1 Treño t’Iehovà;

andriaño t’Iehovà, amy te Ie ro soa;

nainai’e ty fiferenaiña’e.

2 Ia ty mahatalily o sata fanjaka’

Iehovào?

ndra hahafitsey o enge’e iabio?

3 Haha ze mahafiambeñe ty hatò,

naho mitolom-panao ty fahiti’e.

4 Tiahio iraho, ry Iehovà,

naho isohe’o ondati’oo;

itiliho amy fandrombaha’oy.

5 Hahatreavako ty firaoraoa’ o jinobo’oo,

hirebeke ami’ty hafalea’ i fifehea’oy,

hitrao-pitreñañe amy lova’oy.

6 Nindre nandilatse amo roae’aio zahay;

nanao hakeo, nitolon-karatiañe.

7 Tsy nihaoñe’ o rae’ay e Mitsraimeo

o halatsà’oo;

tsy nitiahi’ iereo o fiferenaiña’o vokatseo,

te mone niola amy Abo Tiañe,

an-dRiake Mena*Riake Mena: ndra: ‘Riake Vondro’ (and. 9 naho 22 ka) añe.

8 Fe rinomba’e ty amy tahina’ey, hampaharofoana’e ty haozara’e.

9 Trinevo’e i Riake Menay,

le nimaike,

vaho niaoloa’e, nitoañe o lalekeo

hoe te fatram-bey.

10 Le rinomba’e boak’an-taña’

i malaiñe iareoy,

naho jineba’e am-pità’ i rafelahiy.

11 Nopoe’ i ranoy o rafelahi’eo; tsy nanisàñe honka’e.

12 Aa le natokisa’ iareo o tsara’eo, nisaboeñe ty enge’e.

13 Fe nihaliño’ iereo anianike o sata’eo

tsy nahaliñe o famerea’eo.

14 Le niazo’ ty hasiji-mena

an-jerezere tane añe;

nazizi’ iereo am-babangoañe ao

t’i Andrianañahare.

15 Aa le nitolora’e i nihalalie’ iereoy,

fe nañiraha’e haborokàñe ty fiai’iereo.

16 Ie nitsikirike i Mosè an-tobe ao,

naho i Aharone navahe’ Iehovày,

17 le nisokake i taney niteleñe i Datane;

naho nandembeke ty fehe’ i Abirame.

18 Nisolebare’ ty afo añivo’ i rimboñey;

niforototoe’ i firebarebàñey o tsivokatseo.

19 Nitsene bania e Korebe añe iereo,

naho nilokoloko amy sare trinanakey;

20 aa le natakalo’ iereo sare bania

mivazakota ahetse, ty engen’ Añahare.

21 Nihaliño’ iereo t’i Andrianañahare

mpandrombake iareo,

I nanao raha fanjàka e Mitsraimey,

22 raha tsitantane an-tane’ i Kame

vaho raha naharevendreveñe

an-dRiake Mena añe.

23 Aa le nanao ty hoe t’ie harotsa’e:

naho tsy te nijohañe an-jebañe añatrefa’e eo

t’i Mosè jinobo’e, nampivioñe

i haviñera’ey tsy hanjamana’e.

24 Niheje’ iereo amy zao i tane nirieñey;

tsy natokisañe o tsara’eo,

25 f’ie niñeoñeoñe an-kijà ao,

tsy hinao’ iereo ty fiarañanaña’ Iehovà.

26 Aa le nifanta

te hampikorovohe’e an-jerezere tane ao,

27 naho havarakai’e amo fifeheañeo

ty tarira’ iareo

vaho haparatsà’e amo taneo.

28 Mbore nireketse amy Baale-Peore iereo

vaho nampibotseke haneñe

nisoroñañe an-dolo.

29 Aa le nampiviñere’ iereo

amo fitoloña’ iareoo,

vaho natorotosi’e an-kiria.

30 Niongak’ amy zao t’i Pinekase

le nijebañe,

vaho nisebañeñe i angorosiy.

31 Nivolilien-ko havañonañe ama’e zay.

ho a ze hene tarira’e mifandimbeo.

32 Nampiviñera’ iareo ka

amo rano mpilie-drokoñeo,

le niazom-boiñe ty am’iereo t’i Mosè;

33 amy t’ie nikai-jaka amy arofo’ey,

le kamaike ty niakatse am-pivimbi’e ao.

34 Tsy nifongore’ iareo ondatio,

amy nandilia’ Iehovà hanoeñey,

35 Te mone nifañaoñe amo kilakila‘ndatio

naho nizatse o sata’eo,

36 naho nitoroñe o saren-drahare’eo

ze nanjare fandrik’ am’ iereo,

37 naho nasoro’ iereo amo kokolampao o anadahi’iareoo naho o anak’ ampela’iareoo,

38 vaho nampiorike lio-maliñe,

ty lion’ anadahy naho anak’ampela,

ie nasoro’ iereo amo saren-drahare’

i Kanànao, vaho vinetan-dio i taney.

39 Aa le nihativa am-pitoloñañe,

nañarapilo amo fisafiria’iareoo.

40 Toly ndra niviañe am’ondatio

ty haviñera’ Iehovà,

vaho niheje’e i lova’ey.

41 Natolo’e am-pità’ o fifeheañeo iereo,

hifehea’ o rafelahi’eo.

42 Niforekeke’

o nifankalaiñe am’iereoo

le nareke ambane’ fità’iareo.

43 Beteke rinomba’e, f’ie nizehatse an-tsafiry,

vaho nilempotse an-kakeo.

44 Ie nivazoho’e ty falovilovi’ iareo,

naho jinanji’e o fitoreova’ iareoo,

45 le nitiahi’e ty am’ iereo i fañina’ey naho niselekaiñe, ty amo hene fiferenaiña’eo;

46 ie nampitretreze’e amo nanese

iareo am-pandrohizañeo.

47 Rombaho zahay ry Iehovà

Andrianañahare’ay,

vaho atontono boak’ amo fifeheañeo, hañandriaña’ay ty tahina’o masiñe,

vaho hitreñe amo enge’oo.

48 Andriañeñe t’Iehovà,

Andrianañahare’ Israele,

boak’an-kaehae’e pak’an-kaehae’e;

vaho hene hiredoñe ami’ty hoe ondatio:

Ie Izay, †Heb: Amena Treño t’Ià.