119
1 Haha o vantañe amy lia’eio,
o mañavelo amy Hà’Iehovàio.
2 Haha o miambeñe o taro’eoo,
ty mitsoek’ aze an-kaliforañ’ arofo;
3 Tsy manao ty hatsivokarañe
t’ie manonjohy o lala’eo.
4 Fa najado’o o fepè’oo
hañorihan-tika an-joton-troke.
5 Hizoañe abey o liakoo,
hañambenako o fañè’oo !
6 Le tsy ho salaren-draho
naho hotsohotsoeko iaby o fepè’oo,
7 Handriañeko irehe an-kalio-troke,
handrendreke o fizaka’o too.
8 Hambenako o fañè’oo;
ko farie’o zafe-anake.
9 Akore ty hañaliova’ ty ajalahy i lia’ey?
hambena’e amo tsara’oo.
10 Nitsoeheko irehe an-kaàmpon-troke;
vontitiro iraho tsy handifike o fepè’oo.
11 Fa nahajako an-trok’ ao o saontsi’oo
tsy handilatse ama’o.
12 Andriañen-dRehe, ry Iehovà;
anaro ahy o fañè’oo.
13 Nitaroñe’ o soñikoo
ze hene fizakam-palie’o.
14 Firebehako ty lala’ o taro’oo hambañ’ amy ze atao vara iaby.
15 Ho tsatsiheko o fepè’oo, vaho ho biribirieko o lala’oo.
16 Hifaleako‡Sab 119:24,35,47,70,77,92,143,174, Rom 7:22 o fañè’oo,
tsy handikofako o tsara’oo.
17 Matariha amy mpitoro’oy,
hahaveloñ’ ahy hañorike o tsara’oo.
18 Sokafo o masokoo hahatrea raha fanjaka amy Tsara’oy.
19 Mpitaveañe an-tane atoy iraho;
ko aeta’o amako o fandilia’oo.
20 Demoke ty fiaiko
salalakeo lomoñandro o fizaka’oo.
21 Trevohe’o o mpitrotroabokeo—
o fokompàtse mandridrìke amo fetse’oo.
22 Asitaho amako ty rabioñe
naho ty teratera,
fa ambenako o taro’oo.
23 Ndra te mitoboke,
mikabo-draha amako o roandriañeo,
mininike o fañè’oo ty mpitoro’o.
24 Eka, mahaehak’ ahy o taro’oo;
toe mpamere ahy.
ד Dàlete*Dalete: ‘D’ Hebreo; lalan-traño
25 Mipitek’ an-debok’ ao ty fiaiko;
ampisotrafo amo tsara’oo.
26 Ie nataliliko o satakoo,
le natoi’o, anaro ahy o fañè’oo.
27 Ampaharendreho ahy
ty lala’ o fepè’oo,
hitsakoreako o fitoloña’o fanjàkao.
28 Mitronake am’ anahelo ty fiaiko;
ampahozaro amo tsara’oo.
29 Ampisitaho amako
ty lalan-dremborake;
atorò ahy am-patarihañe o Tsara’oo.
30 Fa jinoboko ty lalam-pigahiñañe,
naho fa nalahako o fizakà’oo.
31 Ie mipitek’ amo taro’oo;
ry Iehovà,
ko anga’o ho salareñe.
32 Hilaisako ty lala’ o fandilia’oo, amy t’ie nanibake ty troko.
33 Anaro ahy, ry Iehovà,
ty lala’ o fañè’oo;
le horiheko pak’ am-pigadoñako.
34 Omeo hilala iraho,
hañambenako o Tsara’oo,
le horiheko an-kaliforan-troke.
35 Ampandiao ahy ty oloñolo’
o fandilia’oo,
amy t’ie mahafale ty troko.
36 Ampitokilaño amo fañè’oo ty troko
tsy hitomboa’e am-patitiañe.
37 Avioño o masokoo tsy hañente
ty tsy vente’e;
ampahimbaño amo lala’oo.
38 Henefo amy mpitoro’oy o saontsi’oo,
ty amy fañeveñako ama’o.
39 Ahankaño añe ty ìnje’
o mampangebahebak’ ahikoo,
amy te soa o fizakà’oo.
40 Hete ! salalaeko o fepè’oo!
ihetsefo amo fahiti’oo.
41 Ampombao amako ty fiferenaiña’o ry Iehovà,
ty fandrombaha’o ty amo saontsi’oo;
42 hahafitoiñako ty mañorohoro ahiko,
fa iatoako o tsara’oo.
43 Ko sintone’o am-bavako
ty tsara-to, fa salalaeko o nafè’oo,
44 Le hambenako lomoñandro o Tsara’oo, eka, nainai’e donia;
45 Hijelanjelañe am-pidadàñe iraho,
amy te hotsohotsoeko o fepè’oo.
46 Ho talilieko añatrefam-panjaka
o taro’oo le tsy ho salatse,
47 Hifaleako o fandilia’oo
toe kokoako.
48 Zonjoñeko amo fandilia’oo o tañakoo,
fa kokoako, vaho haereñereko o fañè’o.
49 Tiahio i nitsaraeñe amy mpitoro’oiy,
amy t’ie nampitamae’o.
50 Zao ty mampanintsiñe ahy
amo faloviloviakoo,
te nahajangañe ahy o saontsi’oo.
51 Mitolom-piteratera ahy
o mpirengevokeo,
fe tsy mivik’ amo Tsara’oo iraho.
52 Tiahiko o fizakà’o haehaeo,
ry Iehovà, fa nahaeneñ’ ahy.
53 Filoroloro-mena ty mamihiñe ahiko
ty amo lo-tsereke
mampipoke i Tsara’oio.
54 O fañè’oo ro fisaboako an-kialo fitaveañako.
55 Tiahiko ami’ty haleñe
ty tahina’o ry Iehovà,
vaho oriheko o Tsara’oo.
56 Zao ty ahy
te ambenako o fepè’oo.
ח Khète*Khete: ‘Kh’ : Heb: kijoly
57 Iehovà ro anjarako;
fa nifanta t’ie hañorike o tsara’oo.
58 Fa nipaiako an-kaampon-troke
ty fañisoha’o; tretrezo raho
ty amo nampitama’oo.
59 Nitsakoreko o liakoo le nampitoliheko mb’amo taro’oo o tombokoo.
60 Nalisa iraho tsy nihenekeneke
hañambeñe o fandilia’oo.
61 Mamejañe ahiko ty hafo’ o lo-tserekeo, fe tsy andikofako o Tsara’oo.
62 Mitroatse antetsalen-draho
hañandriañe Azo
ty amo fizakà’o vantañeo.
63 Ràñeko o mañeveñe ama’o iabio,
naho o mpañorike o fepè’oo.
64 Lifotse ty fiferenaiña’o ty tane toy,
ry Iehovà; anaro ahy o fañè’oo.
65 Fa nisoae’o ty mpitoro’o, ry Iehovà,
ty amo enta’oo.
66 Anaro hilala naho hihitse,
amy te atokisako o fandilia’oo.
67 Nandifike hey iraho le nalovilovy,
fe ifaharako o saontsi’oo henane zao.
68 Soa irehe, mpanao ty soa;
anaro ahy o fañé’oo.
69 Mamoroñe vande amako
o mpinefonefokeo,
fe hene ahajako an-troke ao o fepè’oo.
70 Vondrake hoe sabora ty tro’ iareo,
fe mahanembanembañ’ ahiko o Tsara’oo.
71 Nahasoa ahiko te nisilofeñe,
hianarako o fañè’oo.
72 Fanjaka amako ta ty volamena naho
ty volafoty añ’arivo’e o Tsaram-palie’oo.
73 Namboatse naho nitsene ahy o fità’oo; toloro hilala hianarako
o fandilia’oo.
74 Ho isa’ o mañeveñe ama’oo iraho le hifale, fa o tsara’oo ty fitamako.
75 Apotako ry Iehovà,
te vantañe o fizakà’oo,
naho figahiñañe ty nanotria’o ahy.
76 Ehe ohò ami’ty fikokoa’o migahiñe,
ty amy nafè’o amy mpitoro’oy.
77 Ampombao mb’amako ty fitretreza’o hahaveloñ’ahy,
fa ifaleako o Tsara’oo.
78 Salaro o mpiebotsebotseo,
ie nañadroadro ahy tsy vente’e;
fa ereñèreko o fepè’oo.
79 Ampimpolio amako o mañeveñe ama’oo, naho o mahafohiñe o taro’oo.
80 Hahity amo fañè’oo abey ty troko,
tsy mone ho salareñe.
81 Ho mokoreko fiaiñe o fandrombaha’oo,
ty amy fisalalàko o enta’oo.
82 Mampilesa o masokoo o saontsi’oo; anoako ty hoe:
Ombia ty añohoa’o ahy?
83 Ndra t’ie hoe gorogoron-divay an-katòeñe ao, tsy haliñoko o fañè’oo.
84 Fire ty andro’ i mpitoro’oy?
Ombia te ho zakae’o
o mpanao samporerak’ ahikoo?
85 Fa nihaly koboñe ho ahiko
o mpitrotroabokeo,
o tsy mañaoñe o Tsara’oo.
86 Migahiñe iaby o fandilia’oo;
ampisoañe’ iereo am-pamañahiañe,
imbao iraho!
87 Didý tsy nifaohe’iareo an-tane atoy,
fe izaho, tsy apoko o fepè’oo.
88 Hetsefo iraho ami’ty fiferenaiña’o,
hañorihako o tarom-palie’oo.
ל Làmede*Lamede: ‘L’ Heb: Kobaiñe
89 Nainai’e, ry Iehovà, ty fijadoña’
o tsara’oo an-dindìñe ao;
90 Manitsike ze hene tariratse
mifandimbe ty figahiña’o;
kanao norize’o ty tane,
mijadoñe izay.
91 O fizakà’oo ty ijohaña’ iareo henaneo;
kila mitoroñ’ azo.
92 Naho tsy nahaehak’ahy o Tsara’oo
le ho nihomak’ amy hasotriakoy.
93 Tsy ho haliñoko ka o fepè’oo,
fa iereo ro nanotrafa’o ahiko.
94 Kanao azo iraho, rombaho;
fa nitsikaraheko o fepè’oo.
95 Fa hañè-doza amako o lo-tserekeo,
fe ho tsakorèko o taro’oo.
96 Nitreako te hene higadoñe ze atao safiry; fe toe milañelàñe o fandilia’oo.
מ Meme†Mem: ‘M’ Hebreo: rano
97 Hirý! ty fikokoako o Tsara’oo‡Toe Hake: a.113,119,127,163,165,167!
Kinañeko lomoñadro.
98 Mampahihitse ahy ambone’
o rafelahikoo o fandilia’oo,
fa amako nainai’e.
99 Andikoareko an-kilala ze hene mpañok’ ahy,
amy te ereñereko o taro’oo.
100 Milikoatse ty faharendreha’ o taoloo ty ahiko,
amy te ambenako o fepè’oo.
101 Ampiholiareko amy ze lalan-draty iaby
o tombokoo;
hañorihako o tsara’oo.
102 Tsy nisitahako o fizakà’oo,
amy te Ihe ty mañòk’ ahy.
103 Akore ty hamami’ o saontsi’oo
an-dañilañiko ao,
lombolombo te ami’ty tantele
am-bavako ao!
104 O fepè’oo ro mampandrendrek’ahy,
fonga hejeko ze lalam-bìlañe.
105 Failo amo tombokoo o tsara’oo,
naho hazavàñe añ’oloñoloko eo.
106 Fa nifanta iraho vaho hajadoko
te hambenako o fizakà’o vantañeo.
107 Loho miatra-draha iraho;
Ampisotraho amo tsara’oo
iraho ry Iehovà.
108 Iantofo ry Iehovà
o banabanam-bavakoo,
vaho anaro ahy o fizakà’oo.
109 An-tañako ao nainai’e ty fiaiko,
fe tsy ho likofeko o Tsara’oo.
110 Nampidreña-pandrike ho ahy
o lo-tserekeo,
fe tsy nivihako o fepè’oo.
111 Linovako ho nainai’e o taro’oo,
le irebeha’ ty troko.
112 Fa natokilako ty troko
hañoriha’e nainai’e o fañè’oo,
pak’am-pigadoña’e añe.
113 Hejeko ty milolohe roe,
fe kokoako o Tsara’oo.
114 Ihe ro fipalirako naho kalan-defoko;
o tsara’oo ro fisalalàko.
115 Misitaha amako ry lo-tserekeo!
hiambenako o fandilian’ Añaharekoo!
116 Tozaño amo saontsi’oo iraho,
soa te ho veloñe;
le ko ampisalareñe amy fitamàko.
117 Tohaño le ho tra-drombake,
hitoloñako amo fepè’oo nainai’e.
118 Aforintseo ze mandifike
amo fepè’oo,
fa vande ty famañahia’ iareo.
119 Ado’o hoe taim-pira
ze fonga tsy vokatse an-tane atoy;
izay ty ikokoako o taro’oo.
120 Mititititik’ an-kahembañañe ama’o
o nofokoo;
fa mampañeveñe ahy o fizakà’oo.
121 Fanoeko ty hatò naho ty havantañañe,
ko anga’o amo mpañelok’ ahio.
122 Tsoeho ho an-kasoa
ty mpitoro’o,
ko ado’o hanindria’
o mpirengevokeo
123 Ilesà’ o masokoo ty fandrombaha’o
naho o saontsi’o vañoñeo.
124 Anò am-piferenaiña’o ty mpitoro’o,
vaho aòho ahy o fañè’oo.
125 Mpitoro’o iraho,
toloro hilala handrendrehako o taro’oo.
126 Tondroke ty hitoloña’ Iehovà;
fa nivalik’ amo Tsara’oo iereo.
127 Toe kokoako mandikoatse
o volamenao
o fandilia’oo, ambone’ ty volamena ki’e,
128 vaho iantofako te vantañe
te amy ze he’e o fepè’oo;
fonga hejeko ze lalam-bàlañe.
129 Fanjaka o taro’oo;
le ifahara’ ty troko.
130 Minday hazavàñe ty famentarañe o tsara’oo;
mampandrèndreke ty bànoke.
131 Nitañataña vava iraho,
nisefosefo amy fisalalàko
o fandilia’ooy.
132 Mitoliha amako le tretrezo,
ie anoe’o amo mikoko i tahina’oio.
133 Alaharo amo fetse’oo ty liako;
le ko apo’o ho fehen-kakeo
inoñ’inon-draho.
134 Jebaño ami’ty famorekekea’ ondatio, hañorihako o fepè’oo.
135 Ampireandreaño amy mpitoro’oy
ty lahara’o,
vaho aòho ahy o fañè’oo.
136 Mikararake rano hoe torahañe
o masokoo,
ami’ty tsy fañoriha’ iareo o Tsara’oo.
137 Vantan-dRehe, ry Iehovà,
naho vañoñe o fizakà’oo.
138 Fa nafanto’o an-kahiti’e o taro’oo,
naho am-pigahiñañe ra’elahy;
139 Mametrak’ ahiko ty fahimbañako,
ami’ty fandikofa’ o rafelahikoo o tsara’oo.
140 Vata’e niventèñe o nafè’oo,
vaho ikokoa’ ty mpitoro’o.
141 Kede iraho naho mavoeñe,
fe tsy haliñoko o fepè’oo.
142 Toe marentane nainai’e tsy modo
o havantaña’oo;
vaho to o Tsara’oo.
143 Tendrek’ ahiko ty hasotriañe
naho ty haloviloviañe,
fe mahafale ty troko o fandilia’oo.
144 Vantañe nainai’e o taro’oo;
toloro hilala hivelomako.
145 Fa nitoreo an-kaampon-troke:
toiño iraho ry Iehovà; hañorihako o fañè’oo.
146 Mikanjy Azo, ehe rombaho,
fa hambenako o taro’oo.
147 Mañampitso t’ie mitroatse
naho mikaike; misalala o tsara’oo.
148 Mitamà o fijilovan-kaleñeo o masoko, mañereñere’ o nafè’oo.
149 Janjiño ty feoko amo fiferenaiña’oo;
isotrafo, ry Iehovà, ty amo nafe’oo.
150 Fa mitotoke o mpikitro-draha ratio,
o mitotse amo Tsara’oo.
151 Marine irehe ry Iehovà,
naho hene to o fandilia’oo.
152 Fa nirendreko haehae o taro’oo
fa najado’o ho nainai’e.
153 Vazohò ty fisotriako
vaho imbao,
fa tsy haliñoko o Tsara’oo.
154 Alañalaño ty entako, vaho jebaño;
sotrafo ty amo nafè’oo.
155 Lavitse o lo-tserekeo ty fandrombahañe, fa tsy paia’ iereo o fañè’oo.
156 Ra’elahy o fiferenaiña’oo ry Iehovà;
bodaño iraho ty amo taro’oo.
157 Maro ty mampisoañe ahiko
naho o malaiñ’ahio,
f’ie tsy mivike amo taro’oo.
158 Treako o mivalikeo, toe hejeko;
amy te tsy ambena’ iareo o fetse’oo.
159 Vetsevetseo ty fikokoako o fepè’oo;
velomo iraho ry Iehovà,
ty amo fiferenaiña’oo.
160 Ty jabajaba amo Tsara’oo, le t’ie vañoñe, hene mijadoñe nainai’e o fizakà’o vantañeo.
161 Mampisoañ’ahy tsy aman-tali’e
o roandriañeo,
fe mañeveñe amo tsara’oo ty troko.
162 Firebehako o fetse’oo,
manahake t’ie anjòam-bara bey.
163 Hejeko naho mañalik’ahy
o lañitseo,
kokoako o Tsara’oo.
164 Mandrenge Azo im-pito ami’ty andro iraho ty amo fizakà’o mahitio.
165 Fañanintsin-tsoa amo mikoko
o Tsara’oo, tsy eo ty hahatsikapy iareo.
166 Salalaeko i fandrombaha’oy,
ry Iehovà, hene ambenako o fandilia’oo.
167 Ambena’ ty fiaiko o taro’oo,
le toe kokoako.
168 Tanako o fepè’oo naho o taro’oo,
aolo’o eo iaby o liakoo.
169 Ehe te hiatreke azo o toreokoo,
ry Iehovà;
andrendreho te fahareko o tsara’oo.
170 Hiheo añatrefa’o eo abey o halalikoo;
avotsoro ty amo fetse’oo.
171 Hampipoñake fandrengeañe
o soñikoo, amy te anare’o ahy o fañè’oo.
172 Hisaboe’ ty lelako o nafè’oo,
amy te hene vantañe o fepè’oo.
173 Ee te ho veka’e hañimba ahiko
ty fità’o, fa jinoboko o lili’oo.
174 Fisalalàko i fandrombaha’oy, ry Iehovà, mampinembanembañ’ahy
o Tsara’oo.
175 Sotrafo ty fiaiko handrenge azo,
vaho ampañimbao ahy o fizakà’oo.
176 Nivike hoe añondry motso iraho;
tsoeho o mpitoro’oo,
fa tsy likofeko o fepè’oo.
*^ Mifandime ami’ty abody Hebreo, nalahatse kivalo sindre mifototse am-peo raike ty valo. Alef: ‘A’ ami’ty abode Hebreo: Añombelahy
†119:8 Bete: ‘B’ ami’ty Hebreo: anjomba, traño
‡119:16 Sab 119:24,35,47,70,77,92,143,174, Rom 7:22
§119:16 Gimele: ‘G’ Hebreo; rameva, fandia
*119:24 Dalete: ‘D’ Hebreo; lalan-traño
†119:32 He: ‘h’ Hebreo: Heheke!; taña-mizonjo
‡119:40 Vàv: ‘V’ : Heb: kitro, fahañe
§119:48 Zaine: ‘Z’ : Heb: fialiañe, lasary
*119:56 Khete: ‘Kh’ : Heb: kijoly
†119:64 Tete: T tsotra, Heb : mereñe
‡119:72 Yode: ‘iè’ Heb: fita mivokeñe
§119:80 Kaf: ‘K ndra Kh’ Heb: Lelam-pitañe
*119:88 Lamede: ‘L’ Heb: Kobaiñe
†119:96 Mem: ‘M’ Hebreo: rano
‡119:97 Toe Hake: a.113,119,127,163,165,167
§119:104 None: ‘N’ Hebreo; fia, tabiry
*119:112 Samekh: ‘S’ masioñe Heb: fikalañe, fatike
†119:120 Aine: ze feo itolorañe; fihaino
‡119:128 Pe: ‘P’ ndra ‘F’ te Hebreo : Falie misokake
§119:136 Tsadìke: ‘Ts’ te Hebreo: vantañe, vìntañe
*119:144 Kofe: ‘K’ Hebreo. gadon-doha, masoandro
†119:152 Resh: ‘R’ Hebreo; añambone
‡119:160 Sin : ‘S’, Hebreo, vilo’ masy, famotse
§119:168 Tav: ‘T’ fiasiañe Hebreo; viloñe
DRAFT VERSION