1 Hankàñe amy maleotse naho tìvay,

i rova mamorekekey.

2 Tsy hinao’e i fiarañanañañey,

tsy rinambe’e i lafay,

tsy niatoa’e t’Iehovà;

tsy niharinea’e t’i Andrianañahare.

3 Liona mitroñe o roandria ama’eo

amboa-hako o mpizaka’eo;

ndra loli’e tsy apo’ iareo am-para’ te maray.

4 Ondaty jagarigary naho mpikitroke o mpitoki’eo,

fa tiniva’ o mpisoro’eo i miavakey,

naho nivalike amy Hàke*Tsf 22:26, Lke 16:16.

5 Vantañe añivo’e ao t’Iehovà,

ie tsy mandilatse;

aboa’e an-kazavàñe boa-maraiñe

tsy milesa ty hatò’e;

fe tsy mete salatse ty mengoke.

6 Toe naitoako o fifeheañeo,

bangiñe o rova’eo;

nampikoaheko o lala’eo am-para’ te

tsy amam-pañavelo ty ey;

rotsake o rova’eo, po-sehanga’e,

leo raike tsy mimoneñe ao.

7 Nanao ty hoe iraho:

Va’e hañeveñe amako irehe?

handrambesa’o lafa,

soa tsy haitoañe o akiba’oo;

amy ze he’e nametsahako ama’ey!

fe nalisa iereo, naniva ze fonga sata’iareo.

8 Aa le liñiso iraho, hoe t’Iehovà,

ampara’ i andro hanjehazehako anahareoy, fa hoe ty safiriko:

hatontoko o kilakila’ ndatio,

havoriko o fifeheañeo

hampidoañako ty

habosehako miforoforo;

ho fonga forototoe’ ty afom-pamarahiako ty tane toy.

9 Eka hampikotritriaheko am’ondatio ty soñi’ iareo, soa te hene

hikanjy ty tahina’ Iehovà,

hitoroñe Aze am-pitraofañ’ina. 10 Boak’ alafe’ o saka’ i Kosìo añe

ty hanesea’ iareo o mpipay Ahikoo;

o anak’ ampela’ i nampiparaitahekoio ro ho banabanaeñe amako.

11 Amy andro zay, tsy hanalatse azo o fitoloña’oo, o niolà’o amakoo,

fa hasintako añivo’o ao o mpitreñe

am-pirengevohañeo,

ie tsy hibohaboha ka

amy vohiko miavakey.

12 Le hapoko añivo’o ao t’indaty

misotry naho rarake,

hitsoloke amy tahina’ Iehovày.

13 Tsy handilatse tsy handañitse

ty sengaha’ Israele;

le tsy ho oniñe am-palie’e ao ty

famelem-pamañahiañe:

fa hikama iereo vaho handre,

le tsy ho amam-pañembañe.

14 Misaboa, ry anak’ ampela’ i Tsione:

mipazaha ry Israele;

mifalea naho mirebeha an-kaampon-troke

ry anak’ ampela’ Ierosalaime.

15 Fa nafaha’ Iehovà o nañozoñañ‘ azoo;

fa sinoi’e añe o rafelahi’oo;

Iehovà ro mpanjaka’ Israele añivo’o ao;

tsy hahaonin-karatiañe ka irehe.

16 Amy sa zay, ho tseizeñe

am’ Ierosalaime ty hoe: Ko hembañe;

naho amy Tsione:

Ko mampigebam-pitàñe.

17 Añivo’o ao t’Iehovà Andrianañahare’o, ie Fanalolahy maharombake

hirebek’ ama’o an-kafaleañe,

hianjiñe aman-koko;

handia taroba aman-tsabo.

18 Hatontoko o mihontoke

o sabadidam-pamantañañeoo,

o mpiama’o mivave i injeio.

19 Inao, ie tsatoke i andro zay

songa ho toloñeko o manindry azoo,

le ho rombaheko i mikoletray,

naho hatontoko i niroaheñey,

vaho hafoteko ho engeñe naho tahinañe an-tane atoy ty fisalara’ iareo. 20 Hampolieko amy andro zay nahareo,

amy sa anontonako anahareoy,

Toe hanoako tahinañe naho engeñe

añivo ze hene ondati’ty tane toy,

naho ampoliko añatrefam-pihaino’ areo, ty fandrohizañe anahareo,

hoe t’Iehovà.