikinik’ aolo’e eo ty tane,

miozoñozoñe o likerañeo;

mikò-mainte i àndroy naho i volañey,

le asita’ o vasiañeo o fimilemile’eo. 11 Mampipoña-piarañanañañe añatrefa’

o lahindefo’eo t’Iehovà;

amy te ra’elahy o lahindefo’eo,

fatratse o mañorike o tsara’eoo;

toe jabajaba ty andro’ Iehovà

vaho mampangebahebake,

Ia ty mahafifeak’ ama’e? 12 Ie amy zao, hoe t’Iehovà,

itoliho an-kaliforan’arofo,

naho am-pililarañe, am-pirovetañe,

vaho am-pangololoihañe. 13 Mandrovita arofo fa tsy sikiñe,

le mitoliha am’ Iehovà

Andrianañahare’ areo,

fa matarike naho miferenaiñe,

malaon-kaviñerañe naho ra’elahy

an-kafatraram-pikokoañe,

vaho teñene’e ty fametsahan-kankàñe. 14 Ia ty mahafohiñe, hera hibalike re

naho hiheve, vaho hamopoke fañanintsiñe am-boho’e eo,

añengao mahakama naho enga-rano

am’Iehovà Andrianañahare’ areo. 15 Popoho e Tsione ao i antsivay,

añamasiño lilitse, koiho ty fivory miavake; 16 Atontono ondatio; hamasiño ty fivory,

arokandrokaño o androanavio,

atolaho o ajajao

rekets’ o milomolomo am-patroao,

ampiakaro an-kivoho’e i mpañengay,

boak’ an-kiboho’e ao i enga-vaoy. 17 Ehe te hiharovetse añivo’ i fizilihañey

naho i kitreliy o mpisoroñe

mpitoro’ Iehovào, hanao ty hoe:

Ferenaiño ondati’oo, ry Iehovà,

le ko atolo’o ho arinjeñeñe

o lova’oo hamokafoka’ o kilakila’ ndatio;

aa vaho akore t’ie hampiboele

am’ondatio ty hoe:

Aia t’i Andrianañahare’ iareo? 18 Nikirañe i tane’ey amy zao

t’Iehovà, vaho ferenaiña’e ondati’eo, 19 Hanoiñe t’Iehovà

hanao ty hoe am’ondati’eo:

Ingo te hampañitrifeko ampemba vao

naho divay vao vaho menake,

haha-anjañe anahareo,

le tsy hanoeko ho fañinjea’

o kilakila’ ondatio ka. 20 Fa hasitako lavitse anahareo

o ‘ntavaratseo,

naho haronjeko mb’an-tane

harake naho bangìñe añe;

hitolike mb’amy riak’ atiñanañey o mpiaolo’eo, naho o am-boli’eo mb’an-driak’ ahandrefañey,

le hionjoñe ty imbo’e

vaho hiambone ty fitrotrora’e,

amy te ra’elahy o nanoe’eo. 21 Ko hemban-drehe ry tane;

mifalea naho mandià taroba;

amy te fanjàka o fitoloña’ Iehovào. 22 Ko matahotse ry bibin-kivokeo;

fa mbe haindoñindoñe

o fiandrazañe am-patrambeio,

mbe hamoa ty voa’e o hatae’eo,

songa hamokatse

ty sakoa naho ty vahe. 23 Mirebeha ry ana’ i Tsioneo,

mifalea am’ ­Iehovà Andrianañahare’ areo,

fa havantañañe ty mampahavy

i ora-mafaitsey,

toe hampahavia’e orañe,

i aoloy naho i orañ’asotriy

manahake te taolo. 24 Ho lifotse ampemba o rihao,

vaho handopatse divay

naho menake o sajoao. 25 Havahako ama’ areo o taoñe nabotse’

o valalao, naho o maramboloo,

naho o beañeo vaho o voan-taneo,

i mpirai-lian-dahin-defoñe

niraheko ama’ areoy. 26 Ho eneñe mahakama nahareo,

toe ho anjañe, naho ho rengè’ areo

ty tahina’ Iehovà

Andrianañahare’ areo,

amy hasoa tsitantane nitoloña’ey;

vaho tsy ho salatse ka ondatikoo. 27 Le ho fohi’ areo te añivo’ Israele

ao iraho†Ies 24:23,

le te Izaho, Iehovà Andrianañahare’ areo

ro tsy aman-tovo’e,

vaho tsy ho salatse ka ondatikoo.