1 Andriañeñe t’Iehovà,

amy te Ie ro soa;

nainai’e ty fiferenaiña’e.

2 Ano izay ry jineba’ Iehovà—

ry nijebañe’e am-pitàn-drafelahy,

3 vaho hinoloholo’e hirik’ amo taneo,

boak’atiñanañe naho ­ahandrefañ’ añe,

boak’ avaratse vaho hirik’ amy riakey.

4 Nirererere ambabangoañ’ añe iereo,

an-dratraratra ao,

tsy nahaonin-drova fimoneñañe.

5 Nisalikoeñe naho taliñiereñe,

nitoirañe añ’ova ao ty fiai’ iareo.

6 Le nitoreo am’ Iehovà

an-kaloviloviañe

naho hinaha’e amo hasotria’iareoo,

7 Nindese’e mb’an-dalam-bantam-beo

higodañe mb’an-drova fimoneñañe añe.

8 Handriañe’ iereo t’Iehovà

ty amy fiferenaiña’ey

naho o fitoloña’e fanjaka

amo ana’ondatioo,

9 fa nieneñe’e ty fiaiñe taliñiereñe,

nanjañe’e raha soa ty troke nilimpoa.

10 Teo ty nitozòke añ’ieñe ao

naho an-talinjon-kavilasy ao,

rinohy an-kasotriañe naho vý,

11 amy t’ie niody amo fepèn’Añahareo,

vaho nañovok’ i famerea’

i Andindimoneñey.

12 Aa le nampibokohe’e ty arofo’ iareo

am-pitromahañe,

nampidaleandaleañe

tsy amam-pañimba.

13 Le nitoreo am’ Iehovà

t’ie niankoheke,

le rinomba’e amo fikoretañeo;

14 naaka’e boak’ añ’ieñe naho

an-talinjon-kavilasy ao,

vaho nipoñafe’e o silisilio.

15 Handriañe’ iareo t’i Iehovà

ty amy fiferenaiña’ey

naho o halatsañe nanoe’e

amo ana’ ondatioo,

16 amy te pinaratsà’e

o lalam-bey torisìkeo

naho pinozapoza’e o doda viñeo.

17 Nampisotriañe o seretseo

ty amo fiolà’eo, naho o tahi’eo.

18 Nampangori’ ty fiai’ iareo

ze atao hàneñe,

ie nitotoke o lalam-bein-kavilasio.

19 Le nitoreo am’ Iehovà

t’ie niampoheke,

vaho rinomba’e amo haemberañeo.

20 Nahitri’e i tsara’ey nahajangañe iareo

vaho navotso’e amy kiboriy.

21 Andriañe’ iereo t’Iehovà

ty amy fiferenaiña’ey

naho o halatsañe fanoe’e

amo ana’ondatioo,

22 Ee t’ie hibanabana sorom-

pañandriañañe

naho hitalily o fitoloña’eo an-drebeke;

23 Ao ty mizotso mb’an-tsambo

an-driake ey;

o mpanao balibalik’ an-drano mieneneo,

24 Fa niisa’ iareo o sata’ Iehovào,

o halatsàñe fanoe’e an-dalekeo.

25 Amy tsara’ey, nitroatse ty tio-bey,

nampitoabotse o alon-driakeo.

26 Nionjomb’an-dindimb’eo iereo,

vaho nizotso mb’an-dalek’ ao;

nitranak’ ami’ty hekoheko’e ty fiai’iareo.

27 Nivembeñe, nisiotsiotse hoe jike;

fonga nilesa ty hihi’ iareo.

28 Nitoreove’ iareo t’Iehovà

an-kasosorañe,

vaho natsoa’e an-kasotriañe.

29 Nampipendreñe’e i tio-beiy,

le nitsiñe o onjan-driakeo.

30 Niehake iereo te nibànatse,

vaho nitehafe’e mb’amy fipalirañe

nisalalaeñey.

31 Handriañe’ iereo t’Iehovà

ty amy fiferenaiña’ey, naho

o halatsañe fanoe’e

amo ana’ ondatioo.

32 Ee t’ie honjone’ iareo

am-pivori’ ondatio

vaho handrenge Aze ami’ty

fiambesa’ o androanavio.

33 Afote’e ho ratraratra o sakao, naho ho tane kankañe o torahañeo;

34 ho fatran-tsira ty tane kobokara,

ty ami’ty tsihavokara’

o mpitobok’ ama’eo.

35 Ampanginakinahe’e o tane mihedatseo, vaho ampanganahanae’e o kirikintañeo;

36 hampitobea’e o limpoañeo,

hañoreña’iareo rova fimoneñañe.

37 Handrarake an-teteke ao iereo,

naho hambole tetem-bahe,

vaho hanonton-tsabo vokatse;

38 Tahie’e ka iereo hanaranàha’e maro,

le tsy apo’e hiha-rìtse o añombe’eo.

39 Ie nitaketrake iereo,

ninìke ami’ty famorekekeañe,

naho fanilofañe, vaho anahelo;

40 ampidoaña’e ìnje o roandriañeo, ampiriorioe’e am-bangý

tsy aman-dalañe añe,

41 toe aonjo’e ambone’ o hasotriañeo

i rarakey,

vaho anoe hoe lia-raike o hasavereña’eo.

42 Isa’ o vantañeo izay le mifale,

fonga mamìm-bava ka ty hatsivokarañe.

43 Ia ty mahihitse, hiharaharà’e?

ie ro mahafohiñe ty fiferenaiña’ Iehovà.