1 I Paoly naho i Timoty, fetrek’ oro’ Iesoà Norizañey, ho amo hene noro’e am’ Iesoà Norizañey e Filipio, naho o mpiaolo vaho mpitoroñeo.

2 Hasoa ama’ areo naho Fañanin­tsiñe boak’ aman’ Añahare Raentika naho Iesoà Talè Norizañey.

3 Andriañeñe t’i Andria­nañahareko amy ze hene fitiahiako anahareo, 4 nainai’e ihalaliako an-kaehake amo filolofako ho anahareo iabio, 5 amy fitraofan-tika amy talili-soay boak’ amy andro valoha’ey pake henaneo, 6 le atokisako te i namototse ty fitoloñan-tsoa ama’ areoy ro hañeneke*Fot 17:1, Its 18:13, Mp I 8:61, Sab 119:80, Mat 5:48 aze ampara’ ty andro’ Iesoà Norizañey. 7 Toe mañeva ahy te inahareo ro iereñereñako an-troke, ie itraofan-tika o fañasoañ’ ahio ke te an-tsilisily he am-pañarovako naho famenteako i talili-soaiy. 8 Valolombeloko t’i Andrianañahare te hene itamàko ami’ty halèn’ arofo’ Iesoà Norizañeiy; 9 le inao ty halaliko, te hitolom-piraorao an-kahilala naho fitsikarahañe ty fikokoa’ areo, 10 hahafijoboña’areo ty hasoa, hikotritriake tsy aman-tiñe ampara’ ty andro’ i Norizañey 11 hiegoègo am-pamokaran-kavantañañe†Mat 3:8-10, Rom 6:22, 14:17, Ko II 9:10, Efe 5:9, Gal 5:22, Col 1:10, Heb 12:11, Jak 3:18 añam’ Iesoà Norizañey, ho ami’ty engeñe naho fibangoañe an’Andrianañahare.

12 Aa, teako ho fohi’ areo ry longo, o raha nizò ahiko fe nañonjoñe ty fiboelea’ i talili-soaio, 13 ie nanitsike i anjombam-pifeheañey naho o ila’e iabio ty fahafohinañe te i Norizañey ro maha an-drohy ahy, 14 le nosihe’ o silisilikoo ty maro amo rolongo mpiato amy Talèo nampi­tombo ty fahasibeha’ iareo hitaroñe o tsaran’ Añahareo tsy an-kahembañañe.

15 Toe eo avao ty mitsey i Norizañey an-kirañe naho lietse; fe eo ka ty an-tsatry soa; 16 iretoa an-koko, ie fohi’e te tinendre ho atoan-draho hañarovako i talili-soay, 17 ireroa ka mitaroñe an-kazavan-troke, mbore mikinia hañembets’ ahy amo silisily retoa. 18 Atao akore? Tsinoñe, fa amy ze hene sata, ke mieva he an-katò, kanao taroñeñe i Norizañey le hafaleako; eka! toe hirebehako, 19 amy te apotako t’ie hifotetse ho fañahàñe‡Iob 13:16 ahy o fihalalia’ areoo naho ty famahàna’ i Arofo’ Iesoà Norizañey, 20 ie ilozohako fitamàñe naho fisalalañe te tsy ho salatse ka, ie an-tsibeke fonitse, fa liliko, le antsake henaneo, te honjoneko an-tsandriko i Norizañey ke izaho veloñe he vilasy. 21 Aa naho amako, haveloñe i Norizañey vaho tombo’e te hikenkañe. 22 Ie veloñe ro mbe hahavokatse te mitromake an-tsandriñe, aa le mañalik’ ahy ty hijoboñe! 23 Mampikitìtse ahiko: sinda te hiavotse mb’eo hindrezako amy Norizañey, izay ty soa hatò; 24 fe mahasoa anahareo t’ie hitoboke an-tsandriñe atoa. 25 Eka, iantofako, toe apotako t’ie hitoboke naho ho tambatse ama’ areo iaby atoa, hampibodobodoeko i fatokisañey hifalea’ areo, 26 soa te hionjoñe ty fandrengea’ areo Iesoà Norizañey te iti­lihako indraike.

27 Ie amy zao: mañaveloa mañeva ty talili-soa’ i Norizañey, ke t’ie hitilike, ke tsy avy, le mbe hitsanoñako te mifahatse añ’ arofo raike, mifanehake an-tokan-troke am-patokisañe i talili-soay, 28 tsy hembañe ndra loli’e amo mandietseo, ie mamente am’iareo t’ie fandrotsahañe, naho ama’areo t’ie famotsorañe—satan’ Añahare izay, 29 toe natolotse ama’areo ho fañasoañe, ty amy Norizañey, te tsy vaho iatoañe fa isotriañe, 30 ie mihotakotake hambañe amy niisa’ areo amakoy, naho janjiñe’ areo amako.