1 Hehek’ an-kaboañe ey

o fandia’ i mpinday talily soaio,

i mampiboele fifampilongoañey!

O ry Iehodà, anò o sabadidake miavakeo, henefo o nifantà’oo;

amy te tsy hiranga ama’o ka

ty Beliale, fa naitoañe. 2 Fa nitroatse añ’atrefan-dahara’o eo

ty mpandrotsake,

tano i kijoliy, jilovo i lalañey,

mitokia an-kaozarañe, avorio o hafatrara’oo. 3 Vaòe’ Iehovà ty enge’ Iakobe

naho ty volonahe’ Israele;

fa nampikoake iareo o mampikoakeo,

vaho jinoi’ iareo o singam-bahe’eo. 4 Ho mena mañabarà ty fikalan-defo’

o fanalolahio,

misikiñe mena iaby o lahin-defo’eo,

afo amam-bý miloeloe o sarete’eo

amy andro fihentseña’ey,

vaho miriñariña iaby o lefon-ambilazoo; 5 Mitrakotrako amo lalañeo o sareteo,

mifaniotsiotse an-diolio eo;

manahake ty fañilo ty vinta’ iareo,

ie mihelatse mb’etia mb’eroa. 6 Tiahi’e i mpiaolo rey;

mamingañe iereo te miloka;

malisa t’ie handrombake i kijoliy,

fa nihentseñeñe ty fikala’e, 7 Misokake o lalam-pikalañañe i sakaio

vaho rinava’e i anjombay. 8 Fa nivoloseñe i mpanjaka ampelay,

fa nasese añe,

miñeoñeoñe hoe feon-deho-fona

o anak’ ampata’eo,

ie mamofok’ arañañe; 9 Manahake o antara haehaeo

t’i Ninevè, ie mihelañe añe;

mijohaña, mitsangana!

fe leo raike tsy mitoli-boho. 10 Kopaho o volafotio,

haofo o volamenao

amy te tsy ho revo ty an-driha ao,

fanake tsifotofoto ty ao. 11 Kapaike re, mangoakoake naho mavo,

mitranake ty arofo,

mifampigaiñe o ongotseo,

mikoritoke iaby ze fisafoa,

mikò mainte iaby o vintañeo. 12 Aia i lakaton-dionay,

ty famahanañe o liona tora’eo,

i fipiapià’ i lionay naho i liona-vavey

naho i ana-dionaiy,

ie tsy amam-pañembañe? 13 Nahaeneñe o ana’eo ty rinimi’ i lionay,

nahatseke o vali’eo o vinono’eo,

natsafe’e tsindroke o lava’eo,

le nofotse riniatse an-dakato’eo. 14 Miatreatre azo iraho, hoe t’Iehovà’ i Màroy

Haonjoko an-katòeñe o sarete’eo,

habotse’ i fibaray o liona tora’oo;

le haitoako ami’ty tane toy o tsindro’oo,

vaho tsy ho janjiñeñe ka

ty fiarañanaña’ o ira’oo.