1 Ihe ry Iehovà, ro itsolohako;

ko apo’o ho salareñe,

2 Votsoro ami’ty havantaña’o,

naho hahao;

atokilaño amako ty ravembia’o

vaho rombaho.

3 Ehe t’ie ho vato fimoneñako,

ho fimpoliako;

fa nafanto’o ty handrombahañe ahiko;

Ihe ro lamilamiko naho rova fiàroko.

4 Avotsoro an-tañan-do-tsereke iraho,

ry Andrianañahareko

ami’ty fivontitira’ ty mpandilatse

naho i mpampisoañey.

5 Fa Ihe ro fitamàko, ry Iehovà Talè;

ty natokisako boak’ami’te nahajalahy.

6 Ihe ty nirampiako

boak’an-kovin-dreneko ao;

Ihe ty nañakatse ahy an-tron-dreneko;

Rengeko nainai’e irehe.

7 Filatsà’ i màroy iraho,

f’Ihe ro fipalirako maozatse.

8 Pea’ ty fibangoañe naho ty fiasiañ’Azo

lomoñandro ty vavako,

9 Ko aitoa’o iraho naho fa bey;

ko mamorintseñe ahy naho

milesa ty haozarako.

10 Fa nikinia’ o rafelahikoo;

vaho mitrao-pikilily ahy

o mivoñoñe ty fiaikoo,

11 ami’ty hoe:

naforintsen’ Añahare,

horidaño arè vaho tsepaho amy t’ie

po-pañolotse.

12 Ry Andrianañahare, ko ihànkaña’o,

ry Andrianañahareko,

malisà hañolots’ ahy.

13 Ho salareñe naho mongoreñe

o manisý ty fiaikoo;

le hoboñañ’ inje naho hameñarañe

o mipay hijoy ahikoo.

14 Fa naho izaho, hitama nainai’e

vaho honjoneko avao

ty fandrengeako Azo.

15 Ho talilie’ ty vavako o havantaña’oo,

naho o fandrombaha’o lomoñandroo,

fe nofiko ty hamaro’e.

16 Hindeseko o tolon-draha’o ra’elahio,

ry Iehovà Talè;

ho taroñeko ty havantaña’o, ty Azo avao.

17 Ry Andrianañahare, fa nanare’o ahy boak’ ami’ty nahajalahy ahy;

pake henaneo,

taroñeko avao o raha fanjaka fanoe’oo.

18 Aa ndra t’ie bey naho fotivolo,

ry Andrianañahare, ko farie’o

ampara’ te ataliliko añ’afeafe

ty haozara’o;

ty hafatrara’o amy ze hene ho avy.

19 Pak’ andindiñe añe ty havantaña’o,

ry Andrianañahare.

Ihe namonitse o raha ra’elahio:

ry Andrianañahare,

ia ty mañirinkiriñe ama’o?

20 Ihe nampahatrea ahiko

haemberañe maro naho hasotriañe;

ro hameloñ’ahy,

hañakatse naho hampipoly ahy

hirik’ an-kerakeran-tane ao.

21 Ehe, onjono ty engeko,

vaho mitoliha hañohò ahy.

22 Ho rengeko ami’ty mandalina ka,

ty ami’ty hatò’o, ry Andrianañahareko;

ho saboeko ami’ty marovany,

ry Masi-Toka’ Israele.

23 Hipoñake an-drebeke o soñikoo,

ie mandrenge Azo an-tsabo,

naho i fiaiko jineba’oy.

24 Ho talilie’ ty lelako lomoñandro

o havantaña’oo,

fa salatse, toe meñatse

o mipay hijoy ahikoo.