1 Heheke ampangoakoahe’ ­Iehovà i taney, ampiantoe’e, aotakota’e,

vaho aparatsia’e o mpimone’eo:

2 ty mpisoroñe naho ty fokonontsoa,

ty ondevo naho ty tale;

ty anak’ampatañe naho ty rakemba;

ty mpivily naho ty mpandetake;

ty mpampindrañe naho ty mpindrañe,

ty mampisongo naho ty mpisongo.

3 Hene ho korendaheñe i taney,

hakopake malio, fa nafè’ Iehovà i tsaray.

4 Mioje i taney naho ­miforejeje, miheatse naho midrodremotse ty voatse toy,

fonga mitike o nonjoneñe an-tane atoio.

5 Tiniva’ o mpimone’eo i taney,

nandilatse Hàke iereo,

niotake amo fañèo,

vaho nivalike amy fañina tsy modoy.

6 Aa le nabotsem-patse i taney,

naho sesehen-kakeo

o mpitoboke ama’eo,

toly ndra minike o mpimone’ i taneio,

vaho tsy ampe ty sengaha’e;

7 Tsy vaño ty divay vao,

miheatse o vaheo;

hene miselekaiñe o mpifalefaleo.

8 Mijihetse ty firebeha’ o kantsàñeo,

migadoñe ty fikoraha’ o mpirebekeo,

milesa ty hafalea’ o marovanio.

9 Tsy minon-divay an-tsabo iereo;

mafaitse ty toake amo mikam’azeo.

10 Nakoromake i rova nitsamborohotakey;

songa mirindriñe ze anjomba,

tsy hiziliha’ondaty.

11 Firovetañe ty an-dalañe ey,

ty amy divaiy;

nagoboñe ze hene hafaleañe,

fa nafahañe ty firavoravoa’ i taney.

12 Nengañe hoake i rovay,

kinaboke ho fianto o lalambei’eo

13 Fa izay ty ho ie añivo’ ty tane toy,

anteñateña’ ondatio, manahake ty fañozoñozoñan-tsakoa,

naho ty fitimponañe ty sisa ami’ty fanontonañe valoboke.

14 Mampipoña-peo iereo, misabo an-drebeke;

mirañoraño o boak’ an-driakeo

mañonjoñe ty volonahe’ Iehovà.

15 Aa le mandrengea Iehovà

ry an-kazavañe añe,

ty tahina’ Iehovà,

Andrianañahare’ Israele,

ry añ’olon-driakeo.

16 Boak’ antsietoitane añe

ty nahajanjiña’ay sabo:

Enge ho a i vantañey!

Fe nataoko ty hoe: Minike iraho,

mitike avao; feh’ohatse amako!

Mikinia o mpikitro-drahao;

eka vata’e mikitroke ty mpikilily.

17 Ama’o ry mpimone’ ty tane toio

ty harevendreveñañe,

i koboñey, vaho i fandrikey.

18 Aa le ho tondroke te,

hikapotrake an-koboñe ao

ze ampivoratsahe’ ty talili’ i hekohekoy;

naho ho tsepahe’ ty fandrike ze manganike boak’ an-koboñe ao;

fa misòkake o lalan-kede añ’abo eñeo

vaho miezeñezeñe o faha’ ty tane toio.

19 Señake ty tane toy, mangorobagorobañe;

nampigavengaveñeñe ty tane toy.

20 Mivembeñe hoe ondaty jike

ty tane toy;

mitroetroe hoe kibohotse;

mavesatse ama’e o fiolà’eo,

ie hikorovoke tsy hitroatse ka.

21 Ho tondroke amy andro zay te

ho lilove’ Iehovà i valobohòn-dikerañey,

an-dindiñ’ añe,

naho o mpanjaka’ ty tane toio,

an-tane atoy.

22 Hatontoñe, manahake ty añoroñañe

mpirohy am-balabey ao,

naho hagabeñe am-porozò ao;

ie naha-modo andro maro ao

vaho ho liloveñe.

23 Ho meñatse i volañey,

ho salatse i àndroy;

fa hifehe am-bohi-Tsione ey

t’Iehovà, toe e Ierosalaime ao*Ies 12:6, 16:5, 46:13, 52:8, 59:20, Sab 102:16, Iek 43:7-9, Ioe 3:17, 4:17, Mik 4:7-8, Tsf 3:14-17, Zek 1:16-17, 2:10, 8:3-8, 14:1-11, Top 1:6-7, Ben 21:1-27,

le haboak’ amo mpifehe’ondati’eo ty enge’e.