1 Hahao an-drafelahiko raho

ry Andrianañahare :

ampitroaro an-kaboañe

ty amo miatreatre ahikoo.

2 Avotsoro amo mitolon-katsivokarañeo,

vaho rombaho am’ondaty

mampiori-dioo.

3 Hehe t’ie mamandroñe ty fiaiko,

robohe’ o mpitrotrofiak’ amako,

tsy ty amo fiolàkoo ndra o tahikoo, ry Iehovà.

4 Tsy o fandilarakoo ty falisa’ iareo

hiatreatre ahy;

mivañona hañolora’o vaho mivazohoa.

5 Ihe arè ry Iehovà,

Andrianañahare’ i màroy,

Andrianañahare Israele,

mivañona, handilova’o o fifeheañeo;

ko tretrezeñe o mpiola lo-tserekeo. Selà

6 Mibalike haleñe iereo,

mañaolo hoe amboa

vaho mikariokariok’ amy rovay.

7 Hehe t’ie mamore am-bava,

fibara ty an-tsoñi’e, manao ty hoe:

Ia ty mahajanjiñe.

8 F’ihe, ry Iehovà, ro hiankahak’ am’iareo, hene sirikae’o o fifeheañeo.

9 O ry Haozarako, fitamakoo;

kijoli-aboko t’i Andrianañahare.

10 Hiaolo ahy t’i Andrianañaharem-piferenaiñ’ ahiko,

hampisamban’ Añahare o rafelahikoo.

11 Ko vonoe’o hey iereo,

tsy mone haliño ondatikoo;

ampirererereo ami’ty haozara’o,

vaho afotsaho, ry Talè, fikala’ay.

12 ty amo hakeom-palie’ iareoo,

o saontsim-pivimbi’eo, ee t’ie ho tsepaheñe am-pirengevoha’e, naho amo fatse vaho fandañitse aaka’ iareoo.

13 Mongoro an-kaviñerañe,

zamano ho modo,

hampandrendrehañe te mifehe

am’ Iakobe ao t’i Andrianañahare,

sikala añ’olo’ ty tane toy añe, Selà

14 Mimpoly haleñe iereo,

mañaolo hoe amboa,

vaho mbeo-mbeo an-drova atoy,

15 Mihelahela avao, mipay haneñe,

vaho mitromoroñe naho tsy vontsy.

16 Aa naho izaho, ho saboeko ty haozara’o; Eka, hipoñafako te maraiñe

ty amy fiferenaiña’oy;

amy te Ihe ro tambohoko,

fitsolohako añ’andron-kaloviloviako.

17 Ry Haozarako,

hisaboako am-pandrengeañe:

amy te mpikalañ’ ahy t’i Andrianañahare,

i Andrianañaharem-piferenaiñ’ ahiy.