1 Hankàñe amy rova mpampiori-dioy,

lifotse vande naho vara kinopake,

le lia’e tsy modo o tsindroheñeo. 2 Inay ty karavantsy!

Inao ty fikatrakatrà’ o laròn-tsareteo;

heheke ty fitsapio­tsapio’ o soavalao,

naho o sarete mitrakotrakoo. 3 Mañoridañe o mpiningitse soavalao,

mimilomilotse i fibaray;

mipelapelatse i lefoñey;

zinamañe i lahialeñey,

tsifotofoto o votrin-doloo,

o fañova mifitakeo;

ie mitsikapy amo fateo; 4 ty ami’ty hamaro’ o hakarapiloa’

i tsimirira kenakenakeio,

i hekohekom-pamorekey,

i mandetake fifeheañe amo

hakalalijaha’eoy,

naho hasavereñañe amo famoreha’eo. 5 Inao! miatreatre azo iraho,

hoe t’Iehovà’ i Màroy,

le hatsingako an-doha’o eo o siki’oo,

naho haboako amo kilakila’ondatio ty fihalo’o

vaho amo fifeheañeo ty heña’o. 6 Hafetsako ama’o ty raha mampangorý,

hanivà’e azo, ie hanoeko fisambàñe. 7 Ie amy zao, hene handripak’ ama’o

ze maharendrek’ azo, hanao ty hoe:

Fa mangoakoake ty Ninevè;

ia’ ty handala aze?

aia ty hahatreavako mpañohò ho azo. 8 Soa te amy No-amone v’iheo,

Ie nitoetse añivon-tsaka eoy,

naho niarikatohen-drano,

i riakey ty nañaro aze,

naho i ranoy ty ni-kijoli’e? 9 I Kose naho i Mitsraime ty nanolo-kaozarañ’ ama’e tsy nete ritse;

nimpañolots’aze t’i Pote naho i Lobý*Lobý: taliñiereñe. 10 F’ie nasese mb’eo,

nisese mb’am-pandrohizañe añe,

fonga naretsak’ an-doha’ o lalan-drovao ey o anak’ ajaja’eo;

nanoe’ iereo tsato-piso o roandria’eo,

vaho rinohy an-tsilisily iaby

o ana-dona’eo. 11 Toe ho jike ka irehe, vaho hiàmpitse;

ie hipay fitsolohañe ty amy rafelahiy. 12 Manahake o rotseo

ze hene golobo’o mifahetse,

ie ezeñezeñeñe ro mihintsañe

mb’am-paliem-pikama ao. 13 Oniño te hambañe aman’ampela

ondaty añivo’oo;

midañadaña ho a o rafelahio

o lalambein-tane’oo;

hampangotomomohe’ ty afo o sikada’eo. 14 Mitariha rano ho amy fiarikoboñañey, haozaro o kijolio;

mionjona amo lietseo,

lialiao i pakotsey,

vontitiro i mòlim-birìkey; 15 Hamorototo azo ao ty afo,

hañito azo i fibaray,

habotse’e manahake i valalay;

mifamorohota hoe kijeja,

mivorovoroa hoe sy. 16 Nampamasiañe’o mandikoatse

o vasian-dikerañeo

o mpibalibalik’ ama’oo;

miofoke i kijejay vaho mitiliñe añe. 17 Hoe valala o mpigari’oo,

mifamorohotse hoe kijeja

o mpifehe’oo, ie mitobe an-kijoly eo

naho manintsiñe ty andro,

fe mipitsik’ añe te mafana-voho,

vaho tsy fohiñe ty tane nombà’e. 18 Mirotse o mpiara’oo ry mpanjaka’

i Asore, mitofa o roandria’oo;

mivarakaik’ am-bohitse ey ondati’oo,

vaho tsy eo ty hanontoña’o. 19 Tsy hay melañeñe ty bae’o,

mahaferenay o fere’oo;

fonga hitehateha-pitàñe ty ama’o

o mahajanjiñe i talili’oio;

fa ia ty tsy nifetsaha’ o fampisoaña’o

nitoloñeñe nainai’eo?